އިނގިރޭސި ޕްރިމިއާ ލީގުގައި ރޭ ފުލަމް އާއި ދެކޮޅަށް ޓޮޓްނަމް ހޮޓްސްޕަރ ކުޅުނު މެޗުން 2-1 ގެ ނަތީޖާ އަކުން ޓޮޓްނަމް ހޮޓްސްޕަރ ބަލިވެއްޖެ އެވެ.
ލަންޑަނުގެ ޓޮޓްނަމް ހޮޓްސްޕަރ ސްޓޭޑިއަމްގައި ފަސްދޮޅަސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ ދެވަނަ މިނިޓުގައި ފުލަމް އިން ވަނީ ލަނޑެއް ޖަހާ ކުރި ހޯދާފަ އެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ކެނީ ޓޭޓް އެވެ.
އަދި އޭގެ ދެ މިނިޓު ފަހުން ޓޮޓްނަމް ހޮޓްސްޕަރގެ ގޯލުކީޕަރު ވިކާރިއޯ ހެދި ގޯހަކުން ހެރީ ވިލްސަން ވަނީ އިތުރު ލަނޑެއް ޖަހާ މެޗުގެ ނަތީޖާ 2-0 އަށް ބަދަލުކޮށްފަ އެވެ.
ފުލަމް އިން ދެ ލަނޑުގެ ލީޑެއްގައި އޮވެ ކުޅެމުންދިޔައިރު މެޗުގެ ފުރަތަމަ ހާފުގައި އެ ޓީމަށް ވަނީ ލަނޑު ޖަހާނެ އިތުރު ފުރުސަތުތަކެއް ލިބިފަ އެވެ. އެގޮތުން އެ ޓީމުގެ ފޯވަޑް ސެމުއެލް ފޮނުވާލި ބާރު ހަމަލައެއް ވަނީ ގޯލުގެ ދަނޑިއަށް އަމާޒުވެފަ އެވެ.
ތޯމަސް ފްރޭންކްގެ އިރުޝާދުގެ ދަށުން ކުޅެމުންދިޔަ ޓޮޓްނަމް ހޮޓްސްޕަރ އިން މި މެޗުގައި ޖެހި ހަމައެކަނި ލަނޑު މެޗުގެ 59 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ މުހައްމަދު ކުޑޫސް އެވެ.
މި ނަތީޖާ އާއިއެކު ފުލަމް އަށް ވަނީ ލީގުގައި މިހާތަނަށް ކުޅުނު 13 މެޗުން ޖުމްލަ 17 ޕޮއިންޓާއެކު ތާވަލުގެ 15 ވަނަ މަގާމް ލިބިފަ އެވެ. ޓޮޓްނަމް އަށް ލިބިފައިވާ 18 ޕޮއިންޓާއެކު އެ ޓީމު އޮތީ ތާވަލުގެ 10 ވަނައިގަ އެވެ.
މި މެޗުން ފުލަމް މޮޅުވެފައިވާއިރު މިއީ ފާއިތުވެދިޔަ 12 އަހަރުގެ ތެރޭގައި ޓޮޓްނަމްގެ ދަނޑުގައި އެ ޓީމު އަތުން ފުލަމް މޮޅުވި ފުރަތަމަ ފަހަރެވެ. އަދި މިއީ މި ސީޒަނުގައި ރަށުން ބޭރުގައި ފުލަމް މޮޅުވި ފުރަތަމަ މެޗުވެސްމެ އެވެ.