ދުންތަރި މުބާރާތަށް މިއަހަރުވެސް ބޮޑު ތަރުހީބެއް

ކޮންމެ ރަމަޟާން މަހެއްގައިވެސް އެންމެ ފޯރީގައި ކުރިޔަށް ގެންދާ ޓޭބަލް ޓެނިސް މުބާރާތް، ދުންތަރި މަނިކު މެމޯރިއަލް ޓޭބަލް ޓެނިސް ޗެމްޕިއަންޝިޕަށް މިއަހަރުވެސް ބޮޑު ތަރުހީބެއް ލިބިފައިވާ ކަމަށް ޓޭބަލް ޓެނިސް އެސޯސިއޭޝަން (ޓީޓީއޭއެމް) އިން ބުނެފިއެވެ.

މުބާރާތް އިންތިޒާމު ކުރުމުގައި އިސްކޮށް ހަރަކާތްތެރިވާ އެސޯސިއޭޝަނުގެ އޮފިޝަލް، އާއިޝަތު އަލީފާ ބުނީ މިއަހަރުގެ މުބާރާތުގައި 13 ޓީމު ވާދަކުރާއިރު ޖުމްލަ 73 ކުޅުންތެރިން ބައިވެރިވެފައިވާ ކަމަށެވެ.

ޓީޓީ އެސޯސިއޭޝަނާއި ދުންތަރި އާއިލާއިން ގުޅިގެން ކޮންމެ ރަމަޟާން މަހެއްގައި ބާއްވާ، ދުންތަރި މުބާރާތަކީ އިޖްތިމާއީ ކަމެއް ގޮތަށް ރާވާ ހިންގާ މުބާރާތެކެވެ. މި މުބާރާތުގެ މަޤްސަދަކީ ޓީޓީ އާއިލާގެ މެދުގައި ގުޅުން ބަދަހި ކުރުމެވެ.

މި އަހަރު ކުރިޔަށް މިދަނީ، ކުރީގެ ޓޭބަލް ޓެނިސް ޗެމްޕިއަން މަރުހޫމް ދުންތަރި އިބްރާހިމް މަނިކުގެ ހަދާނުގައި ބާއްވާ މިފަދަ 13 ވަނަ މުބާރާތެވެ.

ޓީޓީ އެސޯސިއޭޝަންގެ ހުރިހާ ކުޅުންތެރިން ކަހަލަ ގޮތަކަށް ބައިވެރިވެގެން ބާއްވާ މި މުބާރާތުގައި މޮޅުވާ ޓީމަށް މެޑަލާއި ޓްރޮފީ ދިނުމަށް ހަމަޖެހިފައިވާއިރު، މިއީ ކުރީގެ މަޝްހޫރު ޓޭބަލް ޓެނިސް ޗެމްޕިއަނުންނާއި ރާއްޖޭގައި އުފެދުނު އެކި ފަންތީގެ ކުޅުންތެރިން ފެނިގެންދާ މުބާރާތެކެވެ.

މިއަހަރުގެ މުބާރާތް ކުރިޔަށްދާނީ މާޗް 3-8 މާޗްގެ ނިޔަލަށް ހެންވޭރު މުނިއުފާގައި ހުންނަ މާލޭ ޓީޓީ ހޯލްގައެވެ.