ކުރިޔަށް އޮތް ދެމެޗަށް ނިކުންނާނީ ވަރަށް ރަނގަޅަށް ތައްޔާރުވެގެން

މިވަގުތަކީ އިތުރަށް މަސައްކަތް ރަނގަޅު ކުރަން ޖެހޭ ވަގުތު ކަމަށާއި، ކުރިޔަށް އޮތް ދެ މެޗަށް ނިކުންނާނީ ވަރަށް ރަނގަޅަށް ތައްޔާރުވެގެން ކަމަށް ކުލަބު ގްރީން ސްޓްރީޓްސްގެ ކޯޗި އަލީ ނިސްތާރު މުހައްމަދު ބުނެފިއެވެ.

ދިރާގު ދިވެހި ޕްރިމިއާ ލީގުގައި އެންމެ ފަހުން ޔުނައިޑެޓް ވިކްޓްރީއާއި ދެކޮޅަށް ކުޅުނު މެޗަށްފަހު ޕީއެސްއެމް ނިއުސްއަށް ދިން އިންޓަވިއުއެއްގައި ނިސްތާރު ބުނީ އެ މެޗުގައި ކުޅުނީ ގިނަ ލަނޑުތަކެއް ޖަހަން ނޫން ކަމަށާއި މޮޅަކަށް ވިސްނައިގެން ކަމަށެވެ. އަދި ހުރިހާ ކުޅުންތެރިންވެސް ވަރަށް މަސައްކަތް ކުރިކަމަށާއި، އެ މެޗު ކާމިޔާބުކުރުމުން ހުރިހާ ކުޅުންތެރިންނަށްވެސް ޝުކުރު އަދާ ކުރާ ކަމަށެވެ.

އެހެންނަމަވެސް އަދިވެސް ޓީމުގައި އިތުރަށް ރަނގޅު ކުރަން ޖެހޭ ބައިވަރު ކަންކަން އެބަހުރި ކަމަށާއި، ޓީމަށް އައު ޓެކްނިކަލް ޑައިރެކްޓަރެއް ލިބުމުން ކުޅުން ބައްޓަން ކުރީ އޭނާގެ އިރުޝާދުގެ ދަށުން ކަމަށްވެސް ނިސްތާރު ބުންޏެވެ.

އިދިކޮޅުން ނިކުންނަ ޓީމުތައް އޮތީ ވަރަށް ފޯމުގައި ކަމަށާއި، ދެން އޮތް ދެ މެޗު ފަސޭހަ ނުވާނެކަން ފާހަގަކޮށް ނިސްތާރު ބުނީ މިހާރު މިއޮތީ ބުރަ މަސައްކަތް ކުރަންވި ވަގުތު ޖެހިފައި ކަމަށެވެ.

"އިތުރަށް ހާޑް ވޯކް ކުރން ފަށަންވީ ގަޑި އަސްލު މީ . ރައިވަލްވެސް ތިބީ ވަރަށް ފޯމުގައި" ނިސްތާރު ބުންޏެވެ.

ކުލަބު ގްރީން ސްޓްރީޓްސްއިން ލީގުގައި އެންމެ ފަހުން ކުޅުނު މެޗު ގްރީން އިން ކާމިޔާބު ކުރީ 1-0 ގެ ނަތީޖާއަކުންނެވެ. އެ މެޗު ދިޔައީ ގްރީން ސްޓްރީޓްސްއިން ޕްލޭން ކުރި ގޮތަށް ކަމަށާއި، އެހެންނަމަވެސް ދެން އޮތް ދެ މެޗަށް ވަރަށް ރަނގަޅަށް ތައްޔާރުވާން ޖެހޭނެ ކަމަށް ނިސްތާރު ބުންޏެވެ.

ކުލަބު ގްރީން ސްޓްރީޓްސްގެ ޓެކްނިކަލް ޑައިރެކްޓަރަށް ހަމަޖައްސާފައިވަނީ ތަޖުރިބާކާރު ކޯޗު މުޙައްމަދު ޝާޒްލީއެވެ. ޝާޒްލީގެ އިރުޝާދުގެ ދަށުން ފަރިތަކުރުންތައް ބާއްވައިގެން ޔޫވީ މެޗަށް ނުކުތް އިރުވެސް ތާވަލުގެ 8 ވަނައިގަ އޮތް ގްރީން ވަނީ އެ މަގާމުގައި އޮވެ 11 ޕޮއިންޓު ހަމަކޮށްފައެވެ. އެންމެ ޕޮއިންޓެއްގެ ތަފާތުން ޓީސީ މިވަގުތު ތާވަލުގެ 7 ވަނައިގައި އޮތް އިރު ގްރީން އަށް ވުރެ ފަހަތުން ތާވަލުގެ 9 ވަނައިގަ ވެލެންސިއާ އޮތީ 8 ޕޮއިންޓާއެކުވެ.

ގަލޮޅު ރަސްމީ ބޯޅަ ދަނޑުގައި ޔޫވީ އާއި ގްރީން ބައްދަލުކުރި މެޗުގެ ކުރީކޮޅު ގްރީން އިން ވަނީ ގިނަ ހަމަލާތަކެއް އުފައްދައި، އެޓޭކްގައި ރަނގަޅު މަސައްކަތްތަކެއް ކޮށްފައެވެ. ގްރީން އިން ލަނޑު ޖެހީ މެޗުގެ 22 ވަނަ މިނިޓުގައި ޝަހާއު ދިން ބޯޅައެއްގައި އަންސަރު އިބްރާހިމް އޭރިއާ ތެރެއަށް ވަދެ އަރިމަތިން ގޯލުތެރެއަށް ވައްދައިލައިގެންނެވެ.