ޤައުމީ ފުޓްސަލް ޓީމަށް މަރުޙަބާ ކިއުމަށް ޚާއްސަ ހަރަކާތްތަކެއް
-
ޤައުމީ ޓީމު ރާއްޖެ އައުމަށް ހަމަޖެހިފައިވަނީ މާދަމާރޭ
-
ޓީމުން ހޯދި ފަޚުރުވެރި ކާމިޔާބީ ފާހަގަ ކުރުމަށް އެއާޕޯޓާއި މާލޭގައިވެސް ރަކާތްތަކެއް ރާވާފަ
ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގެ ތައްޓާއެކު ރާއްޖޭގެ ޤައުމީ ޓީމު ރާއްޖެ އައުމުން ހޫނު މަރުޙަބާއެއް ކިއުމަށް ގިނަ ހަރަކާތްތަކެއް ބައްވަން ނިންމައިފިއެވެ.
ޤައުމީ ޓީމު ރާއްޖެ އައުމަށް ހަމަޖެހިފައިވަނީ މާދަމާރެއެވެ. ކުޅިވަރު ވުޒާރާއި ފުޓުބޯޅަ އެސޯސިއޭޝަން ގުޅިގެން ޓީމަށް މަރުހަބާ ކިއުމަށް ހަމަޖެހިފައިވާއިރު ވީހާވެސް ގިނަ ރައްޔިތުން މި ހަރަކާތްތަކުގައި ބައިވެރިވުމަކީ ސަރުކާރުގެ އެދުމެކެވެ.
އުޒްބަކިސްތާނުގެ ކޯޗު ފަރޫކް ޒަކިރޯވްގެ އިރުޝާދުގެ ދަށުން ސަރަހައްދީ މުބާރާތްތަށް ނިކުތް ޤައުމީ ޓީމުން ހޯދި ފަޚުރުވެރި ކާމިޔާބީ ކުލަގަދަކޮށް ފާހަގަ ކުރުމަށް މާދަމާރޭ އެއާޕޯޓާއި މާލޭގައިވެސް ޚާއްސަ ހަރަކާތްތަކެއް ވަނީ ރާވާފައެވެ.
ވެލާނާ އިންޓަނޭޝަނަލް އެއާޕޯޓުގެ ވީއައިޕީން ކުޅުންތެރިންނަށް މަރުހަބާ ދެންނެވުމަށްފަހު ކުޅުންތެރިން މާލެ އައިސް އަމީނީ މަގާއި މަޖީދީމަގުން ތައްޓާއެކު ޕިކަޕުގައި ދަތުރު ކުރުމަށް ވަނީ ހަމަޖެހިފައެވެ. އަދި އާޓިފިޝަލް ބީޗުގައި ޓީމަށް މަރުޙަބާ ކިއުމުގެ ޚާއްސަ ހަރަކާތްތަކެއް ކުރިޔަށް ގެންދިއުމަށް ވަނީ ހަމަޖެހިފައެވެ.
ގައުމީ ފުޓްސަލް ޓީމުން ހޯދި ތާރީޚީ ކާމިޔާބީ ފާހަގަކުރުމަށް މާދަމާރޭ 10:00 ގައި ހަވާ އެރުވުމަށްވެސް ވަނީ ހަމަޖެހިފައެވެ.
ސާފް ފުޓްސަލް ޗެމްޕިއަންޝިޕް ރާއްޖެއިން ކާމިޔާބުކުރީ ކުޅުނު ހުރިހާ މެޗެއް ކާމިޔާބުކޮށް ސަރަހައްދުގެ ގަދަ ބާރުތައް ފަހަތަށް ޖައްސާލުމަށްފަހުގައެވެ. ޤައުމީ ޓީމުގެ މި ކާމިޔާބީއާ ގުޅިގެން ރައީސުލްޖުމްހޫރިއްޔާ ވަނީ ޤައުމީ ޓީމުގެ ކުޅުންތެރިންނަށް އެއް މިލިއަން ރުފިޔާ ދޭން ނިންމަވާފައެވެ.
ގައުމީ ޓީމަށް މަރުހަބާ ކިއުމަށް ބާއްވާ ހަރަކާތްތައް ޕީއެސްއެމްގެ ޗެނަލްތަކުން ވަގުތުން ގެނެސްދޭނެއެވެ.