ރުޤްޔާކުރުމުގެ ނަމުގައި ޖިންސީ ގޯނާކުރި ބަޔަކު ދިގު މުއްދަތަކަށް ޖަލަށް!

ރުޤްޔާކުރުމުގެ ނަމުގައި އަންހެނަކާއި ކުޑަކުދިންތަކަކަށް ޖިންސީ ގޯނާކުރި ބައެއްގެ މައްޗަށް ކުށް ސާބިތުވެ، ދިގު މުއްދަތަކަށް ޖަލަށްލުމަށް ހުކުމްކޮށްފިއެވެ.

މިއީ 2020 ވަނަ އަހަރު އެކި ދުވަސްމަތިން، އަންހެނަކާއި، އުމުރުން 18 އަހަރު ނުފުރޭ 3 ކުދިންނަށް ރުޤްޔާ ކުރުމުގެ ނަމުގައި ޖިސްމާނީ ހާނިކަކޮށް، ޖިންސީ ގޯނާކޮށްފައިވާ މައްސަލާގައި އުފުލި ދައުވާތަކެކެވެ. މި ދައުވާތައް އުފުލާފައިވަނީ ރ.ކަނދޮޅުދޫ، މިރިހިމާގެ އިސްމާޢީލް ވަޙީދާއި، ރ. ކަނދޮޅުދޫ، ދިލްސާދުއާގެ މުޙައްމަދު އަޞީލްގެ މައްޗަށެވެ. އެ މީހުންގެ މައްޗަށް ކްރިމިނަލް ކޯޓުގައި 12 ދައުވާއެއް އުފުލީ 30 ޑިސެންބަރު 2020ގައެވެ.

މި މައްސަލާގައި ކްރިމިނަލް ކޯޓަށް ހުށަހެޅި 12 ދަޢުވާވެސް ސާބިތުވާކަމަށް 31 ޑިސެންބަރު 2025 ގައި ކޯޓުން ޙުކުމްކުރައްވައި އަދަބު ކަނޑައަޅުއްވާފައިވެއެވެ.

މުޙައްމަދު އަޞީލްގެ މައްޗަށް ސާބިތުވި ދަޢުވާތަކާއި ކަނޑައެޅުނު އަދަބު:
1. ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަޞްދުގައި އަތްލުން / 11 އަހަރަށް ޖަލަށްލުން

2. ކުޑަކުއްޖެއްގެ ޙާޟިރުގައި، ކުޑަކުއްޖަކަށް ދެއްކުމުގެ ނިޔަތުގައި ނުވަތަ ކުޑަކުއްޖަކަށް ފެންނާނެ ކަމަށް ޤަބޫލުކޮށްގެން ޖިންސީ ޢަމަލެއް ކުރުން / 07 އަހަރަށް ޖަލަށްލުން

3. ޖިންސީ ގޯނާކުރުން / 3 އަހަރަށް ޖަލަށްލުން

4. ކުޑަކުއްޖެއް އެކްސްޕްލޮއިޓް ކުރުން / 3 އަހަރަށް ޖަލަށްލުން

5. ހުއްދަނޫން ގޮތުގައި މީހުން ހިފެހެއްޓުން / 01 އަހަރާއި 07 މަހާއި 06 ދުވަހަށް ޖަލަށްލުން

6. އަނިޔާއެއް ދިނުން / 02 މަހާއި 12 ދުވަހަށް ޖަލަށްލުން

7. ގައިގައި އަތްލުން / 01 މަހާއި 06 ދުވަހަށް ޖަލަށްލުން

ޖުމްލަ އަދަބު

25 އަހަރާއި 10 މަހާއި 24 ދުވަހަށް ޖަލަށްލުން

އިސްމާޢީލް ވަޙީދުގެ މައްޗަށް ސާބިތުވި ދަޢުވާތަކާއި ކަނޑައެޅުނު އަދަބު:

1. ކުޑަކުއްޖަކާމެދު އިހުމާލުވުމުގެ ކުށް / 03 އަހަރަށް ޖަލަށްލުން

2. މީހަކު ނުވަތަ ބަޔަކު ކުޑަކުއްޖަކާމެދު އެކްސްޕްލޮއިޓޭޝަންގެ ޢަމަލެއް ހިންގާކަން އެނގިހުރެ އެކުށް ރިޕޯރޓްނުކުރުން / 02 އަހަރަށް ޖަލަށްލުން

3. ހުއްދަނޫން ގޮތުގައި މީހުން ހިފެހެއްޓުން / 01 އަހަރާއި 07 މަހާއި 06 ދުވަހަށް ޖަލަށްލުން

4. ގައިގައި އަތްލުން 1 މަހާއި 06 ދުވަހަށް ޖަލަށްލުން

5. ގައިގައި އަތްލުން / 01 މަހާއި 06 ދުވަހަށް ޖަލަށްލުން

ޖުމްލަ އަދަބު

6 އަހަރާއި 9 މަހާއި 18 ދުވަހަށް ޖަލަށްލުން