ފަލަސްޠީނުން ހިންގާ ހުޅަނގު އައްސޭރީގެ ސަރަޙައްދުގެ ބިމެއް ޔަހޫދީން ފޭރިގަންނަނީ

ފަލަސްޠީނުން ހިންގާ ހުޅަނގު އައްސޭރީގެ ސަރަޙައްދުގެ ބިމެއް ޔަހޫދީން ފޭރިގަންނަނީ ޔަހޫދީން އިސްތިޢުމާރުކޮށްފައިވާ ހުޅަނގު އައްސޭރީގައި ފަލަސްޠީނުގެ އާންމުންގެ މިލްކިއްޔާތުގައިވާ ބިމެއް ފޭރިގަތުމަށް ޔަހޫދީން އަމުުރުކޮށްފައިވާތީ އދން އެ ކަމާ މެދު ކަންބޮޑުވުން ފާޅުކޮށްފިއެވެ.

ޔަހޫދީން އެ ބިން އަތުލުމަށް ނިންމާފައި ވަނީ ހުޅަނގު އައްސޭރީގައި ޔަހޫދީން އާބާދުވުމަށް ތަރައްޤީކުރުމަށް ނިންމާފައިވާ ދެ އަވަށެއް ގުޅުވައިލުމަށެވެ. އެ ބިން ހުންނަނީ ފަލަސްޠީނުން ހިންގާ އަދި ސަލާމަތީ ކަންކަން ބަލަހައްޓާ އޭރިއާ އޭގެ ސަރަޙައްދެއްގައެވެ.

އދގެ ސަލާމަތީ މަޖިލީހުގައި ވާހަކަ ދައްކަވަމުން މެދުއިރުމަތީގެ ޞުލްޙައިގެ މަރުހަލާތަކާ ގުޅޭ ކަންކަން ބަލަހައްޓަވައި އދގެ ޚާއްޞަ ކޯޑިނޭޓަރު، ރާމިޒް އަލަކްބަރޮވް ވިދާޅުވީ ޔަހޫދީން ފޭރިގަންނަން ނިންމާފައިވާ ބިމަކީ ޖަނީންގެ ދެކުނުގައި އޮންނަ ޤަބާޠިއްޔާ ކަައިރީގައި އޮންނަ ބިމެެއް ކަމަށެވެ. ޔަހޫދީންގެ ރޭވުމަކީ އެ ބިން ބޭނުންކޮށް، ޔަހޫދީން އާބާދުވާ ދެ އަވަށް ކަމަށްވާ ނޮއާއާއި އެމެކް ޑޮޓާންއާ ދެމެދު މަގެއް އެޅުމެވެ.

1995ވަނަ އަހަރުގެ އޮސްލޯ 2 އެކޯޑުގެ ދަށުން ހުޅަނގު އައްސޭރީގައި އޭރިއާ އޭގެ ގޮތުގައި ކަނޑައަޅާފައިވާ ސަރަޙައްދަކީ ފަލަސްޠީނުގެ މަދަނީ ސަރުކާރުން ހިންގައި އަދި ސަލާމަތީ ކަންކަން ބަލަހައްޓާ ސަރަޙައްދެކެވެ. އެ އެކޯޑުގެ ދަށުން ހުޅަނގު އައްސޭރި ތިން ޒޯނަކަށް ބަހާފައިވާއިރު، އޭރިއާ ބީއަކީ ފަލަސްޠީނުން ހިންގާ، ޔަހޫދީން ސަލާމަތީ ކަންކަން ބަލަހައްޓާ ސަރަޙައްދެެވެ. އޭރިއާ ސީއަކީ ޔަހޫދީންގެ ފުރިހަމަ ބާރުގެ ދަށުގައި އޮންނަ ސަރަޙައްދެވެ.

އަލަކްބަރޮވް ވިދާޅުވީ މިއީ ޔަހޫދީ ވަޒަންވެރިންނަށް ބޭނުންވާ ބިނާރު ޤާއިމް ކުރުމަށް އޭރިއާ އޭގެ ސަރަަޙައްދެއް ޔަހޫދީން ފޭރިގަންނަ ފުރަތަމަ ފަހަރު ކަމަށެވެ. އޭނާ ވިދާޅުވީ ޔަހޫދީން އާބާދުވެފައިވާ ސަރަޙައްދުތައް ފުޅާކޮށް އެ ސަރަޙައްދުތަކުގައި ޔަހޫދީންގެ ބިނާރު ޤާއިމް ކުރުމަކީ ހުޅަނގު އައްސޭރީގެ ބިންތައް އިތުރަށް ބައިބައިކޮށްލައި، ފަލަސްޠީނުގެ މިނިވަންކަމާއި އިސްތިޤުލާލު ދެމެހެއްޓުމަށް ހުރަސްއެޅޭނެ ކަމެއް ކަމަށެވެ. ޔަހޫދީން އާބާދުވާ ސަރަޙައްދުތައް ފުޅާ ކުރަމުން ދަނީ ބައިނަލްްއަޤްވާމީ ޤާނޫނާ ޚިލާފަށް ކަމަށްެ ވެސް އޭނާ ވިދާޅުވެފައިވެއެވެ. ޔަހޫދީ އަވަށްތައް އިތުރުކުރާ ވަރަކަށް ފަލަސްޠީނުގެ ރައްޔިތުންނާ ދެކޮޅަށް ޔަހޫދީ ވަޒަންވެރިންދޭ ހަމަލާތައް އިތުރުވަމުންދާ ކަމަށް ވެސް އޭނާ ފާހަގަކުރައްވާފައިވެއެވެ.

އަލަކްބަރޮވް ވިދާޅުވީ ޖޫން މަހުގެ 13ވަނަ ދުވަހާއި ސެޕްޓެމްބަރު މަހުގެ 18ވަނަ ދުވަހާ ދެމެދު ހުޅަނގު އައްސޭރީގައިއާއި އިރުމަތީ ޤުދުސްގައި ޔަހޫދީން އާބާދުވުމަށް 8،085 ގެ އެޅުމަށް ޔަހޫދީ ސަރުކާރުން ޙުއްދަ ދީފައިވާ ކަމަށެވެ. އެއީ އޭރިއާ ސީގައި 4،570 ގެ އަދި އިރުމަތީ ޤުދުސްގައި 3،515 ގެއެވެ. ޔަހޫދީ ސަރުކާރުން ވަނީ އޭރިއާ ސީގައި 2،240 ގެ އެޅުމަށް ބީލަން ހުށަހުޅުމަށް ހުޅުވާލައިފައެވެ. އޭގެ ތެރޭގައި އިރުމަރީ ޤުދުސް ކައިިރީގައި އޮންނަ އީ1 ކޮރިޑޯގައި ބިނާކުރާ 1،234 ގެ ހިމެނެއެވެ. އީ1 ސަރަޙައްދަކީ ހުޅަނގު އައްސޭރިއާއި އިރުމަތީ ޤުދުސް ގުޅަވައިދޭ މައި ސަރަަޙައްދަށްވި އިރު، މި ސަރަޙައްދުގައި ޔަހޫދީން ވަޒަންވެރިވުމަކީ އޭގެ ސަބަބުން ބޮޑެތި ގޮންޖެހުންތައް ކުރިމަތިވާނެ ކަމެކެވެ.

އަލަކްބަރޮވް އިތުރަށް ވިދާޅުވީ މިދިޔަ ޖަނަވަރީ މަހުން ފެށިގެން ޔަހޫދީ ވަޒަންވެރިންގެ އަނިޔާވެރި ކަމުގެ ސަބަބުން ފަލަސްޠީނުގެ ތިން އަވަށެއް އެއްކޮށް ހުސްކޮށްފައިވާ ކަމަށެވެ. އެއާއެކު 2023ވަނަ އަހަރުގެ ޖަނަވަރީ މަހުން ފެށިގެން ހުސްކޮށްފައިވާ ފަލަސްޠީނުގެ ރަށްފުށު އަވަށްތަކުގެ އަދަދު ވަނީ 49އަށް އިތުރުވެފައެވެ. އޭނާ ވިދާޅުވީ ފަލަސްޠީނުގެ 536 އިމާރާތެއް ޔަހޫދީން ސުންނާފަތިކޮށްލާފައި ނުވަތަ ފޭރިގަނެފައިވާ ކަމަށެވެ. އޭގެ ސަބަބުން 736 މީހުންނަށް ގެދޮރު ދޫކޮށް ދިޔުމަށް މަޖުބޫރުވެފައިވާ ކަމަށް އޭނާ ވިދާޅުވިއެވެ. އޭގެ ތެރޭގައި 347 ކުޑަކުދިން ވެސް ހިމެނެއެވެ.