އެފްއޭއެމް ވެޓެރެންސް ކަޕް: ޕޮލިސް އަތުން ހުޅުމާލެ ވެޓެރެންސްއަށް ޕޮއިންޓެއް

އެފްއޭއެމް ވެޓެރެންސް ކަޕް 2026 ގައި ޕޮލިސް ކުލަބު އަތުން އެންމެ ފަހުގެ ޗެމްޕިއަން ހުޅުމާލެ ވެޓެރެންސް ޕޮއިންޓެއް ހޯދައިފިއެވެ. ގުރޫޕް ބީގައި ދެޓީމު ވާދަކުރި މެޗު ނިމުނީ 2-2 ލަނޑުން އެއްވަރުވެގެންނެވެ.

މާފަންނު އެއްނަންބަރު ޓާފްދަނޑުގައި ކުޅުނު މެޗު ފަށައިގެން ޕޮލިސް ކުލަބުން ރަނގަޅަށް ކުޅެ ގިނަ ހަމަލާތަކެއް ވަނީ އުފައްދާފައެވެ. ހުޅުމާލެ ގޯލަށް ގިނަ ހަމަލާތަކެއް ޕޮލިސް ކުލަބުން ހަމަލާތައް އުފެއްދުމުގައި ޕޮލިސް ކުލަބުން ވަނީ ކުރި ހޯދާފައެވެ.

ޕޮލިސް ޓީމުން ޖެހި ފުރަތަމަ ލަނޑަކީ ހުޅުމާލެ ޕެނެލްޓީ އޭރިއާ ތެރެއިން ހުސެއިން ވިޝާލް ޕޮލިސް ޓީމުގެ އަހުމަދު ޝާމް އަށް ކުރި ފައުލަކަށް ލިބުނު ޕެނެލްޓީއަކުން ކާމިޔާބު ކުރި ލަނޑެކެވެ. މި ޕެނެލްޓީ މެޗުގެ 25 ވަނަ މިނިޓުގައި އެޓީމަށް ކާމިޔާބުކޮށްދިނީ އަލީ ރިޝްވާން އަހުމަދެވެ.

ޕޮލިސް ޓީމުން ލީޑު އިތުރަށްފުޅާ ކުރީ މެޗުގެ 27 ވަނަ މިނިޓުގައި ޝާމް ކާމިޔާބު ކުރި ލަނޑުންނެވެ. ޝާމް މި ލަނޑު ކާމިޔާބު ކުރީ އޭރިއާ ތެރެއިން ލިބުނު ބޯޅައެއް ކީޕަރު ބޯމަތިން ގޯލަށް ވައްދާލި ބޯޅައިންނެވެ.

ހުޅުމާލެ ޓީމުގެ ފުރަތަމަ ލަނޑު ކާމިޔާބުކުރީ ފުރަތަމަ ހާފުގެ އެންމެ ފަހު މިނިޓުގައި އަބްދުލް މަޖީދު އިބްރާހިމް އޭރިއާ ތެރެއިން ނަގައިދިން ހުރަހެއް ހުސެއިން ސިމާޒް ކާމިޔާބުކުރި ލަނޑެކެވެ.

މެޗުގެ ދެވަނަ ހާފުގައި ހުޅުމާލެއިން ކުޅުން ރަނގަޅުކޮށް ގިނަ ހަމަލާތައް އުފައްދާފައެވެ. ހުޅުމާލެ ޓީމުން ލަނޑެއް ޖެހުމައްޓަކައި ކުރަމުންދިޔަ މަސައްކަތް ކާމިޔާބުވީ އިތުރުވަގުތު ތެރޭގައި މެޗުގެ އެންމެ ފަހު މިނިޓުގައި ޕޮލިސް ޓީމުގެ ކުޅުންތެރިއެއް ދިފާއު ކުރުމަށް ޖެހި ބޯޅަ އަތުގަ ޖެހުމުން ލިބުނު ޕެނެލްޓީ ގޯލަށް ވައްދާލީ ފުރަތަމަ ލަނޑުވެސް ޖެހި ސިމާޒްއެވެ.

މި ނަތީޖާ އެކު ތިން ޕޮއިންޓުގެ ލީޑަކާ އެކު ގުރޫޕުގެ އެއްވަނައިގައި ހުޅުމާލެ ވެޓެރެންސް އޮތީ 7 ޕޮއިންޓާއެކުއެވެ. ޕޮލިސް ކުލަބު ދެވަނައިގަ އޮތީ ހަތަރު ޕޮއިންޓާއެކުވެ.