ސީޕްލޭން ޚިދުމަތާއެކު ދެކުނުގެ ލޯކަލް ޓޫރިޒަމަށް ދިރުން

ސީޕްލޭން ޚިދުމަތާއެކު ދެކުނުގެ އަތޮޅުތައް ގުޅާލުމުން އެ ސަރަހައްދުގެ ލޯކަލް ޓޫރިޒަމަށް ދިރުން ލިބިގެންދާނެ ކަމަށް ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ވަޒީރު މިހެން ވިދާޅުވީ، ދެކުނުގެ އަތޮޅުތައް ގުޅާލުމަށް ކުރިއަށްގެންދާ "ދެކުނުގެ ގުޅުން" ޕްރޮޖެކްޓް އިފްތިތާޙު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. ވަޒީރުގެ ވާހަކަފުޅުގައި މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ އަތޮޅުތަކުގެ ރައްޔިތުންނަށް ވެވަޑައިގެންނެވި ވައުދުފުޅުގެ ތަންފީޒީ މަރުޙަލާއެއްްކަން ފާހަގަކުރެއްވިއެވެ.

ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން ވިދާޅުވީ، ގަން އިންޓަރނޭޝަނަލް އެއާޕޯޓަކީ ދުނިޔޭގެ ކޮމާޝަލް އެއާލައިންތަކުގައި ބޭނުންކުރާ ހުރިހާ ސައިޒެއްގެ މަތިންދާ ބޯޓު އޮޕަރޭޓް ކުރެވޭނެ ކެޕޭސިޓީ ހުރި އެއާޕޯޓެއް ކަމަށެވެ. ނަމަވެސް މިހާތަނަށް އެފަދަ މާޙައުލެއް ޤާއިމުވެފައި ނެތީ އެކަށީގެންވާ މިންވަރަށް އެއާލައިން އޮޕަރޭޓް ކުރުމަށް ކުރަންޖެހޭ މަސައްކަތް ކޮށްފައި ނެތުމުން ކަމަށާއި، މިފަދަ އެއަރ ކަނެކްޓިވިޓީ ވަސީލަތެއް ޤާއިމުކުރުމުން ދެކުނުގެ ޓޫރިޒަމް ސްކޯޕް ބޮޑުވެގެންދާނެ ކަމަށްވެސް ވިދާޅުވިއެވެ.

ވަޒީރު ވިދާޅުވީ ސަރުކާރުގެ އަމާޒަކީ ގަން އިންޓަރނޭޝަނަލް އެއާޕޯޓަކީ ދެކުނުގެ ވައިގެ ހަބު ކަމުގައި ހެދުން ކަމަށެވެ.

"މިވަގުތުވެސް އަޅުގަނޑުމެން މިދަނީ، މެދުއިރުމަތީގެ އެއާލައިނަކާއި، ޗައިނާގެ އެއާލައިނެއް ގަން އެއާޕޯޓަށް ގެނައުމަށް މަސައްކަތް ކުރަމުން. ބޮޑެތި ކޮންސެޝަންތަކެއް ދީގެން ނަމަވެސް އެއާލައިންތައް ގެންނަން އެބަޖެހޭ. މި އެއާޕޯޓުގެ ހާލަތު ބަދަލު ކުރާނަން. މި އެއާޕޯޓަކީ އެއާލައިންތައް އަންނަ ރާއްޖޭގެ ވައިގެ ސަދަން ހަބު ކަމުގައި އަޅުގަނޑުމެން ހަދާނަން،" ދަތުރުފަތުރާ ބެހޭ ވަޒީރު ވިދާޅުވިއެވެ.

ވަޒީރު ވިދާޅުވީ، އެއާޕޯޓުތައް ތަރައްޤީ ކުރުމުގެ އިތުރުން ރައީސުލްޖުމްހޫރިއްޔާގެ އިރުޝާދަކީ ހަމައެކަނި އެއާޕޯޓުތަކެއް އެޅުން ނޫން ކަމަށާއި ހުރިހާ ވަސީލަތްތަކުގެ ބޭނުން އެންމެ ފުރިހަމައަށް ހިފައި ރައްޔިތުންގެ ދރިއުޅުމަށް ފަސޭހަކަން ގެނެސްދޭނެ ލާމެހިފައިވާ މަދަނީ ދަތުރުފަތުރުގެ ނިޒާމެއް ޤާއިމުކުރުން ކަމަށެވެ. އަދި ދެކުނުގެ އަތޮޅުތައް ސީޕްލޭންގެ ޚިދުމަތުން ގުޅާލުމުން އެ އަތޮޅަށް އެކި ގޮތްގޮތުން ފައިދާ ކުރާނެ ކަމަށްވެސް ވަޒީރު ވިދާޅުވިއެވެ.

"މީގެ ސަބަބުން މި ސަރަޙައްދުގެ އިޤްތިސާދަށް، ޚާއްޞަކޮށް ލޯކަލް ޓޫރިޒަމަށް އެކަށޭނަ ދިރުމެއް ލިބިގެންދާނެ. ދެކުނުގައި މިހާރު ހުރި 3900 އެއްހާ އެނދަށް ވާސިލްވުމަށް ޓޫރިސްޓުންނަށް މިވަނީ ފަސޭހަ ފުރުސަތުތަކެއް ތަނަވަސްވެފައި. ޑައިވް ކުރުމާއި، ސާފިން އަދި އެކި ކަންކަމަށް އަންނަ ފަތުރުވެރިންނަށް ގަމުން އެހެން އަތޮޅުތަކަށް ދެވޭނެ އިންތިޒާމު މިހާރު މިވަނީ ހަމަޖެހިފައި،" ވަޒީރު ވިދާޅުވިއެވެ.

ވަޒީރު ވިދާޅުވީ، ދެކުނުގައި ސީޕްލޭނަށް ޑިމާންޑް އިތުރުވާނަމަ އިތުރު ބޯޓުތަކާއެކު ދަތުރުތައް އިތުރު ކުރުމަށް ރާވާފައިވާ ކަމަށެވެ. އަދި ކުރިއަށް އޮތްތަނުގައި ގދ. އަތޮޅުގެ ފަރެސްމާތޮޑާ އެއާޕޯޓާއި، މާވަރުލު އެއާޕޯޓުވެސް މި ޚިދުމަތުގެ ތެރެއަށް އިތުރު ކުރެވޭނެ ކަމަށް ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން ވިދާޅުވިއެވެ.