މޯލްޑިވްސް ނައިޓަކީ ރާއްޖޭގެ ސަޤާފަތް ދައްކުވައިދޭ ޙަރަކާތެއް: ޝިއުރީ

މޯލްޑިވިއަން ނައިޓަކީ ރާއްޖޭގެ ސަގާފަތާއި ރޫހު ދައްކުވައިދޭ މުހިންމު ހަރަކާތެއް ކަމަށް ވިޒިޓް މޯލްޑިވްސް ކޯޕަރޭޝަން، ވީއެމްސީގެ މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވެއްޖެއެވެ.

ޝިއުރީ މިހެން ވިދާޅުވީ، މޯލްޑިވިއަން ނައިޓުގައި ވާހަކަދައްކަވަމުންނެވެ.

ޖަރުމަނުވިލާތުގެ ބާލިންގައި ކުރިއަށްދާ އައިޓީބީ ފެއާގެ ހަވާސާގައި ބޭއްވި "މޯލްޑިވިއަން ނައިޓު"ގައި ވާހަކަދައްކަވަމުން ވިޒިޓް މޯލްޑިވްސް ކޯޕަރޭޝަން، ވީއެމްސީގެ މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވީ، މޯލްޑިވިއަން ނައިޓަކީ ހަމައެކަނި ކަލަންޑަރުގައި އޮންނަ ތާރީޚެއް ނޫން ކަމަށާއި، އެއީ ރާއްޖޭގެ ސަގާފީ މުހިންމު ހަރަކާތެއް ކަމަށެވެ.

ޝިއުރީ ވިދާޅުވީ މި ހަރަކާތަކީ ރާއްޖޭގެ ފޯކްލޯރާއި، ފަންނުވެރިކަމާއި، ކެއުންތަކުގެ ރަހަތައް މެދުވެރިކޮށް ގައުމުގެ ރޫހު ދައްކުވައިދޭ ފުރުސަތެއް ކަމަށެވެ. އަދި ދާދިފަހުން ފްލައިޓްތައް ކެންސަލްވުމާއި އެއާސްޕޭސް ބަންދުވުމުގެ ސަބަބުން ބައެއް ޓީމުތަކާއި ސާމާނު ނައުމުގެ ސަބަބުން މި އަހަރުގެ ހަރަކާތް ކުރީ އަހަރުތަކަށްވުރެ ކުޑަ ނަމަވެސް، ދިވެހިންގެ ސާބިތުކަމާއި މެހެމާންދާރީގެ ވަރުގަދަކަން މި ހަރަކާތުން ފެނިގެންދާ ކަމަށް ޝިއުރީ ފާހަގަކުރެއްވިއެވެ.

"އަހަރުތަކަށްފަހު މި ހަރަކާތް ބޭއްވުނީ. މިފަހަރު ބީއެމްއެލްއާ ގުޅިގެން. މި ނައިޓުގެ ތެރެއިން ހަމަ ވަރަށް ބޮޑަށް ޕާޓްނަރުންގެ މެދުގައި ގުޅުން ބަދަހިވެގެންދާނެ ކަމަށް އަޅުގަނޑަށް ގަބޫލުކުރެވެނީ؛" އެމްޑީ އިބްރާހީމް ޝިއުރީ ވިދާޅުވިއެވެ.

މޯލްޑިވިއަން ނައިޓުގައި ވާހަކަދައްކަވަމުން ވީއެމްސީގެ ޗެއާމަން އަބްދުﷲ ގިޔާސް ވިދާޅުވީ، ވޭތުވެދިޔަ ފަސް އަހަރުގެ ތެރޭގައި ރާއްޖޭގެ ފަތުރުވެރިކަން ދުނިޔޭގެ ފެންވަރުގެ ސިނާޢަތަކަށް ބަދަލުވެފައިވާ ކަމަށެވެ. އަދި 2025 ވަނަ އަހަރަކީ ރާއްޖޭގެ ފަތުރުވެރިކަމުގައި ރެކޯޑް އަހަރެއްކަން ފާހަގަކުރައްވައި، ފަތުރުވެރިކަމުން ލިބުނު އާމްދަނީ 5.5 ބިލިޔަން ޑޮލަރަށް އަރާފައިވާ ކަމަށް އޭނާ ވިދާޅުވިއެވެ.

ގިޔާސް ވިދާޅުވީ، ވޭތުވެދިޔަ އަހަރު ދުނިޔޭގެ ބޮޑެތި ޓުއާ އޮޕަރޭޓަރުންނާއި އެއާލައިންތަކާ ގުޅިގެން ގިނަ މާކެޓިން ކެމްޕޭންތަކެއް ހިންގާފައިވާ ކަމަށެވެ. މި ކެމްޕޭންތަކަކީ ހަމައެކަނި ހޭލުންތެރިކަން އިތުރުކުރުމުގެ ބަދަލުގައި، ނަތީޖާ ނެރުމަށް އަމާޒުކޮށްގެން ހިންގުނު ކާމިޔާބު މަސައްކަތްތަކެއް ކަމަށް އޭނާ ވިދާޅުވިއެވެ.

"މިދިޔަ އަހަރު މި ކުރެވުނު މަސައްކަތްތަކުން އަޅުގަނޑުމެންނަށް ރެކޯޑު އަދަދަކަށް ފަތުރުވެރިން ރާއްޖެއަށް ގެނެވުނު. އަދި ހަމައެއާއެކީ މިއަހަރަށް ބަލާލިކަމުގައިވީނަމަވެސް މިއަހަރުގެ ޖަނަވަރީ މަހު އެކަނިވެސް ރާއްޖެއަށް ރެކޯޑު އަދަދަކަށް ފަތުރުވެރިން ޒިޔާރަތްކުރި. އަދި ފެބްރުއަރީ މަހު އެއްދުވަހެއްގައި އެންމެ ގިނަ އަދަދަކަށް ފަތުރުވެރިން ޒިޔާރަތްކުރި ކަމުގެ ރެކޯޑު ތިން ފަހަރަށް މުގުރާލި." ވީއެމްސީގެ ޗެއަރޕާސަން ވިދާޅުވިއެވެ.

ދިވެހިރާއްޖެއިން ޖަރުމަނަށް ކަނޑައަޅުއްވާފައި ހުންނަވާ ސަފީރު އައިޝަތު ޝާން ޝާކިރު ވިދާޅުވީ، ޖަރުމަނަކީ ރާއްޖޭގެ ފަތުރުވެރިކަމުގެ އެންމެ ގާތް އެއް ބައިވެރިޔާ ކަމަށެވެ. ޖަރުމަނުގެ ފަތުރުވެރިން ރާއްޖެ އިޚްތިޔާރު ކުރަނީ ހަމައެކަނި ޗުއްޓީ ހޭދަކުރުމުގެ މަންޒިލެއްގެ ގޮތުގައި ނޫން ކަމަށާއި، އެއީ ދެ ގައުމުގެ ރައްޔިތުންގެ މެދުގައި އޮތް އިތުބާރާއި ގާތްކަން ރަމްޒުކޮށްދޭ ކަމެއް ކަމަށް ސަފީރު ވިދާޅުވިއެވެ.

އަހަރުތަކަކަށްފަހު މޯލްޑިވިއަން ނައިޓު ކުރިއަށް ގެންގޮސްފައިވާއިރު، މި ހަރަކާތް ވަރަށް ފޯރިގަދަކޮށް މިއަހަރު ވަނީ ކުރިއަށްގެންގޮސްފައެވެ. އެގޮތުން މިއަހަރުވެސް މޯލްޑިވިއަން ނައިޓުގެ ބައިވެރިންގެ މެދުގައި ގުރުއަތުލައިގެން ތަފާތު އެކި އިނާމުތައްވަނީ ދީފައެވެ.