އީރާނާ ދެކޮޅަށް އެމެރިކާއިން ފަށާފައިވާ ޣައިރުޤާނޫނީ ހަނގުރާމައިގެ ސަބަބުން ހުރްމުޒް ކަނޑުއޮޅި ބަންދުވުމާ ގުޅިގެން ޢިރާޤަށް ކުރިމަތިވެފައިވާ ގޮންޖެހުންތަކާ ބެހޭގޮތުން، އެ ޤައުމުގެ ބޮޑުވަޒީރު ޢަލީ އަލް-ޒައިދީ އެކުވެރި ދައުލަތްތަކުގެ (އދ) ޢާންމު މަޖިލީހުގައި ވާހަކަފުޅު ދައްކަވައިފިއެވެ. ކަނޑުމަގުން ކުރާ ވިޔަފާރިއާއި ތެޔޮ ބޭރުކުރުން ހުއްޓުމަކަށް އައުމަކީ ޢިރާޤުގެ އިޤުތިޞާދަށް ކުރިމަތިވި ވަރަށް ބޮޑު ހުރަހެއް ކަމުގައި ޒައިދީ ވިދާޅުވިއެވެ. އަދި، ބައިނަލްއަޤުވާމީ ބާޒާރުގައި ތެލުގެ އަގު އުފުލެމުންދާތީ ކަންބޮޑުވާ ކަމުގައި ވެސް އޭނާ ވިދާޅުވިއެވެ.
ހަނގުރާމަ ފެށުނު ފަހުން ޢިރާޤަށް ވަނީ ތެލުގެ އާމްދަނީން 60 ބިލިޔަން ޑޮލަރު ގެއްލިފައެވެ. އަދި ގަލްފުގެ ޤައުމުތަކުގެ މަގުން ބޭރުކުރާ ތެލުގެ ގާތްގަނޑަކަށް %90 ވަނީ ހުއްޓިފައެވެ. ދައުލަތުގެ ބަޖެޓުގެ %90 ތެލުގެ އާމްދަނީއަށް ބަރޯސާވާތީ، މުވައްޒަފުންނަށް މުސާރަ ދިނުމަށް ސަރުކާރަށް ވަނީ ދަތިތަކާ ކުރިމަތިލާން ޖެހިފައެވެ. މި ކަމުގެ ސަބަބުން ވެރިރަށް ބަޣުދާދުގައި ރައްޔިތުން ވަނީ މުޒާހަރާ ކުރަން ފަށައިފައެވެ. މި ދަރަނި ކުޑަކުރުމަށް ސަރުކާރުން އަޅަން އުޅޭ ފިޔަވަޅުތަކަށް އާންމުންގެ ތާއީދެއް ނެތް ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ތެޔޮ އެކްސްޕޯޓުކުރާ މަގުތައް އިތުރުކުރުމަށް ޢިރާޤުން މިހާރު ދަނީ މަސައްކަތް ކުރަމުންނެވެ. މި ގޮތުން ތުރުކީވިލާތާ ދެމެދު އަޅާފައިވާ ހޮޅިލައިނުން ދުވާލަކު ގާތްގަނޑަކަށް 750،000 ފީފާގެ ތެޔޮ ބޭރުކުރުމަށް އެއް އަހަރުގެ އެއްބަސްވުމެއްގައި ވަނީ ސޮއިކޮށްފައެވެ. މީގެ އިތުރުން، ސޫރިޔާއާއި އުރުދުން މަގުން ތެޔޮ ފޮނުވުމުގެ ވިސްނުން ގެންގުޅުނު ނަމަވެސް، މިއީ މި ވަގުތަށް ޢަމަލީ އަދި އަވަސް ޙައްލެއް ނޫން ކަމުގައި ސަލާމަތީ ދާއިރާގެ ދާރިސްސަރްމަދު އަލް-ބަޔާތީ ވިދާޅުވިއެވެ.
ހުރްމުޒް ކަނޑުއޮޅީގައި އުޅަނދުފަހަރަށް ދޭ ހަމަލާތަކާހުރެ ތެޔޮ ގަންނާނެ ބަޔަކު ހޯދުމަށް ޢިރާޤަށް ދަތިވެފައިވާ ކަމަށް ވެސް މަސްރަޙު ދިރާސާކުރާ ފަރާތްތަކުން ބުނެއެވެ. ޢިރާޤުން ބޮޑެތި ޑިސްކައުންޓްތައް ދިން ނަމަވެސް، ކުވައިތާއި ޤަޠަރުން 35 އެމެރިކާ ޑޮލަރާ ހަމައަށް އަގުހެޔޮކުރާތީ ވާދަވެރިކަން ވަނީ އިންތިހާއަށް ބޮޑުވެފައެވެ. ޢިރާޤުގެ ތެލާ ބެހޭ ވަޒީރު ބާސިމް މުޙައްމަދު ޚުޟައިރު ވިދާޅުވީ، ކަނޑުއޮޅީގެ ޙާލަތު އޮތްގޮތުން އެެއްވެސް ޔަޤީންކަމެއް ނެތް ކަމުގައެވެ. އެހެންކަމުން، ޢިރާޤުގެ އިޤުތިޞާދަށް އޮތް ހަމައެކަނި ދެމެހެއްޓެނިވި ޙައްލަކީ ހުރްމުޒް ކަނޑުއޮޅީގެ ސަލާމަތްތެރިކަން ކަށަވަރުކުރުން ކަމުގައި ވެސް އޭނާ ވިދާޅުވިއެވެ.