މޯލްޑިވްސް ބޮޑީ ބޯޑިން އެސޯސިއޭޝަން (އެމްބީބީއޭ) އިން މިއަހަރަށް 14 މިލިއަން ރުފިޔާގެ ބަޖެޓެއް ފާސްކޮށްފިއެވެ.
އެ އެސޯސިއޭޝަނުން މި ބަޖެޓް ފާސްކުރީ އާދިއްތަދުވަހުގެ ރޭ ހެންވޭރު ބޯޅަގޭގައި ބޭއްވި އަހަރީ އާންމު ޖަލްސާގައެވެ. ވޯޓުލެވޭ 13 މެންބަރުންނާއެކު ކޯރަމް ހަމަކޮށްގެން ކުރިޔަށް ގެންދިޔަ މި ޖަލްސާގައި އެމްބީބީއޭއިން މިއަހަރަށް ކަނޑައަޅާފައިވާ 14،360،121.33 (ސާދަ މިލިއަން ތިން ލައްކަ ފަސްދޮޅަސްހާ އެއްސަތޭކަ އެކާވީސް ރުފިޔާ ތެއްތިރީސް ލާރި) ގެ ބަޖެޓް ހުށަހެޅުއްވީ އެސޯސިއޭޝަނުގެ ނައިބު ރައީސް އަލީ އިބްރާހިމެވެ.
ހުރިހާ މެންބަރުންގެ އިއްތިފާގުން މި ބަޖެޓް ފާސްކޮށްފައިވާއިރު މިއަހަރު އެންމެ ބޮޑު ހޭދައެއް ކުރުމަށް ހަމަޖެހިފައިވަނީ އައިބީސީ ވޯލްޑް ޓުއާރގެ ތެރެއިން ރާއްޖެއިން ހޯސްޓުކުރުމަށް މަސައްކަތް ކުރަމުން އަންނަ މޯލްޑިވްސް ޕްރޯއާއި، ގައުމީ ލީގަށެވެ. އަދި އެތުލީޓުން އުފެއްދުމަށް ހިންގާ ގައުމީ ތަމްރީނު ޕްރޮގްރާމް، ހުދުފޮނު އަދި ޓެކްނިކަލް ގޮތުން ކުރިއެރުންތައް ހޯދުމާއި އިދާރީ ހިންގުމާއި ގުޅޭ ކަންކަމަށް މި ބަޖެޓުން ބޮޑު ހޭދައެއް ކުރާނެއެވެ.
މޯލްޑިވްސް ސްޕޯޓްސް ކައުންސިލާއި ސްޕޯޓްސް ކޮމިޝަނަރުގެ އޮފީހުން މަންދޫބުން ބައިވެރިވި މި ޖަލްސާގައި މިދިޔައަހަރުގެ އަހަރީ ރިޕޯޓާއި އޮޑިޓްކޮށްފައިވާ ފައިނޭންޝަލް ސްޓޭޓްމެން ހުށަހެޅުންވެސް އޮތެވެ.
އެމްބީބީއޭއިން ވަނީ އަހަރީ އާންމު ޖަލްސާގައި އެ އެސޯސިއޭޝަނުން މިއަހަރަށް ރާވަފައިވާ ކަންކަން މެންބަރުންނާއި ހިއްސާކޮށްފައެވެ. 13 ވޯޓު ލެވޭ 13 މެންބަރުން ބައިވެރިވެ ކޯރަމް ހަމަކޮށްގެން ބޭއްވި މި ޖަލްސާ އޮބްޒާވް ކުރުމަށް މޯލްޑިވްސް އޮލިމްޕިކް ކޮމިޓީއާއި ސްޕޯޓްސް ކޮމިޝަނަރުގެ އޮފީހުގެ މަންދޫބު ބައިވެރިވެލެއްވިއެވެ.
މި ޖަލްސާގައި ވާހަކަދައްކަމުން އެމްބީބީއޭގެ ރައީސް ހުސެއިން ނިޒާމް (ނިޒޯ) ވަނީ މިދިޔަ އަހަރުގެ ކާމިޔާބީތައް ފާހަގަ ކުރައްވާފައެވެ. އޭގެތެރޭގައި ގައުމީ ލީގާއި ބޮޑީބޯޑަރުން އުފެއްދުމަށް ހިންގި ޤައުމީ ހުދުފޮނު ޕްރޮގްރާމުގެ ކުލިނިކުތައް ނ. ޅޮއްސާއި ށ. ކަނޑިތީމުގައި ކާމިޔާބުކަމާއެކު ބޭއްވުނުކަން ފާހަގަކުރެއްވިއެވެ.
އަދި އެ ޕްރޮގްރާމަށް ރަށްރަށުންނާއި ކުޅިވަރާއި ހަށިހެޔޮކަމާއި ބެހޭ ވުޒާރާއާއި ސްޕޮންސަރުން ދިން އެހީތެރިކަން ފާހަގަކޮށް ނިޒާމް ވަނީ އެފަރާތަކަށް ޝުކުރު އަދާކޮށްފައެވެ. އަދި އޭނާ ވަނީ ހުދުފޮނު ޕްރޮގްރާމް އިތުރަށް ފުޅާކުރުމަށް އެސޯސިއޭޝަނުން ގެންގުޅޭ ތަސައްވަރު ހާމަކުރައްވާފައެވެ.