1500 މީޓަރު ދުވުމުގެ ޗެމްޕިއަންކަން ރިޒާއާއި ޒީކަށް

13 ވަނަ މައިލޯ އެސޯސިއޭޝަން ޗެމްޕިއަންޝިޕްގެ ފިރިހެނުންގެ 1500 މީޓަރު ދުވުމުގެ ސީނިއާ އިވެންޓުގެ ޗެމްޕިއަންކަން ދިވެހި ސިފައިންގެ ކުލަބުގެ ހުސެއިން ރިޒާ ހޯދައިފިއެވެ.

މާލޭ ކުޅިވަރު އެކުވެނީގައި އޮތް މި އިވެންޓުގެ ފައިނަލްގައި 9 އެތުލީޓުންނާއި ވާދަކޮށް ހުސެއިން ރިޒާ އެއްވަނަ ހޯދީ 4 މިނިޓް 16.96 ސިކުންތުން ރޭސް ނިންމައިގެންނެވެ.

މި ކެޓަގަރީގެ 2 ވަނަ ހޯދީ ޓްރެކް އެންޑް ފީލްޑްގެ އައިދު ޢަބްދުﷲ ރިފާއުއެވެ. އައިދު ރޭސް ނިންމީ 4 މިނިޓް 18.26 ސިކުންތުންނެވެ.

ތިންވަނަ ހޯދީ 4 މިނިޓް 23.84 ސިކުންތުން ރޭސް ނިންމި ޓްރެކް އެންޑް ފީލްޑްގެ މުޙައްމަދު އާޔަން ޝަފީއުއެވެ.

އަންހެނުންގެ 1500 މީޓަރު ދުވުމުގެ ސީނިއާ އިވެންޓުގެ ޗެމްޕިއަންކަން ހޯދީ ޓްރެކް އެންޑް ފީލްޑް އެސޯސިއޭޝަންގެ ޒީކް އަޝްރަފް ރަޝީދެވެ. އޭނާ ރޭސް ނިންމީ 5 މިނިޓް 15.53 ސިކުންތުންނެވެ.

ދެވަނަ ހޯދީ ޓްރެކް އެންޑް ފީލްޑް އެސޯސިއޭޝަންގެ އައިޝަތު ބިންތް އަހުމަދެވެ. އޭނާ ރޭސް ނިންމީ 5 މިނިޓް 22.48 ސިކުންތުން ރޭސް ނިންމައިގެންނެވެ.

ތިންވަނަ ހޯދީ ރަނިންމޯޑް އެތުލެޓިކްސްގެ އާމިނަތު ޖާއިޝާ ޖުނީޒެވެ. އޭނާ ރޭސް ނިންމީ 5 މިނިޓް 38.95 ސިކުންތުންނެވެ. މި އިވެންޓުގައި ޖުމްލަ 6 އެތުލީޓުން ވާދަކުރިއެވެ.

16 އަހަރުން ދަށުގެ 1500 މީޓަރު ދުވުމުގެ ފިރިހެން ކުދިންގެ އިވެންޓުގެ ޗެމްޕިއަންކަން ހޯދީ ސާއިދު ސްޕޯޓްސްގެ އިސްމާޢީލް މުލްހަމް އާޒިމެވެ. އޭނާ ރޭސް ނިންމީ 4 މިނިޓް 45.10 ސިކުންތުންނެވެ.

ދެވަނަ ހޯދީ އައްޑޫ އެތުލެޓިކްސްގެ އާހިލް އިބްރާހީމް މޫސާއެވެ. އޭނާ ރޭސް ނިންމީ 4 މިނިޓް 52.04 ސިކުންތުންނެވެ.

ތިންވަނަ ހޯދީ ސާއިދު ސްޕޯޓްސްގެ އިބްރާހީމް މަސްރޫރް އަހުމަދެވެ. އޭނާ ރޭސް ނިންމީ 5 މިނިޓް 04.80 ސިކުންތުންނެވެ. މި އިވެންޓުގެ ފައިނަލްގައި ވާދަކުރީ ޖުމްލަ 9 އެތުލީޓުންނެވެ.

16 އަހަރުން ދަށުގެ 1500 މީޓަރު ދުވުމުގެ އަންހެން ކުދިންގެ އިވެންޓުގެ ޗެމްޕިއަންކަން ހޯދީ ސާއިދު ސްޕޯޓްސްގެ ކްލާރާ ސެރީނާ އާސިފެވެ. އޭނާ ރޭސް ނިންމީ 5 މިނިޓް 47.82 ސިކުންތުންނެވެ.

މި އިވެންޓުގެ ދެވަނަ ހޯދީ ސާއިދު ސްޕޯޓްސްގެ ކައިރާ އަފްރާހް ގާސިމެވެ. އޭނާ ރޭސް ނިންމީ 5 މިނިޓް 54.13 ސިކުންތުންނެވެ.

ތިންވަނަ ހޯދީ ޝަރީފް ސްޕޯޓްސްގެ އާމިނަތު އީލާފް ހަސަންއެވެ. އޭނާ ރޭސް ނިންމީ 5 މިނިޓް 58.62 ސިކުންތުންނެވެ. މި އިވެންޓުގެ ފައިނަލްގައި ވާދަކުރީ ޖުމްލަ 12 އެތުލީޓުންނެވެ.