ޔަހޫދީން އިސްތިޢުމާރުކޮށްފައިވާ ފަލަސްޠީނުގެ ހުޅަނގު އައްސޭރި ހަފްތާއެއްގެ މުއްދަތަށް އެއްކޮށް ބަންދުކުރުމަށް ޔަހޫދީން ވަނީ ނިންމާފައެވެ. ޔަހޫދީން ފާހަގަ ކުރާ ޚާއްޞަ ޗުއްޓީއަކާ ގުޅުވައި ހުޅަނގު އައްސޭރި ބަންދުކޮށްފައި ވަނީ އޮކްޓޯބަރު މަހުގެ 3ވަނަ ދުވަހާ ހަމައަށެވެ. އޭގެ ސަބަބުން އެ ސަހަރުގައި ދިރިއުޅޭ ފަލަސްޠީނުގެ ރައްޔިތުންނަށް ވަނީ އެއްތަނުން އަނެއް ތަނަށް ދަތުރުކުރުމުގައި ބޮޑެތި ދަތިތަކާ ކުރިމަތިލާން ޖެހިފައެވެ.
ހުޅަނގު އައްސޭރި ބަންދުކުރުމުގެ ކުރިން ވެސް ހުޅަނގު އައްސޭރީގެ އެކި ސަރަޙައްދުތަކުގައި ޔަހޫދީން ޤާއިމްކޮށްފައިވާ އެތައް ސަތޭކަ ޗެކްޕޮއިންޓުތަކާއި ހުރަސްތަކުގެ ސަބަބުން ފަލަސްޠީނުގެ ރައްޔިތުން ދިޔައީ ގިނަ ދަތިތަކަކާ ކުރިމަތިލަމުންނެވެ. މިހާރު ޗެކްޕޮއިންޓުތަކާއި ހުރަސްތައް އިތުރަށް ވަރުގަދަކޮށްފައިވާއިރު، އޭގެ ސަބަބުން އިރުމަތީ ޤުދުސްގައި ހުންނަ މުޤައްދަސް މަސްޖިދުލް އަޤްޞާއަށާއި އަލް ޚަލީލްގައި ހުންނަ އިބްރާހިމީ މިސްކިތަށް ދިޔުމަށް ވެސް ވަނީ ހުރަސްއެޅިފައެވެ.
ރާމަاللهއާއި އަލް-ބީރު ގަވަރުނޭޓުގައި ޔަހޫދީ ސިފައިން ވަނީ މަގުތައް ބަންދުކޮށް ތުރްމޫސްޢިއްޔާއާއި ޢަބޫދުއާއި ނަބީ ޞާލިޙްއާއި އަޠާރާއާއި ޠައިބާއަށް ވަދެވޭ މަގުތައް ބަންދުކޮށްފައެވެ. އޭގެ އިތުރުން ޔަބްރޫދުގެ ޢައިން ސިންޔާއާއި ޖަބަޢުގައި އުޅަނދުފަހަރާއި އައިޑީ ކާޑު ބަލައި ފާސްކުރުމަށް އިތުރު ޗެކްޕޮއިންޓުތައް ޤާއިމްކޮށްފައިވެއެވެ.
ހުޅަނގު އައްސޭރި ބަންދުކުރުމާ ގުޅިގެން ޔަހޫދީ ދައުލަތުގައި ވަޒީފާ ޢަދާ ކުރުމުގެ ޙުއްދަ އޮތް ފަލަސްޠީނުގެ ރައްޔިތުންނަށް އެ ފުރުޞަތު ވެސް ވަނީ ގެއްލިފައެވެ. ކޮންމެހެން މުހިންމު ވަޒީފާއެއް ނެތް ނަމަ ހުޅަނގު އައްސޭރީގައި ޤާއިމްކޮށްފައިވާ ޔަހޫދީންގެ ސިނާޢީ ސަރަޙައްދުތަކުގައި ވަނުމުގެ ޙުއްދައެއް ނޯވެއެވެ.
2023ވަނަ އަހަރުގެ އޮކްޓޯބަރު މަހު ޔަހޫދީން ޣައްޒާއަށް ޢުދުވާނީ ހަމަލާތައް ދޭން ފެށުމުގެ ކުރިން ފަލަސްޠީނުގެ ގާތްގަނޑަކަށް 160،000 މީހުން ދިޔައީ ޔަހޫދީންނަށް މަސައްކަތް ކޮށްދެމުންނެވެ. ނަމަވެސް ހަނގުރާމައިގެ މި ޙާލަތުގައި އެ ޢަދަދު ވަނީ ބޮޑުތަނުން ދަށަށް ގޮސްފައެވެ. ޙުއްދަ އޮތް މީހުންނަށް ވެސް ޔަހޫދީ ދައުލަތަށް ނުވަދެވޭނެ ކަަަމަށް ކަނޑައެޅުމުން 2024ވަނަ އަހަރުގެ މެދުތެރޭގައި އެ ޢަދަދު ވަނީ 27،300އަށް މަދުވެފައެވެ. 2023ވަނަ އަހަރުގެ ސެޕްޓެމްބަރު މަހުގައި ހުޅަނގު އައްސޭރީގައި ވަޒީފާ ނެތް މީހުންގެ ނިސްބަތް ހުރީ 12.7 އިންސައްތައިގައެވެ. ނަމަވެސް އޭގެ އަހަރެއް ފަހުން އެ ނިސްބަތް ވަނީ 30.7 އިންސައްތައަށް އިތުރުވެފައެވެ.
ހުޅަނގު އައްސޭރީގެ އެކި ސަރަޙައްދުތަކުގައި ޔަހޫދީން 300އަށްވުރެ ގިނަ ޗެކްޕޮއިންޓު ޤާއިމްކޮށްފައިވާ ކަމަށް އދގެ އޯސީއެޗްއޭއިން ވަނީ ބުނެފައެވެ. މިދިޔަ ޑިސެމްބަރު މަހު އެ ޗެކްޕޮއިންޓުތައް ވެސް ހިމެނިފައި ވަނީ ހުޅަނގު އައްސޭރިއާއި އިރުމަތީ ޤުދުސްގައި ދިރިއުޅޭ 3.4 މިލިއަން ފަލަސްޠީނުގެ ރައްޔިތުންނަށް އެއް ސަރަޙައްދުން އަނެއް ސަރަޙައްދަށް ދަތުރުކުރުން ދަތިކުރުމަށް އެކި ސަރަޙައްދުތަކުގައި ބަހައްޓާފައިވާ 925 ހުރަހުގެ ތެރޭގައެވެ.
ޔަހޫދީން ޤާއިމްކޮށްފައިވާ ޗެކްޕޮއިންޓުތަކުގެ ތެރޭގައި 24 ގަޑިއިރު އެ ތަނުގައި މުވައްޒަފުން ޤާއިމްވެ ތިބޭ 89 ޗެކްޕޮއިންޓެއް ހުރެއެވެ. އަދި ދާއިމީ ގޮތަކަށް މުވައްޒަފުން އެ ތަނުގަައި ޤާއިމްވެ ނުތިބޭ 218 ޗެކްޕޮއިންޓެއް ހިމެނެއެވެ. އޭގެ އިތުރުން މަގުތަކުގައި 232 ގޭޓު ޤާއިމްކޮށްފައިވެއެވެ. އޭގެ ތެރެއިން އާންމު ގޮތެއްގައި 159 ގޭޓެއް ހުންނަނީ އަބަދުހެން ބަންދުކޮށްފައެެވެ. އަދި ފާރުތައް އިމާރާތްކޮށް ނުވަތަ މަަގު ބަންދުކޮށް 114 ހުރަސް ޤާއިމްކޮށްފައިވެއެވެ.
ޗެކްޕޮއިންޓުތަކުގެ ސަބަބުން ފަލަސްޠީނުގެ ރައްޔިތުންނަށް ވަނީ އެއް އަވަށުން އަނެއް އަވަށަށް ދަތުރުކުރުމަށާއި ބޭސް ފަރުވާ ހޯދުމަށް ވެސް ދަތިވެފައެވެ. ޔަހޫދީންގެ މައިގަނޑު ޗެކްޕޮއިންޓުތަކަކީ ރާމަاللهއާއި އިރުމަތީ ޤުދުސްއާ ދެމެދު އޮންނަ ޤަލަންދިޔާ ޗެކްޕޮއިންޓާއި، ބައިތު ލަހުމްއާއި ޤުދުސްއާ ދެމެދު އޮންނަ ޗެކްޕޮއިންޓް އާއި، ޢިޔާލް ޗެކްޕޮއިންޓާއި ޠައިބާ ޗެކްޕޮއިންޓާއި ތަރްޤޫމިޔާ ޗެކްޕޮއިންޓެވެ.