ހުޅުމާލެ ހޮސްޕިޓަލުގައި އެންމެ ޒަމާނީ ހިތުގެ ފަރުވާދޭ ވަޞީލަތެއް

އެސްޓީއޯ ހެލްތު ކެއާގެ ފަރާތުން ހުޅުމާލެ ހޮސްޕިޓަލަށް ހިތުގެ ބަލިތައް ދެނެގަންނަ އެންމެ ޒަމާނީ އިމޭޖިންގް ޓެކްނޮލޮޖީގެ ވަޞީލަތެއް ތައާރަފުކޮށްފިއެެވެ.

މިކަމާއި ގުޅިގެން އެސްޓީއޯއިން ނެރުނު ނޫސްބަޔާނުގައި ވިދާޅުވެފައިވަނީ، އެސްޓީއޯ ހެލްތު ކެއާގެ ފަރާތުން ޞިއްޙީ ޚިދުމަތް ދޭ ތަންތަނުގައި ޒަމާނީ ޑައިގްނޯސްޓިކް އިކުއިޕްމަންޓް ފޯރުކޮށްދީ، ޚާއްސަ ބަލިތަކަށް ދޭ ފަރުވާގެ ފެންވަރު ރަނގަޅު ކުރުމަށް ކުރަމުންދާ މަސައްކަތުގެ ދަށުން، އެންމެ ފަހުގެ ކާޑިއޯ ވަސްކިއުލަރ އަލްޓްރާ ސައުންޑް ސިސްޓަމެއް ހުޅުމާލެ ހޮސްޕިޓަލަށް ފޯރުކޮށްދީފައިވާ ކަމަށެވެ.

މި ސިސްޓަމަކީ، މެޑިކަލް އިމޭޖިންގ އަދި ހެލްތު ކެއަރ ޓެކްނޮލޮޖީގައި ދުނިޔޭގެ ކުރިއަރާފައިވާ ކުންފުންޏެއް ކަމަށްވާ ޖީ.އީ ހެލްތު ކެއަރއާއި، އެސްޓީއޯ ހެލްތު ކެއަރގެ ޕާޓްނަރޝިޕްގެ ދަށުން ފޯރުކޮށްދިން ސިސްޓަމެކެވެ. މިއީ، ރާއްޖޭގެ ޞިއްޙީ ނިޒާމުގެ ތެރޭގައި ކާޑިއެކް އިމޭޖިންގ ޚިދުމަތްތައް ތަރައްޤީ ކުރުމަށް ގުޅިގެން ކުރާ މުހިއްމު މަސައްކަތެކެވެ.

ޖީ.އީ ވިވިޑް އީ95 އަކީ، ހިތުގެ ބައިތަކާއި މަސައްކަތް ކުރާ ގޮތުގެ އިތުރުން ލޭ ދައުރުވާ ގޮތް ވަރަށް ސާފުކޮށް ބަލާލެވޭނެހެން ފަރުމާކޮށްފައިވާ (ހައި-ރިޒޮލިއުޝަން ކާޑިއެކް އިމޭޖިންގ) ސިސްޓަމެކެވެ. މި ސިސްޓަމުގައި ބޮޑެތި މީހުންނާއި، ކުޑަކުދިން އަދި އަލަށް އުފަންވާ ކުދިންނަށް ބޭނުން ކުރެވޭނެ ޕްރޯބްތައް ހިމެނެއެވެ. މީގެ ސަބަބުން އަލަށް އުފަންވާ ކުދިންގެ ހިތުގެ އައިބުތައް ދެނެގަތުމަށާއި، ހުރިހާ އުމުރުފުރައެއްގެ ބަލި މީހުންގެ ހިތުގެ ޓެސްޓުތައް ހެދުމަށް މަގުފަހިވެ، ފަރުވާގެ ކަންކަމުގައި އަވަސް ނިންމުންތައް ނިންމުމަށް އެހީތެރިވެދެއެވެ.

ހުޅުމާލެ ހޮސްޕިޓަލުގައި މި ސިސްޓަމް ޤާއިމުކޮށް ޚިދުމަތް ދޭން ފެށުމަކީ، ރާއްޖޭގެ ޑައިގްނޯސްޓިކް ޚިދުމަތްތައް ތަރައްޤީކޮށް، ފެންވަރު ރަނގަޅު ޞިއްޙީ ޚިދުމަތެއް ފޯރުކޮށްދިނުމަށް އެސްޓީއޯ ހެލްތު ކެއަރއިން ސިއްޙީ ޚިދުމަތްދޭ ތަންތަނާއި ގުޅިގެން ކުރަމުންދާ މަސައްކަތަށް ލިބުނު އިތުރު ކުރިއެރުމެކެވެ. އަދި މިއީ ކާޑިއެކް، ޕީޑިއަޓްރިކް އަދި ނިއޯނޭޓަލް ޑައިގްނޯސްޓިކް ޚިދުމަތްތައް އިތުރަށް ހަރުދަނާ ކުރުމަށްޓަކައި އެޅުނު މުހިއްމު ފިޔަވަޅެކެވެ.

ޖީ.އީ ހެލްތު ކެއަރ ބްރޭންޑުގެ ވިވިޑް (އީ95) ކާޑިއޯ ވަސްކިއުލަރ އަލްޓްރާ ސައުންޑް ސިސްޓަމް ތަޢާރަފުކޮށްފައިވަނީ، މިދިޔަ މަހުގެ 22 ގައި ހުޅުމާލެ ހޮސްޕިޓަލުގައި ބޭއްވި އެޕްލިކޭޝަން ޓްރެއިނިންގ ސެޝަނަކާއި އެއްކޮށެވެ. މި ސެޝަނުގައި ހުޅުމާލެ ހޮސްޕިޓަލުގެ ޞިއްޙީ މާހިރުންގެ އިތުރުން، ޓްރީ ޓޮޕް ހޮސްޕިޓަލުގެ މަންދޫބުންވެސް ބައިވެރިވިއެވެ.

އެސްޓީއޯ ހެލްތު ކެއަރގެ ފަރާތުން މެޝިން ފޯރުކޮށްދިނުމުގެ އިތުރުން، އިންސްޓޯލް ކުރުމާއި، އެޕްލިކޭޝަން ޓްރެއިނިންގ ދިނުމާއި، މެދުނުކެނޑި ފަންނީ އެހީތެރިކަން ފޯރުކޮށްދޭނެއެވެ. މީގެ އިތުރުން ވޮރެންޓީ އަދި (އާފްޓަރ-ސޭލްސް ސާވިސް ސަޕޯޓް)، ތަމްރީނު ލިބިފައިވާ އެސްޓީއޯގެ ބަޔޯމެޑިކަލް އިންޖިނިއަރުންނާއި، ކްލިނިކަލް އެޕްލިކޭޝަން ސްޕެޝަލިސްޓުން ފޯރުކޮށްދޭނެއެވެ. މީގެ މަޤުސަދަކީ، ޞިއްޙީ ޚިދުމަތްތެރިންނަށް މި ސިސްޓަމް އެންމެ ފުރިހަމަ ގޮތުގައި ބޭނުންކުރަން އެނގޭނެކަން ކަށަވަރު ކުރުމާއި، އޮޕަރޭޝަނަލް ދެމެހެއްޓެނިވިކަން ކަށަވަރު ކުރުމެވެ.