ޖެނުއަރީ މަހު ކުޑަކުދިންނަށް އަނިޔާކުރުމުގެ 64 މައްސަލަ

ޖެނުއަރީ މަހު އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާއަށް ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 64 މައްސަލައެއް ރިޕޯޓުކޮށްފައިވާކަމަށް އެ ވުޒާރާގެ ތަފާސްހިސާބުތަކުން ދައްކައިފިއެވެ. އޭގެ ތެރޭގައި ހިމެނެނީ އަންހެން ކުދިންގެ 32 މައްސަލައަކާއި ފިރިހެން ކުދިންގެ 32 މައްސަލައެކެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ޢާއްމުކޮށްފައިވާ ތަފާސްހިސާބުތަކުން ދައްކާ ގޮތުން ޖެނުއަރީމަހު އެ ވުޒާރާއަށް ރިޕޯޓުކޮށްފައިވާ ކުޑަކުދިންނަށް ކުރާ އެކި ބާވަތުގެ އަނިޔާއާއި ގުޅޭ 64 މައްސަލައިގެ ތެރެއިން އެންމެ ގިނައިން ރިޕޯޓުކޮށްފައިވަނީ އިހުމާލުވުމުގެ މައްސަލައެވެ.

އެ ގޮތުން، ކުޑަކުދިންނަށް އިހުމާލުވުމުގެ ޖުމްލަ 30 މައްސަލައެއް ރިޕޯޓުކޮށްފައިވާ ކަމަށާއި، އޭގެ ތެރޭގައި ހިމެނެނީ ފިރިހެން ކުދިންނާއި ގުޅޭ 19 މައްސަލައަކާއި އަންހެން ކުދިންނާއި ގުޅޭ 11 މައްސަލައެއް ކަމަށް ތަފާސްހިސާބުތަކުން ދައްކައެވެ.

ޖެނުއަރީ މަހު އިޖުތިމާޢީ ތަރައްޤީއާ ބެހޭ ވުޒާރާއަށް ދެވަނައަށް އެންމެ ގިނައިން ރިޕޯޓުކޮށްފައިވަނީ ޖިންސީ ހާނިއްކައިގެ މައްސަލަތަކެވެ. އެ ގޮތުން ޖިންސީ ހާނިއްކައިގެ 13 މައްސަލައެއް ރިޕޯޓުކޮށްފައިވާކަމަށާއި އޭގެ ތެރޭގައި ހިމެނެނީ ފިރިހެން ކުދިންނާއި ގުޅޭ 02 މައްސަލައަކާއި އަންހެން ކުދިންނާއި ގުޅޭ 11 މައްސަލަކަމަށް ތަފާސްހިސާބުތަކުން ދައްކައެވެ.

ކުޑަކުދިންނަށް ކުރާ އެކި ބާވަތުގެ އަނިޔާގެ މައްސަލަތައް:

ނަފްސާނީ ހާނިއްކައިގެ 07 މައްސަލަ
ޖިސްމާނީ ހާނިއްކައިގެ 04 މައްސަލަ
ބްލެކްމެއިލް ކުރުމުގެ 01 މައްސަލަ
ކުޑަކުދިންގެ ބަދުއަޚްލާގީ އަމަލު ހިންގާ ވީޑިއޯތަކާއި ގުޅޭ 01 މައްސަލަ

2026 ވަނަ އަހަރުގެ ޖެނުވަރީ މަހުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ރިޕޯޓުކޮށްފައިވާ މައްސަލަތަކުގެ ތަފާސްހިސާބުތައް.

2026 vana aharuge January mahugai ijuthimaa'ee adhi 'aailee tharaqqeeaa behey vuzaaraaah report koffaivaa massalathakuge thafaashisaabuthah. pic.twitter.com/k0FIAInNDx

— Ministry of Social and Family Development (@MSFDmv) March 2, 2026

އިޖުތިމާޢީ ވުޒާރާގެ ތަފާސްހިސާބުތައް ދައްކާގޮތުން، ވަކި ޖިންސަކަށްވީތީ ކުރާ އަނިޔާއާއި ގެވެށި އަނިޔާގެ ޖުމްލަ 45 މައްސަލައެއް ރިޕޯޓުކޮށްފައިވެއެވެ.

މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ ޖިސްމާނީ އަނިޔާކުރުމުގެ މައްސަލަތައްކަމަށް ތަފާސްހިސާބުތަކުން ދައްކައެވެ. އެގޮތުން ޖިސްމާނީ އަނިޔާކުރުމުގެ 23 މައްސަލައެއް ރިޕޯޓުކޮށްފައިވާކަމަށާއި އޭގެތެރޭގައި ހިމެނެނީ އަންހެނުންނާއި ގުޅޭ 17 މައްސަލައަކާއި ފިރިހެނުންނާއި ގުޅޭ 06 މައްސަލައެއްކަމަށް އެ ވުޒާރާއިން ވިދާޅުވެއެވެ.

މީގެއިތުރުން ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުނަށް އަޅައިލުމާއި އެހީތެރިވުމާއި ގުޅޭ 08 މައްސަލައެއް ޖެނުއަރީމަހު އެވުޒާރާއަށް ރިޕޯޓުކޮށްފައިވެއެވެ. މީގެތެރޭގައި ހިމެނެނީ ފިރިހެނުންގެ 02 މައްސަލައާއި އަންހެނުންގެ 06 މައްސަލައެވެ.

އެ ވުޒާރާއިން ވިދާޅުވީ، ޖެނުއަރީމަހު އެ ވުޒާރާގެ ޗައިލްޑް ހެލްޕްލައިން 1412އަށް 1964 ކޯލު ލިބިފައިވާކަމަށެވެ. އޭގެތެރެއިން 97 ކޯލަކީ ކުޑަކުދިންގެ ފަރާތުން ލިބިފައިވާ ކޯލުތައްކަމަށް އެ ވުޒާރާއިން ވިދާޅުވެއެވެ.