އިނގިރޭސި ޕްރިމިއާ ލީގުގައި ރޭ އެސްޓަން ވިލާ އާއި ދެކޮޅަށް ޗެލްސީ ކުޅުނު މެޗުގައި ޖޮއާއޯ ޕެޑްރޯ ހެދި ހެޓްރިކާއެކު 4-1 ގެ ނަތީޖާއަކުން ޗެލްސީ މޮޅުވެއްޖެ އެވެ.
އެސްޓަން ވިލާގެ ވިލާ ޕާކްގައި ކުޅުނު މި މެޗަށް ޗެލްސީ ނިކުތްއިރު އެ ޓީމުގެ ކޯޗު ލިއާމް ރޮޒޭނިއާ ވަނީ ބަދަލުތަކެއް ގެނެސްފަ އެވެ. އެގޮތުން އާންމުކޮށް ގޯލުކީޕަރަށް ކުޅޭ ރޮބަޓް ސަންޗޭޒްގެ ބަދަލުގައި މި މެޗަށް ނެރެފައިވަނީ ޖޯގެންސަން އެވެ.
މެޗުގެ ދެވަނަ މިނިޓުގައި އެސްޓަން ވިލާގެ ޑަގްލަސް ލުއިޒް ލަނޑެއް ޖަހާ އެ ޓީމަށް ކުރި ހޯދަދިން ނަމަވެސް ޗެލްސީ އިން ވަނީ މެޗުގެ ކޮންޓްރޯލް ހޯދުމަށްފަހު އެސްޓަން ވިލާގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފަ އެވެ.
ޗެލްސީ އިން މި މެޗުގެ ނަތީޖާ އެއްވަރުކޮށްފައިވަނީ މެޗުގެ 35 ވަނަ މިނިޓުގައި ޖޮއާއޯ ޕެޑްރޯ ކާމިޔާބުކޮށްދިން ލަނޑުންނެވެ. އަދި މެޗުގެ ފުރަތަމަ ހާފުގެ އިންޖަރީ ވަގުތުގައި ޖޮއާއޯ ޕެޑްރޯ ވަނީ އިތުރު ލަނޑެއް ޖަހާ ޗެލްސީ އަށް ކުރި ހޯދަދީފަ އެވެ.
ދެވަނަ ހާފުގެ ކުޅުން ފެށުނުތާ ދިހަ ވަނަ މިނިޓުގައި ޗެލްސީގެ ކޯލް ޕާމާ ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
މި މެޗުގައި ޗެލްސީ އިން ޖެހި ހަތަރުވަނަ ލަނޑަކީ މެޗުގެ 64 ވަނަ މިނިޓުގައި ޖޮއާއޯ ޕެޑްރޯ ކާމިޔާބުކޮށްދީފައިވާ ލަނޑެކެވެ. މި ލަނޑާއެކު އޭނާ މި ސީޒަނުގައި ޖެހި ލަނޑުގެ އަދަދު ވަނީ 17 އަށް އަރާފަ އެވެ.
މި ނަތީޖާ އާއިއެކު ޗެލްސީ އަށް ވަނީ 29 މެޗުން ލިބިފައިވާ 48 ޕޮއިންޓާއެކު ތާވަލުގެ ފަސްވަނަ މަގާމް ލިބިފަ އެވެ. އެސްޓަން ވިލާއަށް ލިބިފައިވާ 51 ޕޮއިންޓާއެކު އެ ޓީމު އޮތީ ތާވަލުގެ ހަތަރުވަނައިގަ އެވެ.