260 އެގްޒިބިޓަރުންނާއެކު 20 ވަނަ ހޮޓެލް އޭޝިއާ އެގްޒިބިޝަން ފަށައިފި

260 އެގްޒިބިޓަރުންނާއެކު، 20 ވަނަ ހޮޓެލް އޭޝިއާ އެގްޒިބިޝަން މިއަދު ފަށައިފިއެވެ.

މިއެގްޒިބިޝަން ހުޅުވައިދެއްވުމަށްފަހު، ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންވަނީ އެގްޒިބިޝަންގެ ސްޓޯލްތަކަށް ޒިޔާރަތްކުރައްވައި، އައުޓްލެޓްތަކުން ފޯރުކޮށްދޭ ޚިދުމަތްތައް ބައްލަވާލައްވާފައެވެ. ވަޒީރު ވިދާޅުވީ ބޭރުގެ ސަޕްލަޔަރުންނާއި، ހޮޓެލް އޮޕަރޭޓަރުންގެ އިތުރުން ދާއިރާގެ ފަންނީ މީހުންގެ ބައިވެރިވުން މި އެގްޒިބިޝަނުން ވަރަށް ރަނގަޅަށް ފެންނަމުންދާކަމަށެވެ. އަދި މިއީ ފަތުރުވެރިކަމުގެ ސިނާއަތްކުރިއެރުވުމުގައި މުހިންމު ދައުރެއް އަދާކުރާ އެގްޒިބިޝަނެއްކަމަށް ވަޒީރު ވިދާޅުވިއެވެ.

"މިއީ ވަރަށް އެސްޓަބްލިޝްޑް މާކެޓެއްތެރެއިން ކުރައްވާކަމެއް. މި އެގްޒިބިޝަނުން ޓޫރިޒަމަށް އައު ދޮރުތައް އެބަ ހުޅުވޭ. އައު ޕްރޮޑަކްޓްތަކާއި އައު ކަންކަން އެބަ ލޯންޗްކުރެވޭ." ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވިއެވެ.

ސެޕްޓެންބަރ 28-30އަށް، ކޮންމެ ދުވަހަކު ހެނދުނު 10އިން އިރުއޮއްސި 7ޖަހަންދެން މި އެގްޒިބިޝަން ކުރިއަށްދާނެއެވެ. ރާއްޖޭގެ ފަތުރުވެރިކަމުގެ ދާއިރާއަށް ޚާއްސަކޮށްގެން ބާއްވާ މި އެގްޒިބިޝަންގައި މި އަހަރު 45 ޤައުމުން ބައިވެރިވެއެވެ. އަދި 200 ކުންފުނިން މި ފަހަރުގެ އެގްޒިބިޝަންގައި ބައިވެރިވެއެވެ. އޭގެތެރޭގައި ރާއްޖެއާއި ރާއްޖެއިން ބޭރުގެ ކުންފުނިތައް ހިމެނެއެވެ. މިފަހަރުގެ އެގްޒިބިޝަންގައި ވެސް، ހޮސްޕިޓަލިޓީ ދާއިރާ އާއި ރިސޯޓް ސަޕްލައި އަދި ކަލިނަރީ ދާއިރާގެ ސްޓޭކް ހޯލްޑަރުން ބައިވެރިވެއެވެ.

އެގްޒިބިޓަރުން ފާހަގަކުރިގޮތުގައި މިއީ ފަތުރުވެރިކަމުގެ ދާއިރާއަށް ބޭނުންވާ ޒަމާނީ އަދި ފެންވަރު ރަނގަޅު ވަސީލަތްތައް ފުރިހަމަކުރުމަށް ބޭނުންވާ ވިޔަފާރިވެރިންނަށް ލިބޭ ވަރަށް ރަނގަޅު ފުރުސަތެކެވެ. އަދި އެ ސިނާއަތުގެ މެދުގައި ގުޅުން ބަދަހިކުރުމަށާއި، އައު ޕްރޮޑްކަޓްތައް ލޯންޗްކުރުމަށްވެސް މިއީ މުހިންމު އެގްޒިބިޝަނެއްކަމަށް އެފަރާތްތަކުން ފާހަގަކުރެއެވެ.

ރިސޯޓް އޮޕަރޭޓަރުންނާއި، ވިޔަފާރިވެރިންނާއި، ޝެފުން ފަދަ ފަރާތްތަކުގެ ބައިވެރިވުމާއެކު ކުރިއަށްގެންދާ މި އެގްޒިބިޝަނަކީ ރާއްޖޭގައި ބާއްވާ އެންމެ ކާމިޔާބު އެއް އެގްޒިބިޝަނެވެ. މި އެގްޒިބިޝަން ބާއްވަމުންދަނީ 2008ވަނަ އަހަރުން ފެށިގެންނެވެ.