މަތީ ސާނަވީ މަރުޙަލާގެ ތަޢުލީމުގެ ތެރެއިން، ތަމްރީނާއި ހުނަރު ދަސްކޮށްދިނުމަށް ޚާއްސަ ފުރުޞަތެއް އިތުރުކޮށް، އެކަމަށް ޚާއްސަ ސްކޫލެއް އުފައްދާ ކިޔަވައިދޭން މިވަނީ ފަށާފައެވެ.
"މާލޭ ވޮކޭޝަނަލް ހައި ސްކޫލް"އަކީ، ދިވެހި ރާއްޖޭގެ ތަޢުލީމީ ނިޒާމުގެ މުޅިން އާ ބާބެކެވެ. މިއީ، އެތައް ދަރިވަރުންތަކެއް މަސައްކަތު މާހައުލަށް ތައްޔާރުކޮށް، އަމިއްލަ ފައިމައްޗަށް ތެދުވެ މަސައްކަތް ކުރުމަށް އަޅައިދޭ ބިންގަލެކެވެ.
މަތީ ސާނަވީގައި އިތުރަށް ތަޢުލީމް ހާސިލްކުރަން މި ލިބޭ ފުރުޞަތުގެ އިތުރުން، މަސައްކަތުގެ މާހައުލަށް ބޭނުންވާ ހުނަރު ދަސްކޮށްދިނުމަށް ޚާއްސަ ދޮރުތަކެއް ހުޅުވާލުމުގެ އެންމެ ބޮޑު ބޭނުމަކަށްވީ، ގްރޭޑް 10 ނިންމާ ދަރިވަރުންނަށް ރަސްމީ ތަޢުލީމުގެ ތެރެއިން އިތުރު ފުރުސަތުތައް ފަހިކޮށްދީ، ޚާއްސަކޮށް ކުރިއަށްދާން ބޭނުންވާ ދާއިރާ ޚިޔާރު ކުރުމުގައި އެހީތެރިވެދީ، އެމަގުން ކުރިއަށް ދިއުމަށް މަގުފަހިކޮށްދިނުމެވެ.
60 ދަރިވަރުންނާއެކު "މާލޭ ވޮކޭޝަނަލް ހައި ސްކޫލް"ގެ ކިޔެވުން މިހާރު މިވަނީ ފަށާފައެވެ. ކިޔެވުން ފަށާފައި މިވަނީ، ފޮޓޯގްރަފީ، އައިޓީ، އަރކިޓެކްޗަރ، އިލެކްޓްރިކަލް އިންޖިނިއަރިން އަދި ސްމޯލް ބިޒްނަސް މެނޭޖްމަންޓް މިދާއިރާތަކުންނެވެ. މިއާއެކު އެކުއްޖަކު ކިޔަވަން ބޭނުންވާ ދާއިރާ އިޚްތިޔާރު ކުރުމުގެ ފުރުޞަތު ދަރިވަރުންނަށް ލިބިދެއެވެ.
މާލެ ވޮކޭޝަނަލް ހައި ސްކޫލުގެ ފުރަތަމަ ބެޗުގެ ދަރިވަރުން ބުނީ، އިތުރަށް ތަޢުލީމު ހާސިލްކުރާނެ ދާއިރާއެއް އިޚްތިޔާރު ކުރުމުގެ ބަދަލުގައި ސީދާ ކުދިންގެ ޝަޢުގު ހުރި ދާއިރާއިން، ރަސްމީ ތަޢުލީމުގެ ތެރެއިން ހިލޭ ހުނަރުތައް ދަސްކުރުމަށް މި ލިބުނު ފުރުސަތަކީ، ވަރަށް އަގުހުރި ފުރުސަތެއް ކަމަށެވެ. އަދި މިއީ ވަރަށް ތަފާތު މާހައުލެއްގައި، ޝަޢުގުވެރި އެތައް ކަމަކާއެކު އުނގެނެން ލިބުނު ފުރުސަތެއްގެ ގޮތުގައި އެކުދިން ފާހަގަކުރިއެވެ.
"ދިވެހި އިސްލާމް މާއްދާ ކިޔަވަން. އޭގެއިތުރުން ޝަޢުގުވެރިވާ ދާއިރާއިން، މިތަނުގައި ޢަމަލީގޮތުން މަސައްކަތްތައް މި ދަސްކުރަނީ. ވަރަށް ރަނގަޅު މާހައުލެއް، ފެސިލިޓޭޓަރުންވެސް ވަރަށް ރަނގަޅު. ވަރަށް އުފާވޭ މި ފުރުސަތު ލިބުނީމަ." ވޮކޭޝަނަލް ހައި ސްކޫލުގެ ފުރަތަމަ ބެޗުގެ ދަރިވަރުން ފާހަގަކުރިއެވެ.
މި ސްކޫލުގައި ކިޔަވަން ފެށުން ފާހަގަ ކުރުމަށް ޚާއްސަ ރަސްމިއްޔާތެއް ވަނީ ބާއްވާފައެވެ. މި ރަސްމިއްޔާތުގައި ދަރިވަރުންގެ ބެލެނިވެރިންވެސް ވަނީ ބައިވެރިވެފައެވެ. ދިރިއުޅުމުގައި ކުދިން ކުރިއަށް ދާނެ މިފަދަ މަގެއް ފަހިވެގެން ދިއުމަކީ، ވަރަށް ބޮޑަށް އުފާކުރާ ކަމެއްގެ ގޮތުގައި ބެލެނިވެރިން ފާހަގަކުރިއެވެ. އަދި ހުނަރުވެރި، ވަޒީފާގެ މައިދާނަށް ތައްޔާރު ދަރިވަރުންތަކެއްގެ ގޮތުގައި މި ދަރިވަރުން ވެގެންދާނެ ކަމަށް ވަރަށް ބޮޑަށް އުއްމީދުކުރާ ކަމަށް ވަނީ ފާހަގަކޮށްފައެވެ.
"ބެލެނިވެރިންގެ އަތުން އެއްވެސް އަގެއް ދައްކަން ނުޖެހި، ރަސްމީ ތަޢުލީމުން މި ލިބެނީ ކުދިންނަށް ދިރިއުޅުމުގެ ހުނަރުތައް ދަސްކުރުމުގެ ފުރުޞަތު. މިއީ، ރާއްޖޭގެ މުޅި ތަޢުލީމީ ހަޔާތަށްވެސް އައި ވަރަށް ރަނގަޅު، ބޮޑު ކުރިއެރުމެއް. ދަރިންނަށް މިފަދަ ފުރުސަތެއް ފަހިވެގެން ދިޔައީމަ ވަރަށް އުފާކުރަން." ދަރިވަރުންގެ ބެލެނިވެރިން ފާހަގަކުރިއެވެ.
މި ދަރިވަރުންގެ ކިޔެވުން ކުރިއަށް ދާނީ، މަތީ ސާނަވީގެ އެންމެހާ މިންގަނޑުތަކާ އެއްގޮތަށެވެ. އަދި މި ދަރިވަރުން އޭލެވެލްގެ ދެ އަހަރުގެ މުއްދަތު ފުރިހަމަ ކުރާނެއެވެ. މި މަރުހަލާގައިވެސް ދިވެހި އަދި އިސްލާމް މި ދެ މާއްދާވަނީ، މަޖުބޫރު ކޮށްފައެވެ.
މޯލްޑިވްސް ކޮލިފިކޭޝަން އޮތޯރިޓީ ޤަބޫލުކުރާ ސެޓްފިކެޓް މިންގަނޑުތަކަށް ދަރިވަރުން މި މަރުހަލާ ނިންމާއިރު، މަތީ ތަޢުލީމުގެ ދާއިރާތަކުން މަގުފަހިވާނެއެވެ. އަދި މި ދެ އަހަރު ފުރިހަމަކޮށް ނިކުންނައިރު، މި ދަރިވަރުން ވެގެންދާނީ މަސައްކަތުގެ މާހައުލަށް ފަރިތަ ދަރިވަރުންތަކަކަށެވެ.
ސްކޫލުގެ ކިޔެވުން ކުރިއަށް ގެންދަނީ، ޕޮލިޓެކްނިކްގައެވެ. ސަރުކާރުގެ އަމާޒަކީ، ކުރިއަށް އޮތް އަހަރުތަކުގައި ވީހާވެސް ގިނަ ދަރިވަރުންނަށް ފުރުޞަތު ދީ، ވޮކޭޝަނަލް ޕާތުވޭގައި ކިޔަވާ ދަރިވަރުންގެ ޢަދަދު 500އަށް އިތުރު ކުރުމެވެ.
ސަރުކާރުން ވަނީ، މަތީ ސާނަވީން ފުރުސަތު ލިބޭ ދަރިވަރުންގެ އަދަދު %31އިން %49އަށް އިތުރުކޮށްފައެވެ.