އިންތިޚާބުގައި ވޯޓުލުމަށް 588 ފޮށި ބަހައްޓާނެ
-
މާލޭގައި 180 ފޮށި ބަހައްޓާ
-
އަތޮޅުތެރޭގައި 322 ފޮށި ބަހައްޓާ
-
އިންތިޚާބު އޮންނާނީ އޭޕްރީލް 4ގައި
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓުލުމަށް 588 ވޯޓު ފޮށި ބަހައްޓާނެކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އެހެން ފަހަރުތަކެކޭވެސް އެއްގޮތަށް މިފަހަރުވެސް އެންމެ ގިނަ ވޯޓު ފޮށި ބަހައްޓަނީ އަތޮޅުތަކުގައެވެ.
ވޯޓު ފޮށިތައް ބެހިފަވާގޮތް:
މާލެ – 180 ފޮށި
ހުޅުމާލެ – 51 ފޮށި
ވިލިމާލެ – 9 ފޮށި
އަތޮޅުތެރެ – 322 ފޮށި
ރިސޯޓް – 21 ފޮށި
ޖަލުތައް – 5 ފޮށި
މާލެ، ހުޅުމާލެ ފޭސް1، ހުޅުމާލެ ފޭސް 2 އަދި ވިލިމާލެ ހިމެނޭހެން ޖުމުލަ 240 ވޯޓު ފޮށި ބަހައްޓައެވެ.
މާލެ ސަރަޙައްދު:
މާލޭގެ ރައްޔިތުން ވޯޓުލުމަށް – 98 ފޮށި
އަތޮޅު/ސިޓީ ރައްޔިތުން ވޯޓުލުމަށް – 142 ފޮށި
އަތޮޅުތަކަށް ބަލާއިރު އެންމެ ގިނަ ފޮށި ބަހައްޓަނީ އައްޑޫ ސިޓީ، ރ.އަތޮޅު އަދި ހއ. އަތޮޅުގައެވެ.
އެންމެ ގިނަ ވޯޓު ފޮށި ބަހައްޓާ އަތޮޅުތައް:
އައްޑޫ ސިޓީ – 29 ފޮށި
ރ.އަތޮޅު – 25 ފޮށި
ހއ.އަތޮޅު 23 ފޮށި
ޖަލުތަކުގެތެރެއިން މާފުށި ޖަލުގައި 2 ފޮށި، ހިންމަފުށީގައި ހުންނަ އައްސޭރި ޖަލުގައި 1 ފޮށި، ހުޅުމާލެ ޖަލުގައި 1 ފޮށި އަދި ދޫނިދޫ ޖަލުގައި 1 ފޮށި ބަހައްޓައެވެ.
ވޯޓު ފޮށި ބަހައްޓަން މީހުން ރަޖިސްޓްރީކުރަން ޖެހޭ ޢަދަދު ހަމަނުވެގެން، މި އިންތިޚާބުގައި ރާއްޖެއިން ބޭރުގައި އަދި ސިނާޢީ މަސައްކަތްކުރާ އެއްވެސް ރަށެއްގައި ވޯޓު ފޮށި ނުބަހައްޓަން ވަނީ ނިންމާފައެވެ.
މި އިންތިޚާބުގައި 2960 ކެންޑިޑޭޓުން ވާދަކުރެއެވެ. އަދި 294,937 މީހުންނަށް ވޯޓުލުމުގެ ޙައްގު ލިބިގެންވެއެވެ. އިންތިޚާބު އޮންނަނީ އޭޕްރިލް މަހުގެ 4 ވަނަ ދުވަހުއެވެ.
މި އިންތިޚާބުގައި ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓު އޮންނާނެއެވެ.