އިންޑިޔާގެ ކުންފުނިތަކުގައި މަސައްކަތް ކުރުމަށް އެދޭ ޗައިނާގެ ފަންނީ މުވައްޒަފުންނަށް ވިޔަފާރި ވިސާ ހޯދުމުގައި ލުއިފަސޭހަ ގޮތްތަކެއް އިންތިޒާމު ކޮށްފައިވާ ކަން އިންޑިޔާ ސަރުކާރުން އިޢުލާނު ކޮށްފިއެވެ. އިންޑިޔާއިން ބިޒްނަސް ވިސާ ހޯދުމުގައި ލުއިފަސޭހަ އިންތިޒާމުތަކެއް ހަމަޖައްސައިދީފައި ވަނީ، އެ ޤައުމުގައި އުފެއްދުންތެރި ކަމުގެ ދާއިރާގައި ޚިދުމަތް ކުރުމަށް އެދޭ ޗައިނާގެ ފަންނީ މުވައްޒަފުންނަށެވެ. އޭގެ ތެރޭގައި އިންޖިނޭރުންނާއި ޓެކްނީޝަނުން ހިމެނޭނެއެވެ.
އިންޑިޔާގެ ދާޚިލީ ވިޔަފާރިއާ ބެހޭ އިދާރާއިން ބުނީ، ޗައިނާއިން ފަންނީ މުވައްޒަފުން ހޯދުމަށް އެދޭ އިންޑިޔާގެ ކުންފުނިތަކަށް ޚާއްޞަކޮށްގެން އޮންލައިން މަންސައެއް ހުސްވި މަހު ތައާރަފު ކޮށްފައިވާނެ ކަމުގައެވެ. އަދި، ޗައިނާގެ ފަންނީ މީހުން އިންޑިޔާއަށް އެތެރެވުމަށް ބޭނުންވާ ވިސާއަށް އެދި ހުށަހެޅުމަށް ލުއިފަސޭހަ އިންތިޒާމުތަކެއް ހަމަޖައްސައިދީފައިވާނެ ކަމުގައެވެ.
ޗައިނާގައި އުފައްދާ މެޝިންތައް ބޭނުން ކުރާ އިންޑިޔާގެ ކުންފުނިތަކުގެ މުވައްޒަފުން ތަމްރީނު ކުރުން ފަދަ ކަންކަމަށް އެ ކުންފުނިތަކުން ޗައިނާގެ ފަންނީ މުވައްޒަފުންނަށް ބަރޯސާވެއެވެ. 2020ވަނަ އަހަރުގެ މެދުތެރޭގައި އިންޑިޔާއާއި ޗައިނާ ގުޅޭ ސަރަޙައްދީ ރޮނގު ކައިރީގައި ދެ ޤައުމުގެ ފައުޖުތަކުގެ ދެމެދުގައި ހިނގި ޙަމަލާ ބަދަލު ކުރުންތަކާ ގުޅިގެން އިންޑިޔާއިން އޮތީ ޗައިނާގެ ރައްޔިތުންނަށް އެ ޤައުމަށް އެތެރެވުމަށް ހުރަސްތަކެއް ކުރިމަތި ކޮށްފައެވެ. ނަމަވެސް، އެ ނިންމުން ބަދަލު ކޮށްފައި މި ވަނީ މި އަހަރުގެ ތެރޭގައި ބޮޑުވަޒީރު ނަރެންދްރަ މޯދީ ޗައިނާއަށް ވަޑައިގަންނަވައި، އެ ޤައުމުގެ ރައީސް ޝީ ޖިންޕިންގްއާ އެކު ބޭއްވެވި މަޝްވަރާތަކަށް ފަހުއެވެ.