ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނު މުރާޖާކުރަނީ

ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު މުރާޖާ ކުރުމުގެ މަސައްކަތް ފެށުމަށް ނިންމާފައިވާކަމަށް ސިއްޙަތާއި އާޢިލާއާއި އިޖުތިމާޢީ އެހީއާ ބެހެ ވުޒާރާއިން ވިދާޅުވެއްޖެއެވެ.

ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫ ތަސްދީޤްކޮށްފައިވަނީ 2019 ވަނަ އަހަރު ނޮވެމްބަރު މަހުގެ 20 ވަނަ ދުވަހުގައެވެ. އަދި އެ ޤާނޫނަށް ޢަމަލުކުރަންފެށީ 2020 ވަނަ އަހަރުގެ ފެބްރުއަރީމަހުގެ 20 ވަނަ ދުވަހުގައެވެ. މި ޤާނޫނަށް ޢަމަލުކުރުމުންގެ ކުރިން ޢަމަލު ކުރަމުންދިޔައީ 1991 ވަނަ އަހަރު ފާސްކުރި ކުޑަކުދިންގެ ޙައްޤުތަކާބެހޭ ޤާނޫނަށެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ސިއްޙަތާއި ޢާއިލާއާއި އިޖުތިމާޢީ އެހީއާ ބެހޭ ވުޒާރާގެ ސްޓޭޓް މިނިސްޓަރ ޒީނާޒް އަދުނާން ވިދާޅުވީ ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު މުރާޖާ ކުރަން ޖެހިފައިވާކަމަށެވެ. މި ޤާނޫނަށް 7 އަހަރު ފާއިތުވެގެންދާއިރު ޤާނޫނަށް ގެންނަންޖެހޭ ބަދަލުތައް ބަލަމުންދާނެކަމަށް ސްޓޭޓް މިނިސްޓަރ ވިދާޅުވިއެވެ.

"އަޅުގަނޑުމެންނަށް ހޯދިފައިވާ ޑޭޓާތަކާއި މި ނިޒާމްގެ ތެރޭގައި މަސައްކަތްކުރާ ހުރިހާ އެންމެނާއެކު މަސައްކަތްކޮށް ރަނގަޅު ޕްރޮސެސްއެއްގެ ތެރެއިން މި މަސައްކަތް ކުރިއަށްދާނީ." ސްޓޭޓް މިނިސްޓަރ ޒީނާޒް އަދުނާން ވިދާޅުވިއެވެ

ކުޑަކުދިންނަށް ކުރާ އަނިޔާ ހުއްޓުވުމުގެ ބައިނަލްއަޤްވާމީ ޤަރާރު ނުވަތަ "ބޮގޯޓާ ކޯލް ޓު އެކްޝަން" ޤަރާރުގައި ރާއްޖެއިން ސޮއިކުރުމުގެ އިތުރަށް ރާއްޖެއިން ބައިވެރިވެފައިވާ ކުޑަކުދިނާ ގުޅުން ހުރި މުއާހަދާތަކަށް އަލިއަޅުވާލައްވަމުން ސްޓޭޓް މިނިސްޓަރ ވިދާޅުވީ ކޮންވެންޝަން އޮން ދަ ރައިޓްސް އޮފް ޗިލްޑްރަންގެ 6 އަދި 7 ވަނަ ރިޕޯޓް ރާއްޖެއިން ހުށަހަޅާފައިވާކަމަށެވެ. އަދި ކޮންވެންޝަން އޮން ދަ ރައިޓްސް އޮފް ޗިލްޑްރަން ކޮމިތީން ހުށަހަޅާފަިއވާ ކަންކަމަށް ރިޔާއަތްކޮށްގެން ކުޑަކުދިން ބައިވެރިވާ ކަންކަމުގައި އެކުދިންގެ ޚިޔާލާ މަޝްވާރާ ހޯދުމުގެ ޕޮލިސީއެއް އެކުލަވާލުމުގެ މަސައްކަތް ކުރަމުންދާކަމަށް ސްޓޭޓް މިނިސްޓަރ ވިދާޅުވިއެވެ. އަދި މި ޕޮލިސީގެ ފައިނަލް ޑްރާފްޓް މިއަހަރުގެ ނިޔަލަށް އެކުލަވާލެވޭނެކަމަށް އުންމީދުކުރައްވާކަމަށް ވިދާޅުވިއެވެ.

ޗައިލްޑް ޕްރޮޓެކްޝަން ސްޕެޝަލިސްޓް މުހައްމަދު ނައީމް ވިދާޅުވީ ޤާނޫނު މުރާޖާކުރާއިރު ޤާނޫނު ތަންފީޒްކުރުމުގައި ކުރެވިފައި ހުރިކަންކަން ބެލުމަކީ މުހިއްމުކަމެއްކަމަށެވެ. އަދަ އެ މަސައްކަތް ކުރުމުގައި ދިމާވެފައިވާ ގޮންޖެހުންތައް ބަލަންޖެހޭކަންވެސް ފާހަގަކުރެއްވިއެވެ.

"ޤާނޫނެއް ހަދާފައި ތަންފީޒްކުރުން އެންމެ އުނދަގޫކަމަކަށް ވަނީ. އެހެންވީމަ ތަންފީޒްކުރުމުގައި ކޮންކަހަލަ ގޮންޖެހުންތަކެއްތީ ދިމާވެފައި ހުރީ. ކީއްވެގެންތޯ އެ ގޮންޖެހުންތައް ދިމާވަނީ. އެކަމަށް ބަލާލުން މުހިއްމު."ޗައިލްޑް ޕްރޮޓެކްޝަން ސްޕެޝަލިސްޓް މުހައްމަދު ނައީމް ވިދާޅުވިއެވެ.

ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ އެންމެ މުހިއްމު މަޤުޞަދަކީ، ޤާނޫނުއަސާސީއާއި ކުޑަކުދިންގެ ޙައްޤުތަކާބެހޭ ބައިނަލްއަޤުވާމީ މުޢާހަދާއަށް ރިޢާޔަތްކޮށް، ދިވެހިރާއްޖޭގައި ކުޑަކުދިންގެ ޙައްޤުތައް ރައްކާތެރިކޮށްދީ ކަށަވަރުކޮށްދިނުމެވެ. އަދި ކުޑަކުދިންނަށް އަޅައިލުމާއި ރައްކާތެރިކަން ފޯރުކޮށްދިނުމުގައްޔާއި ކުޑަކުދިންގެ ޙައްޤުތައް ރައްކާތެރިކުރުމުގައި ޢާއިލާއާއި މައިންބަފައިންނާއި ބެލެނިވެރިންނާއި މުޖުތަމަޢާއި ދައުލަތާއި އެހެނިހެން ފަރާތްތަކުގެ ޒިންމާ ކަނޑައެޅުމާއި، އިޖުތިމާޢީ ރައްކާތެރިކަމާއި އެހީތެރިކަން ބޭނުންވާ ކުދިންނަށާއި އެ ކުދިންގެ ޢާއިލާތަކަށް އެ އެހީތެރިކަމާއި އެއްބާރުލުން ފޯރުކޮށްދިނުމަށް މަގުފަހިކޮށްދިނުން ވެސް މި ޤާނޫނުގެ މަޤްޞަދުތަކުގެ ތެރޭގައި ހިމެނެއެވެ.