އަލިފާނުގެ ހާދިސާ ހިނގި ގޭގެ މީހުން ވަގުތީ ބޯހިޔާވަހިކަމުގައި

މާފަންނު ރިމްލާސްގޭގައި ރޭ ހިނގި ނުރައްކާތެރި އަލިފާނުގެ ހާދިސާއާ ގުޅިގެން އެގޭގައި ދިރިއުޅޭ އާއިލާއަށް ބޭނުންވާ ވަގުތީ ބޯހިޔާވަހިކަމާއި ކެއިންބުއިމުގެ އެހީތެރިކަން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ، އެންޑީއެމްއޭއިން ފޯރުކޮށްދީފިއެވެ.

އެންޑީއެމްއޭއިން ވިދާޅުވީ، މިޙާދިސާއާއި ގުޅިގެން މީހުން ދިރި ނޫޅެވޭ ވަރަށް އެ ގެ އަނދާފައިވާތީ އެގޭގެ ވެރިފަރާތުގެ އާއިލާގެ 7 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށެވެ. އޭގެ ތެރޭގައި ހިމެނެނީ، 18 އަހަރުން ދަށުގެ 3 ކުޑަކުދިންނާއި، އަންހެނަކާއި 3 ފިރިހެނުން ކަމަށެވެ. އަދި މި އާއިލާއަށް ވަގުތީ ބޯހިޔާވަހިކަން ފޯރު ކޮށްދީފައިވަނީ 5 ދުވަހުގެ މުއްދަތަކަށް ކަމަށް އެންޑީއެމްއޭއިން ވިދާޅުވިއެވެ.

މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފްއިން ވިދާޅުވީ، މި ހާދިސާގެ ރިޕޯޓް ލިބުނީ ރޭ މެންދަމު 03:06 ހާއިރު ކަމަށެވެ. އަދި މި ރިޕޯޓް ލިބުމާއެކު އެމްއެންޑީއެފް ފަޔަރ އެންޑް ރެސްކިޔު ސަރވިސްގެ މާލޭ ފަޔަރ ސްޓޭޝަނުގެ ފަޔަރ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައެވެ. ސިފައިން ކުރި މަސައްކަތުން ރޯވި އަލިފާން އެއްކޮށް ނިއްވާލެވުނީ ފަތިހު 04:12 ހާއިރެވެ.

މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައިވާ ކަމުގެ މައުލޫމާތެއް ނުލިބެއެވެ.