ޔޫރަޕުގެ އެންމެ ޝަރަފުވެރި ކުލަބު ފުޓުބޯޅަ މުބާރާތް، ޔޫއެފާ ޗެމްޕިއަންސް ލީގުގެ ކުއާޓަރ ފައިނަލުގައި، ބާސެލޯނާއާ ދެކޮޅަށް ކުޅުން އެއީ ވަރަށް ބޮޑު އުއްމީދެއްކަމަށް އެތުލެޓިކޯ މެޑްރިޑުގެ ކޯޗު ޑިއޭގޯ ސިމިއޯނޭ ބުނެފިއެވެ.
ސިމިއޯނޭ މިހެން ބުނެފައި ވަނީ، ކޮޕާ ޑެލްރޭގެ ސެމީ ފައިނަލުގައި ބާސެލޯނާގެ މައްޗަށް އެގްރިގޭޓުން ކުރި ހޯދި މެޗަށްފަހު މީޑިއާއާ ވާހަކަދައްކަމުންނެވެ.
ސެމީ ފައިނަލުގެ ފުރަތަމަ ލެގުގައި ސިމިއޯނޭގެ އެތުލެޓިކޯއިން ވަނީ ބާސާގެ މައްޗަށް 0-4 ގެ ނަތީޖާއަކުން ކުރިހޯދާފައެވެ. އެހެންނަމަވެސް ދެވަނަ މެޗުގައި ބާސާގެ ކުޅުންތެރިން ދެއްކި މޮޅު ކުޅުމަށް ގިނަބައެއްގެ ތައުރީފު އޮހެމުންދާއިރު އެ މެޗުން ބާސާ ވަނީ 0-3 އިން މޮޅުވެފައެވެ.
ފައިނަލުގެ ޖާގައެއް އެތުލެޓިކޯއިން ހޯދީ 3-4 ގެ ނަތީޖާއަކުން ކުރިހޯދައިގެންނެވެ.
މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަދައްކަމުން ސިމިއޯނޭ ވަނީ ބާސާގެ ކުޅުންތެރިންނަށް ވަރަށް ބޮޑަށް ތައުރީފުކޮށްފައެވެ. އަދި އެ ޓީމުގެ މޮޅުކަމުގެ ވާހަކަ، އެ ޓީމުގެ ކޯޗު، ހަންސީ ފްލިކްއާ ވެސް ހިއްސާކުރިކަމަށް ސިމިއޯނޭ ވަނީ ބުނެފައެވެ.
ބާސާގެ ކުޅުންތެރިންނަކީ ކިހާ ފެންވަރެއްގެ، ކިހާ މޮޅު ކުޅުންތެރިންތަކެއްކަން ވަރަށް ރަނގަޅަށް އެނގޭ ކަމަށާއި، ދުވަސްތަކަކަށްފަހު ޕެޑްރީ އާއި ރަފީނިއާގެ މޮޅު ކުޅުން އަލުން ފެންނަން ފަށައި، ބާސާގެ ޓެމްޕޯ މުޅިން އެހެން ހަރުފަތަކަށް އުފުލިގެން ދިޔަތަން ފެނިގެންދިޔަ ކަމަށް ވެސް ސިމިއޯނޭ ބުންޏެވެ.
މީގެއިތުރުން، ފްލިކްއާ ވާހަކަދައްކައި، އޭނާގެ އިރުޝާދުގެ ދަށުން ބާސާގެ ކުޅުންތެރިން ދައްކާ މޮޅު ކުޅުމަށް ތައުރީފުކޮށްފައިވާނެ ކަމަށާއި، އުއްމީދަކީ ޗެމްޕިއަންސް ލީގުގެ ކުއާޓަރ ފައިނަލުގައި ބާސާއާ ދެކޮޅަށް ނުކުންނަންޖެެހުން ކަމަށް، ފްލިކް ކައިރީގައި ބުނެފައިވާނެކަމަށް ސިމިއޯނޭ ވަނީ ބުނެފައެވެ.
ޗެމްޕިއަންސް ލީގުގެ ގަދަ 16 ގެ ގުރު ނަގާފައިވާއިރު، ގަދަ 16 ގައި ބާސާ ނުކުންނާނީ ނިއުކާސަލްއާ ދެކޮޅަށެވެ. އެތުލެޓިކޯ ނުކުންނަން ޖެހެނީ ޓޮޓްނަމް ހޮޓްސްޕަރ އާ ދެކޮޅަށެވެ. އެ ދެ މެޗުން ބާސާއާއި އެތުލެޓިކޯ މޮޅުވެއްޖެނަމަ ކުއާޓަރ ފައިނަލުގައި ވާދަކުރާނީ އެ ދެ ޓީމެވެ.