ސަޓާ އެވޯޑަށް ކުރިމަތިލުމުގެ ފުރުސަތު ހުޅުވާލައިފި

ދެކުނު އޭޝިއާގެ ފަތުރުވެރިކަމުގެ ސިނާޢަތުގައި ދޭ އެންމެ ޝަރަފުވެރި އެއް އެވޯޑު ކަމަށްވާ ސައުތު އޭޝިއަން ޓްރެވަލް އެވޯޑްސް، ސަޓާ އެވޯޑަށް ކުރިމަތިލުމުގެ ފުރުޞަތު ހުޅުވާލައިފިއެވެ.

މިއީ ސަޓާ އެވޯޑް ބާއްވާ 10 ވަނަ އަހަރެވެ. މި އަހަރުގެ އެވޯޑު ހަފުލާ ބޭއްވުމަށް ހަމަޖެހިފައިވަނީ އަވައްޓެރި ސްރީލަންކާގެ ވެރިރަށް ކޮލަމްބޯގައެވެ.

ސަޓާ އެވޯޑަށް ކުރިމަތިލުމަށް އެޕްލިކޭޝަން ހުށަހެޅުމުގެ ފުރުސަތުވަނީ އަންނަ އެޕްރީލް މަހުގެ 25 ވަނަ ދުވަހުގެ ނިޔަލަށް ހުޅުވާލާފައެވެ. އެޕްލިކޭޝަން ހުށަހަޅަށް ޖެހެނީ ސަޓާ ވެބްސައިޓު މެދުވެރިކޮށެވެ.

މި އަހަރު ބާއްވާ ދިހަވަނަ ސަޓާ އެވޯޑާއެކު ދާއިރާއަށް މުހިންމު ދެ ކެޓަގަރީއެއް އަލަށް ތައާރަފުކުރުމަށް ވަނީ ނިންމާފައެވެ. އެއީ އެންމެ މޮޅު ޝެފްގެ ކެޓަގަރީއާއި އެންމެ މޮޅު ޒުވާން ހޮޓެލިއާގެ ކެޓަގަރީއެވެ. ޒުވާން ހޮޓެލިއާގެ ކެޓަގަރީއަށް ކުރިމަތިލުމުގެ ޝަރުތަކީ 40 އަހަރު ފުރިފައިނުވުމެވެ.

ސަޓާ އެވޯޑަކީ މުޅި ދެކުނު އޭޝިއާ ސަރަހައްދުގައި ބާއްވާ އެންމެ ބޮޑު އެއް ޓްރެވަލް އެވޯޑެވެ. މި އެވޯޑަށް ސަރަހައްދުގެ ފަތުރުވެރިކަމާ ބެހޭ މައި 15 އިދާރާއަކުން އިތުބާރުކުރެއެވެ. އޭގެ ތެރޭގައި ރާއްޖޭގެ ވިޒިޓް މޯލްޑިވްސް ކޯޕަރޭޝަނާއި، ޓްރެވަލް އޭޖެންޓުންގެ އެސޯސިއޭޝަން، އާޓާ އަދި ބޯޓިން އެސޯސިއޭޝަންގެ އިތުރުން ސްރީލަންކާގެ ހޮޓެލްތަކުގެ އެސޯސިއޭޝަން ހިމެނެއެވެ.

ވޭތުވެދިޔަ އަހަރުތަކުގައި މި އެވޯޑު ހަފުލާ ވަނީ ރާއްޖެ، ސްރީލަންކާ، އިންޑިއާ އަދި ނޭޕާލް ފަދަ ގައުމުތަކުގައި ބާއްވާފައެވެ. މި ހަފުލާއަކީ ބޭރުގެ އެކި މީޑިއާތަކާއި ޓްރެވަލް ދާއިރާގެ އިސްވެރިންގެ ބޮޑު ސަމާލުކަމެއް ލިބޭ ބައިނަލްއަގުވާމީ ފެންވަރުގެ ހަރަކާތެކެވެ.

އެކި ކެޓަގަރީތަކުން އެވޯޑު ލިބޭ ފަރާތްތައް ކަނޑައެޅުމުގައި އަމަލުކުރާނީ ވަރަށް ދެފުށް ފެންނަ އުސޫލަކުންނެވެ. އެގޮތުން އެވޯޑުތައް ހޮވާނީ ޓްރެވަލް ދާއިރާގެ މާހިރުންނާއި ތަޖުރިބާކާރު ފަނޑިޔާރުންގެ ޕެނަލަކުން ކުރިއަށްގެންދާ ފުރިހަމަ އިވެލުއޭޝަނަކަށް ފަހުގައެވެ.

ސަޓާ އެވޯޑް އިފްތިތާހްކޮށްފައިވަނީ 2016 ވަނަ އަހަރުއެވެ. ސަޓާ އެވޯޑް ދިނުމުގެ މަޤްޞަދަކީ ދެކުނު އޭޝިއާގެ އެންމެ މޮޅު މެހެމާންދާރީގެ އަގު ވަޒަންކުރުމެވެ. މިއެވޯޑް ދިނުމުގެ ހަރަކާތް ކޮންމެ އަހަރަކުވެސް ކުރިއަށް ދާއިރު، ދެކުނުގެ އޭޝިއާގައި ފަތުރުވެރިކަމުގެ ސިނާޢަތުގައި ހަރަކާތްތެރިވާ ގިނަ އަދަދެއްގެ މުއައްސަސާތަކާއި ޖަމްޢިއްޔާ ޖަމާޢަތްތައް ބައިވެރިވެއެވެ.