މި 2 އަހަރުތެރޭ ޖަލަށް 400 ގައިދީންގެ ޖާގަ އިތުރުކޮށްފި

މި ދެ އަހަތުގެތެރޭގައި ޖަލަށް އިތުރު 400 ގައިދީންގެ ޖާގަ އިރުކޮށް، ކުރީ ސަރުކާރުގައި މާލެ ޖަލު އުވާލި މައްސަލައިގައި ދޫވި މީހުން އަނބުރާ ޖަލަށް ގެނައުމުގެ މަސައްކަތް ކުރަމުންދާކަމަށް ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.

ވަޒީރު ވިދާޅުވީ ކުރިން ރަނގަޅަށް ހިނގަހިނގާހުރި މާލޭ ޖަލާއި، ކަސްޓޯޑިއަލް ފެސިލިޓީ، ނިމުނު ސަރުކާރުގައި މުޅިން އުވާލާފަވާކަމަށެވެ. ވަޒީރު ވިދާޅުވީ އޭރު ހުރި މާލޭ ޖަލަކީ ރާއްޖޭގައިވެސް އެންމެ ފެންވަރު ރަނގަޅުކޮށް ވަސީލަތްތައް ޤާއިމުކޮށްފަވާ ޖަލުކަން ވަޒީރު ފާހަގަކުރެއްވިއެވެ. އެއީ 350 މީހުންގެ ޖާގައެވެ. ނަމަވެސް އެއާއި އިންވެގެން ސްކޫލެއް އަޅާ، ޖަލު ބަންދުކޮށްފަވާއިރު، ޖަލުގައި ތިބި ގިނަ ޢަދަދެއްގެ މީހުން ދޫވެގެން ދިޔަކަމަށް ވަޒީރު ވިދާޅުވިއެވެ. އަދި 100 މީހުންގެ ޖާގައިގެ ކަސްޓޯޑިއަލް ޖަލު ތަޅާލާ، އެ ޖާގަވެސް މުޅިން ގެއްލުނީކަމަށް އިޙުސާނު ވަނީ ވިދާޅުވެފައެވެ.

އޭރު ހުޅުމާލެ ޖަލުގައި 100 މީހުންގެ ޖާގަ ހެދުމަށް އަޅަން ފަށާފައި އޮތް އިމާރާތަކީވެސް، އެތަށް ގުނަ އަގު ބޮޑުކޮށް ހަވާލުކޮށްފައި އޮތް މަސައްކަތެއްކަމަށް ވިދާޅުވިއެވެ.

450 މީހުން ގައިދުކުރުމުގެ ޖާގަ މުޅިން ގެއްލި، ގިނަ ގައިދީން ދޫކޮށްލާފަވައިރު، މިގޮތަށް ދޫވެފައި ތިބި މީހުން އަނބުރާ ޖަލަށް ގެނައުމުގެ ޖާގަ ހެދުމުގެ މަސައްކަތް ކުރަމުންދާކަމަށާއި، އެކަމުގައި މިހާތަނަށް ބޮޑު ކާމިޔާބީއެއްވެސް ހޯދިފަވާކަމަށް ވަޒީރު ވިދާޅުވިއެވެ.

"އޭރު 100 މީހުންގެ ގޮޅިއެއް ހެދުމަށް 39 މިލިޔަން ރުފިޔާ ހޭދަ ކުރި. އެތައް ދުވަހެއްވީއިރު ޚިދުމަތަކަށް ނާދޭ. މިދިޔަ 4 މަހު ކުރި މަސައްކަތުން 100 މީހުންގެ ޖާގަ ހުޅުމާލޭގައި މިވަނީ ހެދިފައި. 5 މިލިޔަންގެ ބަޖެޓަކުން އެކަން ކުރެވިއްޖެ، ޢަމަލީ މަސައްކަތުގައި ކަރެކްޝަންގެ މުވައްޒަދުންގެ އެހީތެރިކަމާއެކު." ވަޒީރު ވިދާޅުވިއެވެ.

ޖަލުތަކުގެ ޚިދުމަތް ހަރުދަނާކުރުމުގެ ގޮތުން ކުރިން އިދާރާއަށް ގޮސްގެން، އުނދަގުލުން ހޯދަމުން އައި ޚިދުމަތްތައް މިހާރު ކޮންމެ ތާކު ހުރެގެންވެސް އޮންލައިންކޮށް ހޯދޭގޮތަށް ޕޯޓަލްއެއްގެ ޚިދުމަތް ވަނީ ފަށާފައެވެ. އަދި ރާއްޖޭގެ އެންމެ ބޮޑު ޖަލު، މާފުށީ ޖަލުގެ ސެކިއުރިޓީ ހަރުދަނާކުރުމަށް، އެތަނުގައި ބޮޑީ ސްކޭނަރުވެސް މުޅިން އަލަށް ވަނީ ބަހައްޓާފައެވެ.

"ސެކިއުޓީ ބްރީޗްވާ ކަންކަމަށް ޙައްލު ހޯދުމަށް ކުރަމުންދާ މަސައްކަތުގައި، މިހާރު މާފުށީ ޖަލަށް ހަށިގަނޑުގެ ކޮންމެ ތަނެއްގައި ފޮރުވައިގެން ޖަލަށް އެއްޗެހި ވަންދަން މަސައްކަތްކޮށްފިނަމަ އެނގޭނެ. ގައިދީންނާއި، ގައިދީންގެ އާއިލާއާއި ޖަލު ބަލަހައްޓާ މީހުންނަށްވެސް ވަދެވޭނީ ސްކޭން ކޮށްގެން. ޖަލަށް ފޯނު ވައްދާ، ސްކޭމް ކޯލްތައް ހިންގާ މައްސަލައަށް ބޮޑު ޙައްލެއް ލިބޭނެ." ވަޒީރު ވިދާޅުވިއެވެ.

އަތޮޅުތަކުގައި ފުލުހުންގެ ޚިދުމަތް ހަރުދަނާކުރުމުގެ މަސައްކަތުގެ ދަށުން، ޕޮލިސް ޕޯސްޓާއި ސްޓޭޝަން ހިމެނޭހެން 53 އިމާރާތެއްގެ މަސައްކަތްވެސް ދަނީ ކުރިއަށްގެންދަމުންނެވެ. މި ސަރުކާރުން ފެށި 2 އިމާރާތެއްގެ މަސައްކަތް ނިންމާ މިހާތަނަށް ޚިދުމަތަށް ގެނެސްވާއިރު، މިމަހުގެ ނިޔަލަށް އިތުރު 11 ތަނެއް ޚިދުމަތަށް ގެނެވޭނެކަމަށް ވަޒީރު ވިދާޅުވިއެވެ.