ދުންފުހުގެ ނުރައްކާ ބޮޑުވާތީ ރައްކާތެރިކަމުގެ ފިޔަވަޅު އެޅުމަށް އިލްތިމާސްކޮށްފި

ރާއްޖެއަށް ދުންފުހުގެ އަސަރު ކުރާތީ ރައްކާތެރިކަމުގެ ފިޔަވަޅު އެޅުމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން އިލްތިމާސްކޮށްފިއެވެ.

އެޗްޕީއޭއިން މިގޮތަށް އިލްތިމާސްކުރެއްވީ ރާއްޖޭގެ އެކި ސަރަހައްދުތަކަށް، ޚާއްސަކޮށް މެދު ރާއްޖެ ތެރޭގައި ދުންފުހުގެ އަސަރު ކުރަމުންދާ ކަމަށް މޫސުމާބެހޭ ޤައުމީ އިދާރާގެ ރެކޯޑުތަކުން ދައްކާތީއެވެ.

އެޗްޕީއޭއިން ވިދާޅުވީ ރާއްޖޭގެ ސަރައްޙަދުތަކަށް، ޚާއްޞަކޮށް މެދު ރާއްޖެތެރޭގެ އަތޮޅުތަކަށް ދުންފުހުގެ އަސަރު ވަރަށް ބޮޑަށް ކުރަމުންދާ ކަމަށް މޫސުމާބެހޭ ޤައުމީ އިދާރާގެ ރެކޯޑުތަކުން ދައްކާ ކަމަށެވެ. ކުރިއަށް އޮތް 2 ދުވަހުވެސް މި ދުންފުހުގެ އަސަރު ރާއްޖޭގެ ސަރަޙައްދުގައި ހުންނާނެ ކަމަށް ބެލެވޭ ކަމަށާއި މިކަމާ ގުޅިގެން ރައްކާތެރިކަމުގެ ފިޔަވަޅުތައް އެޅުއްވުމަށް ޚާއްޞަ ސަމާލުކަމެއް ދިނުމަށް އެ އިދާރާއިން ވަނީ އިލްތިމާސްކުރައްވާފައެވެ.

ވައިގެ ސާފުކަން ހުރި މިންވަރު ދައްކައިދޭ "އައިކިއު އެއާ" ގެ މައުލޫމާތުތަކަށް ބަލާއިރު ރާއްޖޭގެ އެންމެ އުތުރުން ކުޅުދުއްފުށި ހިމެނޭ ސަރަހައްދާއި މެދުރާއްޖެތެރޭގެ އިތުރުން ދެކުނުން ފުވައްމުލައް ސިޓީގައި ދުންފުހުގެ ސަބަބުން ވައި ވަނީ ވަރަށް ބޮޑަށް ނުސާފުވެފައެވެ. އެ ސަރަހައްދުތަކުގެ ވައިގެ ކޮލިޓީ ރަތް ސަމާލުގައި ހުރި އިރު އެހެން ސަރަހައްދުތަކުގައިވެސް އެކި މިންވަރަށް ވައި ވަނީ ނުސާފުވެފައެވެ.

ރަތް ސަމާލު ނެރެފައިވާ ސަރަހައްދުތަކުގައި ވައި ނުސާފުވުމުގެ ސަބަބުން ސިއްޙީ ގޮތުން ނޭދެވޭ އަސަރުތައް ކުރުމާއި ފުއްޕާމެއާއި ހިތުގެ ބަލިތައް ބޮޑުވުމުގެ ނުރައްކާ ބޮޑުވާނެއެވެ. އެހެންކަމުން ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން މަޑުޖައްސާލުމަށް ވަނީ އިލްތިމާސްކޮށްފައެވެ. އަދި ބޭރަށް ނުކުންނަ ވަގުތުތަކުގައި މާސްކު އެޅުމަށާއި ބޭރުގެ ނުސާފު ވައި ނުވަންނާނެހެން ގޭގެ ދޮރުތައް ލައްޕާފައި ބެހެއްޓުމަށާއި އެއަރ ޕިއުރިފަޔަރ ބޭނުންކުރުމަށްވެސް އެޗްޕީއޭއިން އިލްތިމާސްކުރައްވައެވެ.

މޫސުމާއި ބެހޭ ޤައުމީ އިދާރާއިން ދުންފުހާއި ގުޅިގެން ނެރެފައިވާ ސަމާލުގައި ވިދާޅުވީ، ދުންފުހުގެ އަސަރު ރާއްޖޭގެ ހުރިހައި ސަރަހައްދަކަށްވެސް ކުރާނެ ކަމަށެވެ. ވޭތުވެ ދިޔަ 7 ދުވަހަށް ބަލާއިރު، ދުންފުހުގެ އަސަރު އެންމެ ބޮޑަށް ކޮށްފައިވަނީ މިއަދު ކަމަށާއި މީގެ ސަބަބުން ދުރުފެންނަ މިންވަރު 2 ކިލޯމީޓަރަށް ދަށްވެފައިވާ ކަމަށް އެއިދާރާއިން ވިދާޅުވިއެވެ.