ސުޒެއިރުއަށް ސަސްޕެންޝަނަކާއި ޖޫރިމަނާގެ އަދަބެއް

ދިވެހި ޕްރިމިއަރ ލީގުގެ މެޗެއްގެ ތެރެއިން މާރާމާރީ ހިންގި މައްސަލައިގައި މާޒިޔާ ސްޕޯޓްސް އެންޑް ރެކްރިއޭޝަނުގެ އެސިސްޓަންޓް ކޯޗު އަޙްމަދު ސުޒެއިރަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ފިޔަވަޅު އަޅައިފިއެވެ.

ސުޒެއިރުއަށް ފިޔަވަޅު އަޅާފައި ވަނީ، މިމަހުގެ 17ވަނަ ދުވަހުގެރޭ ގަލޮޅު ދަނޑުގައި ނިއުރޭޑިއަންޓް ސްޕޯޓްސް ކުލަބާއި މާޒިޔާ ބައްދަލުކުރި މެޗުގެ ތެރެއިން ހިނގައިދިޔަ ހަމަނުޖެހުމުގައި ސުޒެއިރު، ނިއުގެ އެސިސްޓަންޓް ކޯޗު ލޫސިއާނޯގެ މޫނުމަތީގައި ޖެހި މައްސަލައިގައެވެ.

މި މައްސަލަ ނިއުރޭޑިއަންޓުގެ ފަރާތުން އެފްއޭއެމްގެ ޑިސިޕްލިނިރީ ކޮމިޓީއަށާއި ދިވެހި ފުލުހުންގެ ޚިދުމަތަށް ވެސް ހުށަހެޅިއެވެ. އެހެންނަމަވެސް ފަހުން ނިއުއިން ވަނީ ފުލުހަށް ހުށަހެޅި މައްސަލަ ނަގާފައެވެ.

މި މައްސަލަ ބެލުމަށްފަހު އެފްއޭއެމް އިން ނެރުނު ބަޔާނެއްގައި ބުނީ، އެ މެޗުގައި ކުޅިވަރުގެ ރޫހާ ޚިލާފަށް ހިނގައިދިޔަ ކަންތައްތައް ބެލުމަށްފަހު، ސުޒެއިރަށް ފިޔަވަޅު އަޅަން ނިންމާފައިވާ ކަމަށެވެ.

އެގޮތުން އެޅި ފުރަތަމަ ފިޔަވަޅަކީ އެފްއޭއެމްގެ ޑިސިޕްލިނަރީ އެންޑް އެތިކްސް ކޯޑުގެ 34 ވަނަ މާއްދާގެ ދަށުން ސުޒެއިރު 10 މެޗަށް ސަސްޕެންޑު ކުރުމެވެ. ދެވަނަ ފިޔަވަޅެއްގެ ގޮތުގައި ސުޒެއިރު 15،000 ރުފިޔާއިން ޖޫރިމަނާކުރުމަށް ވެސް ވަނީ ނިންމާފައެވެ.

ޖޫރިމަނާގެ ފައިސާ 15 ދުވަހުގެ ތެރޭގައި ދައްކަން ޖެހޭނެކަމަށް ވެސް އެފްއޭއެމް އިން ވަނީ ބުނެފައެވެ.

މީގެއިތުރުން، މި މައްސަލައިގައި ކޮމިޓީން ނިންމާފައިވާ ނިންމުން އެޕީލްކުރާނަމަ އެކަން ތިން ދުވަހުގެ ތެރޭގައި އެފްއޭއެމް އަށް އަންގަންޖެހޭނެކަމަށް ވެސް އެ އެސޯސިއޭޝަނުން ނެރުނު ބަޔާނުގައި ބުނެފައިވެއެވެ.

ނިއު އާއި މާޒިޔާ ކުޅުނު އެ މެޗުގައި ހިނގަދިިޔަ ހަމަނުޖެހުމެއްގެ ސަބަބުން، ހަތް ވަރަކަށް މިނިޓަށް މެޗުގެ ކުޅުން މެދުކަނޑާލަން ޖެހުނެވެ.

މެޗުގެ 68ވަނަ މިނެޓުގައި މާޒިޔާގެ ޢަބްދުﷲ ލޫތަށް، ނިއުގެ އިބްރާޙީމް މައިސާން ކުރި ފައުލަކާ ގުޅިގެން ރެފްރީ ކުޅުން މެދުކަނޑާލަން ކަށިގަނޑު ފުމުނު ފަހުން، ނިއުގެ ޢަބްދުﷲ ބިލިޓީ ފޮނުވާލި ބޯޅައެއް ލޫތުގެ ގައިގައި ޖެހުނު ހިސާބުންނެވެ.

މިއާއިއެކު ބިލިޓީއާއި ލޫތު ކުރިމަތިލާން ދިޔަވަގުތު ނިއުގެ އީތަން އިބްރާޙީމް ޒަކީ، ލޫތުގެ ގައިގައި އަތްއަޅައި ކޮށްޕާލުމުން، މާޒިޔާގެ ޙަސަން ޝިފާޒް ވެސް އެ ހަމަނުޖެހުމުގައި ބައިވެރިވިއެވެ. އަދި ފަހުން އެހެން ކުޅުންތެރިންނާއި ދެ ޓީމުގެ އޮފިޝަލުންވެސް، ހަމަނުޖެހުން ހިންގުމުގައި އަދި ހުއްޓުވުމުގައިވެސް ބައިވެރިވެފައިވެއެވެ.

މި ހަމަނުޖެހުންތަކުގެ ތެރެއިން މާޒިޔާގެ އެސިސްޓެންޓް ކޯޗު ސުޒެއިރު، ނިއުގެ އެސިސްޓަންޓް ކޯޗު ލޫސިއާނޯގެ މޫނު މަތީގައި ޖަހާ މަންޒަރު ދައުރުވަމުންދާ ބައެއް ވީޑިއޯތަކުން ފެނެއެވެ.