ގައުމީ ޓީމަށް މަރްހަބާ ކިއުމަށް ވީހާވެސް ގިނަ ރައްޔިތުން ބައިވެރިވުން އެދެން: ވަޒީރު

މާދަމާރޭ 21:30 ގައި ވީހާވެސް ގިނަ ރައްޔިތުން އާޓިފިޝަލް ބީޗަށް ގޮސް ގައުމީ ޓީމަށް މަރްހަބާ ކިއުމަށް ބާއްވާ ހަރަކާތްތަކުގައި ބައިވެރިވުމަށް ކުޅިވަރާއި ހަށިހެޔޮ ކަމާއި ބެހޭ ވަޒީރު އަބުދުﷲ ރާފިޢު އެދިވަޑައިގެންފިއެވެ.

ގައުމީ ޓީމަށް ވެލާނާ އިންޓަނޭޝަނަލް އެއަޕޯޓުން ހޫނު މަރުހަބާއެއް ކިއުމަށްފަހު މާލެ އައިސް އާންމުންނާއެކު އުފާފާޅުކުރުން ކުރިޔަށްދާނީ އާޓިފިޝަލް ބީޗުގައެވެ. ހަވާއެރުވުމާއި، ބޮޑުބެރުގެ ހަރަކާތްތަކާއި އެކު ފޯރިއާއި ޖޯޝުގައި ގައުމީ ޓީމުގެ ކާމިޔާބީ ފާހަގަކުރުމަށް ހަމަޖެހިފައިވާއިރު ވަޒީރު ވިދާޅުވީ މި ހަރަކާތުގައި ވީހާވެސް ގިނަ ކުދި ބޮޑު ރައްޔިތުން ބައިވެރިވުމަކީ ވަރަށް ބޮޑު އެދުމެއް ކަމަށެވެ.

ރާއްޖޭގެ ގައުމީ ފުޓްސަލް ޓީމުން ހޯދި މި ތާރީހީ ކާމިޔާބީ ފާހަގަކުރުމަށް ހަމަޖެހިފައިވާއިރު ރައީސުލްޖުމްހޫރިއްޔާ ގައުމީ ޓީމަށް ދެއްވާ ފައިސާގެ އިނާމުގެ ކަންކަންވެސް މާދަމާ ހަމަޖެހޭނެ ކަމަށް ވަޒީރު ވިދާޅުވިއެވެ.

އެފްއޭއެމް އާއި ކުޅިވަރު ވުޒާރާއިން ގައުމީ ޓީމުގެ ކާމިޔާބީ ފާހަގަކުރުމަށް ހަރަކާތްތައް ރާވާފައިވާއިރު ކުޅިވަރު ވަޒީރު ވިދާޅުވީ މިއީ ރާއްޖޭގެ ގައުމީ ޓީމުން އެއްވެސް މެޗަކުން ބަލި ނުވެ ހޯދި ވަރަށް ފުރިހަމަ ކާމިޔާބީއެއް ކަމަށެވެ. އަދި ސާފްގެ ފުޓްސަލްގެ ފުރަތަމަ ތަށި ރާއްޖެއަށް ގެނެސްދީ މުބަރާތުގައި ދިވެހި ކުޅުންތެރިން ދެއްކި މޮޅު ކުޅުމާމެދު ފަހުރުވެރިވަޑައިގަންނަވާ ކަމަށާއި، ހުރިހާ ކުޅުންތެރިންގެ މި ކާމިޔާބީ ސަރުކާރުން ވަރަށް ކުލަގަދަކޮށް ފާހަގަކުރަން ބޭނުންވާ ކަމަށެވެ.

ގައުމީ ފުޓްސަލް ޓީމުން ސާފް ޗެމްޕިއަންޝިޕަށް ދިޔައީ ހުރިހާ މެޗެއް ކާމިޔާބުކޮށް ރާއްޖެއަށް ތަށި ގެނެސްދިނުމުގައި އަޒުމުގައެވެ. އަދި އިންޑޯ ފެސިލިޓީއެއް ނެތިވެސް ރާއްޖޭގައި ފަރިތަކުރުންތައް ބާއްވާ ޗައިނާއިގައި އިންޑޯ ކޭމްޕެއް ބޭއްވުމަށްފަހު ގައުމީ ޓީމު ތައިލޭންޑަށް ދިޔައީ މުބާރާތަށް ވަރަށް ފުރިހަމައަށް ތައްޔާރުވެގެންނެވެ.

މުބާރާތުގެ ހުރިހާ މެޗެއް ކާމިޔާބުކޮށް 18 ޕޮއިންޓް ހޯދައިގެން ރާއްޖެއިން މުބާރާތް ނިންމާލިއިރު މިއީ މި ސަރަހައްދުގެ އެންމެ ގަދަ ބާރުތައް ފަހަތަށް ޖައްސާލާ ރާއްޖޭން ފުޓްސަލްގެ އެއްވަނަ ހޯދާ މުޅި ސަރަހައްދު ހައިރާންކޮށްލި ފަހަރެވެ.

މިއީ ރާއްޖެއަށް ސަރަހައްދީ މުބާރާތަކުން ފުޓްސަލްގައި ލިބުނު ފުރަތަމަ ތަށި ކަމަށްވާއިރު ރާއްޖޭގެ ކުޅުންތެރިން މި މުބާރާތަށް ތައްޔާރުކޮށްދިނީ އުޒްބަކިސްތާނުގެ ގައުމީ ޓީމުގެ ކޯޗު ފަރޫކް ޒަކީރޯވްއެވެ.

ރާއްޖޭގެ ފުތްސަލް ޓީމުން ހޯދި ކާމިޔާބީ ފާހަގަ ކުރުމަށް މާދަމާ ހާއްސަ ހަރަކާތްތައް ރާވާފައިވާއިރު ކުޅުންތެރިން ޓްރޮފީއާއެކު އާޓިފިޝަލް ބީޗަށް އަންނާނީ އެއާޕޯޓުން މާލެ އައުމަށްފަހު ޕިކަޕެއްގައި އަމީނީ މަގުން ގޮސް ރަސްފަންނު ސަރަހައްދުން އައިސް މަޖީދީމަގުންނެވެ.

އަމީނީ މަގާއި މަޖީދީ މަގުން ގައުމީ ޓީމު ތައްޓާއެކު އާޓިފިޝަލް ބީޗަށް ދަތުރުކުރާއިރު މަގުތަކަށް ނިކުމެ އާންމުން ގައުމީ ޓީމަށް މަރުހަބާ ކިއުން އޮންނާނެއެވެ. އަދި އާޓިފިޝަލް ބީީޗުގައި ތައްޓާއެކު ފޮޓޯ ނެގުމާއި، ގައުމީ ޓީމުގެ ކުޅުންތެރިންނާއެކު ފޮޓޯ ނެގުމުގެ ފުރުސަތު އާންމުންނަށް އޮންނާނެއެވެ.