ނިއުރޭޑިއަންޓަކީ ފުޓްބޯޅައިގައި ހަގީގަތުގައި ވަރަށް ބޮޑު ނަމެއް ކަމަށާއި، ރާއްޖޭގެ ފުޓްބޯޅައިގައި ނިއުރޭޑިއަންޓޭ ބުނެފިނަމަ ކޮންމެ ބަޔަކުވެސް ޖެހިލުންވާނެ ކަމަށް ނިއުގެ އަންހެން ޓީމުގެ ހެޑް ކޯޗު އިސްމާއިލް އަނިލް ބުނެފިއެވެ.
"އިރާދުކުރެއްވިއްޔާ ނިއުރޭޑިއަންޓޭ އެނަން ކިޔައިފިއްޔާ އަސްލު ހަގީގަތުގައި ބޭނުމެއް ނުވާނެ ތަށި ނޫން އެއްޗެއް. އެއީ އަސްލު ހަގީގަތަކީ. އެހެންވީމަ އަހަރުމެން މި ތައްޔާރުވަނީ ތައްޓަށް" ކޯޗު ބުންޏެވެ.
ގިނަ އަހަރުތަކަކަށްފަހު އަންހެން ފުޓްބޯޅަ އަލުން ފަށައިގަތުމުން އެފްއޭއެމަށް ޝުކުރު އަދާކުރާކަމަށް ނިއުރޭޑިއަންޓުގެ ކޯޗު ބުންޏެވެ. އަދި ލީގަށް ތައްޔާރުވުމަށް ކުޅުންތެރިންވެސް ވަރަށް ހިތްހަމަޖެހިގެން ފަރިތަކުރުންތަކުގައި ބައިވެރިވަމުންދަނީ ކުލަބުގެ ރޫހުގައި ކަމަށްވެސް ކޯޗު ބުންޏެވެ.
ޓީމުގައި ފުޓްސެލް ކުޅޭ ކުޅުންތެރިންވެސް ތިބިކަން ފާހަގަކުރަމުން ކޯޗު ބުނީ އެ ކުޅުންތެރިން ބޮޑު ފުޓްބޯޅަގެ ތަޖުރިބާ މަދުކަމަށާއި، އެހެންނަމަވެސް އެ ކުޅުންތެރިން މުބާރާތުގައި ރަނގަޅު ކުޅުމެއްދައްކާނެ ކަމަށް އުންމީދު ކުރާކަމަށެވެ.
ކޯޗު ބުނީ ފަރތަކުރުންތަކަށް ދަނޑު ނުލިބޭތީ ވަރަށް ދަތިކަމަށާއި، އެހެންނަމަވެސް ވީ އެންމެ ރަނގަޅަކަށް ލީގަށް ޓީމު ތައްޔާރުކުރާނެ ކަމަށެވެ. ޓީމާމެދު ހިތްހަމަޖެހޭ ކަމަށާއި ކުޅުންތެރިންގެ މޯޓިވޭޝަނާއިމެދު ވަރަށް ހިތްހަމަޖެހޭ ކަމަށެވެ.
ޓީމުގައި ބިދޭސީ ކުޅުންތެރިންވެސް ބޭނުންކުރާނެ ކަމަށާއި ދިވެހި ކުޅުންތެރިންނާއެކު ލީގަށް ވަރަށް ރަނގަޅަށް ތައްޔާރުވާނެ ކަމަށް ކޯޗު ބުންޏެވެ.
މުބާރާތުގެ ފުރަތަމަ މެޗަކީ އެންމެ މުހިންމު މެޗުކަމަށާއި، އެއީ އެންމެ އުނދަގޫވާނެ މެޗުކަމަށް ފާހަގަކުރަމުން ކޯޗުބުނީ އެމެޗަށް ތައްޔާރުވާނީ ފުރިހަމަ ބާރާއެކުގައި ނެރެވެން އޮތް އެންމެ ވަރުގަދަ ޓީމު ނެރެގެން ކަމަށެވެ. ނިއުރޭޑިއަންޓުން ލީގުގައި ފުރަތަމަ ނިކުންނާނީ އޮޑި ސްޕޯޓްސް ކުލަބާއި ދެކޮޅަށެވެ.
"ސީދާ ފުރަތަމަ މެޗުން ފެށިގެން ފައިނަލަށް ގޮސް އިރާދުކުރެއްވިއްޔާ ތައްޓާއެކީގައި ފައިބާނީ" ކޯޗު ބުންޏެވެ.
ނިއުރޭޑިއަންޓުން ވަނީ ދިހަ ވަރަކަށް ދުވަސް ކުރިން ފަރިތަކުރުންތައް ފަށާފައެވެ. ކޯޗު ބުނީ ފަރިތަކުރުންތަކުގައި ކުޅުންތެރިން ވަރަށް ގިނަ ކަންކަން ރަނގަޅުކޮށްފި ކަމަށާއި، ތަށި ނެގޭނެ ކަމުގެ އުންމީދު ވަރަށް ބޮޑު ކަމަށެވެ.