ކޮންމެ މޫސުމެއްގައިވެސް އެކި ހިސާބުތަކަށް މުދާ އުފުލާނެ ރޫޓުތަކެއް

އަހަރުގެ ކޮންމެ މޫސުމެއްގައިވެސް ރާއްޖޭގެ އެކި ކަންކޮޅުތަކަށް މުދާ އުފުލޭނެ ރޫޓުތަކެއް އެމްޕީއެލްއާއި ގުޅިގެން ކަނޑައަޅާފައިވާ ކަަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ، ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ، ރަމަޟާން މަހު ފަސޭހަކަމާއެކު ތަކެތި ފޯރުކޮށްދިނުމުގެ އިންތިޒާމުތައް ހަމަޖެއްސުމަށް ގިނަ މަސައްކަތްތަކެއް ކޮށްފައިވާ ކަަމަށެވެ. އެގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެންމެ އިސްކަންދެއްވާ އެއްކަމަކީ، ތަކެތީގެ އަގުތައް މެނޭޖްކުރުމާއި، ރައްޔިތުންނަށް ބުރަ ބޮޑު ނުވާގޮތަށް ތަކެތީގެ އަގުތައް ބެހެއްޓުމުގެ އިތުރުން ބާޒާރުން މެދުކެނޑުމެއްނެތި ތަކެތި ލިބޭނެ އިންތިޒާމުތައް ހަމަޖެއްސުން ކަމަށެވެ.

ވަޒީރު ވިދާޅުވީ، ގޮންޖެހުންތަކާއެކުގައިވެސް މި ހާލަތުގައި ގޯސްނުވާނެ ގޮތަށް މަސައްކަތްތައް ކޮށްފައިވާ ކަމަށެވެ. މިކަމުގެ ދަށުން މިއަހަރު ތަފާތު މަސައްކަތްތަކެއް ކޮށްފައިވާ ކަމަށާއި، ފާއިތުވި ރަމަޟާން މަސްތަކަށްފަހު ސަރުކާރުން މުހިންމު ބަދަލުތަކެއް ގެންނަވާފައިވާ ކަމަށް ވަޒީރު ވިދާޅުވިއެވެ. ވަޒީރު ވިދާޅުވީ، މީގެ ކުރިން އަސާސީ ކާބޯތަކެތީގެ ގޮތުގައި ހިމެނިފައިވަނީ ހަނޑޫ ހަކުރު ފުތް ހިމެނޭހެން 3 ބާވަތް ކަމަށެވެ. އަދި މިބާވަތުގެ އިތުރުން މި ލިސްތަށް 23 ބާވަތެއް މިހާރު އިތުރުކޮށްފައިވާ ކަމަށެވެ. އެއީ 10 ބާވަތުގެ މޭވާއާއި، 10 ބާވަތުގެ ތަރުކާރީ އަދި 3 ބާވަތެއްގެ ކާނާ ކަމަށް ވަޒީރު ވިދާޅުވިއެވެ. އަދި މި ތަކެތި މެދުކެނޑުމެއްނެތި ލިބޭނެ އިންތިޒާމް ހަމަޖައްސަމުންދާ ކަމަށާއި ބާޒާރުގައި ލިބޭނެ އެންމެ ހެޔޮ އަގުގައި މިތަކެތި ލިބޭނެކަން ކަށަވަރު ކުރަމުންދާ ކަމަށްވެސް ވިދާޅުވިއެވެ.

އެގޮތުން ސިޓީސްތަކާއި، ގްރޭޓަރ މާލޭ ސަރަޙައްދުގައި ތަކެތި ލިބޭނެ އިންތިޒާމުތައް ހަމަޖެހިފައިވާކަން ވަޒީރު ފާހަގަކުރެއްވިއެވެ. އަދި 3000 އިން މަތީގެ އާބާދީތަކަށާއި، 3000 އިން ދަށުގެ އާބާދީއަށް އެސްޓީއޯގެ އެޖެންޓުން މެދުވެރިކޮށް ތަކެތި ލިބޭނެ މަގުފަހިކުރަމުންދާ ކަމަށް ވިދާޅުވިއެވެ. ވަޒީރު ވިދާޅުވީ، މުދާ އުފުލުމަކީވެސް ސަރުކާރުން އިސްކަމެއްދީގެން ބަލަންޖެހޭ ކަމަކަށްވާއިރު، ކުޅުދުއްފުށީ ޕޯޓުގައި ޑިއުޓީ ނެގުމަކާއި ނުލައި ތަކެތި ރައްކާތެރި ކުރެވޭނެ އިންތިޒާމު ހަމަޖެހިފައިވާ ކަމަށެވެ. އަދި އައްޑޫސިޓީ ހިތަދޫގެ ޕޯޓުގައިވެސް އެކަން ހަމަޖެހިފައިވާ ކަމަށް ވިދާޅުވިއެވެ.

މީގެއިތުރުން ރާއްޖޭގެ އެކި ސަރަޙައްދުތަކަށް މުދާ ފޯރުކޮށްދިނުމުގެ މަސައްކަތުގެ ދަށުން އެންކަރގެ ނަމުގައި އެމްޕީއެލްއިން ރާއްޖޭގެ އެއްކޮޅުން އަނެއް ކޮޅަށް މުދާ އުފުލާނެ ރޫތަކެއްް ކަނޑައަޅާފައިވާކަންވެސް ވަޒީރު ފާހަގަކުރެއްވިއެވެ.

" މިއީ ކޮންމެ މޫސުމެއްގައިވެސް އަދި ކޮންމެ ގޮންޖެހުމެއްގައިވެސް ރައްޔިތުންނަށް އަތޮޅުތަކަށް ރަށްތަކަށް މެދުކެނޑުމެއްނެތި ތަކެތި ފޯރުކޮށްދިނުމުގެ ބޭނުމުގައި ރައީސުލްޖުމްހޫރިއްޔާ ނިންމާފައިވާ ކަމެއް. ފުލް ސެކިއުރިޓީއާއި އިފެކްޓިވްކޮށް އަތޮޅު ތެރޭގައި ދިރިއުޅޭ ރައްޔިތުންނަށް ތަކެތި ލިބޭނެކަން ކަށަވަރު ކުރުމަށް ކުރާ މަސައްކަތުގެ ދަށުން ނުވަތަ ގެންނަ ބަދަލުތަކުގެ ތެރެއިން މިކަން ކުރެވެމުން މިދަނީ. ހުޅަނގު މޫސުމުގައި ވަކި ބާވަތެއް ނުލިބިދާނެ ކަމުގެ ބިރުވެސް ނޯންނަ ގޮތަށް ޔަޤީންކަމާއެކު ތަކެތި އުފުއްލާނެ ފަރާތެއް އެމްޕީއެލްއިން އަޅުގަނޑުމެން ކަނޑައެޅީ. ހަމައެކަނި އުފުއްލުން ވަކި ޕޯޓުތަކަށް." އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު ވިދާޅުވިއެވެ.

ވަޒީރު ވިދާޅުވީ، އެސްޓީއޯގެ ކެޕޭސިޓީ އިތުރު ކުރުމަށް މަސައްކަތް ކުރަމުންދާ ކަމަށެވެ. އޭގެ ތެރޭގައި ސްޓޯރޭޖާއި ގުދަން ކުރާ ޖާގަ އިތުރު ކުރުން ހިމެނޭ ކަމަށްވެސް ވަޒީރު ވިދާޅުވިއެވެ.