ރާޅާއެޅުމުގެ ތެރެއަށް އަލަށް ވަންނަ ކުދިންނަށް ވާދަވެރި މުބާރާތްތަކެއް ހޯދައިދިނުމަށް ހަގު އުމުރުފުރާތަކުގެ ކުދިންނަށް ހާއްސަ މުބާރާތެއް ބޭއްވުމަށް މޯލްޑިވްސް ބޮޑީބޯޑިންގ އެސޯސިއޭޝަން (އެމްބީބީއޭ) އިން މަޝްވަރާކުރަން ފަށައިިފިއެވެ.
އެމްބީބީއޭއިން ބުނީ އެސޯސިއޭޝަނުގެ މެންބަރުންގެ މެދުގައި ހިޔާލު ހުށަހަޅައިގެން މަޝްވަރާކުރަމުން އަންނަނީ އަލަށް އަންނަ ކުދިންނަށް ޖޫނިއާ ޗެމްޕިއަންޝިޕްގެ ނަމުގައި ވަކި މުބާރާތެއް ތައާރަފުކުރުމަށް ކަމަށެވެ.
މިއީ މި ކުޅިވަރުގެ ތެރޭގައި އުޅޭ ހަގު އުމުރުފުރާތަކުގެ ކުދިންނަށް އެކުދިންގެ ހުނަރު ކުރިއަރުވާ ގައުމީ ލީގަށް އައުމަށް އުފައްދައިދޭ ޕްލެޓްފޯމެކެވެ. މިއީ ބޮޑީބޯޑިންގ ލީގުގައި ހިމެނޭ މުބާރާތްތަކަށް އައުމުގެ ކުރިން އެފަދަ މުބާރާތްތަކުގެ ޖަޖިން ޕެނަލުން މާކްސްދޭ ގޮތާއި ހީޓްތައް ކުރިޔަށްދާގޮތަށް އަހުލުވެރިކުރުމަށް އެ ކުދިންނަށް ދެވޭ ފުރުސަތަކަށް ވާނެ ކަމަށްވެސް އެމްބީބީއޭއިން ބުނެއެވެ.
އެމްބީބީއޭއިން ބުނީ އެ އެސޯސިއޭޝަނުގެ މެންބަރުން މިކަމާގުޅޭގޮތުން ފުޅާ ދާއިރާއެއްގައި ހިޔާލު ބަދަލުކޮށްފައިވާކަމަށެވެ.އެވެ. އަދި ޖޫނިއަރ ޗެމްޕިއަޝިޕް ތައާރަފުކުރުމަށް، ހުރިހާ މެންބަރުންވެސް ތާއިދުކޮށް އެ މުބާރާތް ކުރިޔަށް ގެންދާނެ ގޮތަކާއިމެދު މަޝްވަރާ ކުރެވެމުންދާ ކަމަށެވެ.
ޕީއެސްއެމް ނިއުސްއަށް މައުލޫމާތު ދެމުން އެމްބީބީއޭގެ ސެކެއްޓްރީ ޖެނެރަލް ހަސަން ރަޝީދު (ރަޝް) ބުނީ މިކަން ހަގީގަތަކަށް ހެދިއްޖެނަމަ އަލަށް އުފެދޭ ބޮޑީބޯޑަރުން މިކުޅިވަރުގެ ތެރެއިން އެއްކިބާވެގެން ދިއުން ނުވަތަ ގެއްލޭ ގެއްލުން ނިމުމަކަށް ގެނެވޭނެ ކަމަށް އެމްބީބީއޭއިން ދެކޭކަމަށެވެ.
އެ އެސޯސިއޭޝަނުން ބުނީ، ގައުމީ ޓްރޭނިންގ ޕްރޮގްރާމް ހުދުފޮނުގައި ބައިވެރިވާ ގިނަ އަދަދެއްގެ ހުނަރުވެރި ކުދިންވެސް ފާހަގަކުރެވޭ ކަމަށެވެ. އަދި އެފަދަކުދިންނަށް އިތުރަށް ކުރިޔަށް ދިއުމަށް ހިތްވަރުދީ ވާދަވެރި މުބާރާތްތަކުން ފުރުސަތު ދިނުނުން މުހިންމު ކަމަށެވެ. ހަމައެއާއެކު ތަޖުރިބާކާރު އެތުލީޓުންނާއެކު ލީގުގައި ވާދަކުރުމަށް ޖެހިލުން ނުވާވަރަށް އެކުދިން މުބާރާތްތަކަށް އަހުލުވެރި ކުރުވުމަށް ޖޫނިއާ މުބާރާތެއް ވަރަށް މުހިންމު ކަމަށެވެ.
ޖޫނިއާ ޗެމްޕިއަންޝިޕް ތައާރަފްކުރުމާއި ގުޅޭ ގޮތުން މަޝްވަރާކުރަމުން އަންނައިރު މިއަހަރުވެސް އެމްބީބީއޭއިން ވަނީ ރާއްޖޭގެ އެކި ސަރަހައްދުތަކުގައި ހުދުފޮނު ކުލިނިކުތައް ހިންގުމަށް ނިންމާފައެވެ. އަދި ރާއްޖޭގެ ގައުމީ ޓީމުގެ ތަޖުރިބާކާރު އެތުލީޓުންނާއި ދާއިރާގެ ފުންނާބު އުސް ޓެކްނިކަލް އޮފިޝަލުންގެ އެހީތެރިކަމާއެކު ހުދުފޮނުގެ އައު ބެޗުތަކެއް ބޮޑީބޯޑިންގެ ތެރެއަށް ނެރުމަށް މިއަހަރުވެސް އެސޯސިއޭޝަނުން ހާއްސަ އިސްކަމެއްދީގެން މަސައްކަތް ކުރާނެއެވެ.
އެމްބީބީއޭގެ އަމާޒަކީ ހަގު އުމުރުފުރާތަކުގެ ކުދިން، މި ކުޅިވަރުގެ ތެރެއަށް ވައްދާ މުސްތަގުބަލަށް ފެންވަރު ރަނގަޅު އެތުލީޓުންތަކެއް އުފެއްދުމެވެ. އަދި ބައިނަލްއަގްވާމީ މައިދާނުގައި ރާއްޖެ ތަމްސީލުކޮށް ކާމިޔާބީތައް ހާސިލުކުރުމެވެ.