ޔޫއެފާ ޗެމްޕިއަންސް ލީގުގައި ރޭ ޑެންމާކްގެ ކޯޕަންހޭގަން އާއި ދެކޮޅަށް ބާސެލޯނާ ކުޅުނު މެޗު 4-1 ގެ ނަތީޖާއަކުން ބާސެލޯނާ މޮޅުވެ ދެވަނަ ބުރުގެ ޖާގައެއް ހޯދައިފި އެވެ.
މި ނަތީޖާ އާއިއެކު ބާސެލޯނާ އަށް ވަނީ ފުރަތަމަ ބުރުގައި ކުޅުނު 8 މެޗުން ޖުމްލަ 16 ޕޮއިންޓާއެކު ތާވަލުގެ ފަސްވަނަ މަގާމް ލިބިފަ އެވެ. ކޯޕަންހޭގަން އަށް ލިބިފައިވާ 8 ޕޮއިންޓާއެކު އެ ޓީމު ވަނީ މުބާރާތުން ކަޓާފަ އެވެ.
ބާސެލޯނާގެ ނޫކޭމްޕްގައި ކުޅުނު މި މެޗުގެ ހަތަރުވަނަ މިނިޓުގައި ކޯޕަންހޭގަންގެ ޑައޮއާސަން ވަނީ ލަނޑެއް ޖަހާ ބާސެލޯނާ ސިއްސުވާލާފަ އެވެ.
މެޗުގެ ދެވަނަ ހާފުގެ ކުޅުން ފެށުނުއިރުވެސް 1-0 ގެ ނަތީޖާއަކުން ކޯޕަންހޭގަން ކުރީގައި އޮތްއިރު ބާސެލޯނާ އިން މެޗުގެ ނަތީޖާ އެއްވަރު ކޮށްފައިވަނީ މެޗުގެ 48 ވަނަ މިނިޓުގައި ލަމީން ޔަމާލް ދިން ޕާހަކުން ރޮބަޓް ލެވަންޑޯސްކީ ކާމިޔާބުކޮށްދިން ލަނޑުންނެވެ.
ބާސެލޯނާ އިން މި މެޗުގައި ފުރަތަމަ ފަހަރަށް ކުރި ހޯދާފައިވަނީ މެޗުގެ 60 ވަނަ މިނިޓުގައި ލަމީން ޔަމާލް ޖެހި ލަނޑުންނެވެ. އަދި އޭގެ 9 މިނިޓު ފަހުން ބާސެލޯނާ އަށް ލިބުނު ޕެނަލްޓީ އަކުން ރަފީނިއާ ވަނީ ލަނޑެއް ޖަހާފަ އެވެ.
މި މެޗުގައި ބާސެލޯނާ އިން ޖެހި ހަތަރުވަނަ ލަނޑަކީ މެޗުގެ ފުރިހަމަ ވަގުތު ހަމަވާން ފަސް މިނިޓަށް ވެފައިވަނިކޮށް މާކަސް ރަޝްފޯޑް ކާމިޔާބުކޮށްދިން ލަނޑެކެވެ.