57 ވަނަ ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕު 2025 ގައި ވާދަކޮށް ލޯ މެޑަލް ހާސިލްކުރި ގައުމީ ބޯޑީބިލްޑިންގ ޓީމު މިއަދު ރާއްޖެ އަތުވެއްޖެއެވެ.
މިޓީމަށް މަރުހަބާދެންނެވުމަށް ވެލާނާ އިންޓަނޭޝަނަލް އެއަރޕޯޓަށް ވަޑައިގަތީ ސްޕޯޓްސް ކޮމިޝަނަރ މުހަންމަދު ޠަލާލުގެ އިތުރުން ކުޅިވަރު ދާއިރާގެ ބައެއް އިސްވެރިންނެވެ.
މިމުބާރާތުގައި ވާދަކޮށް ރާއްޖެއަށް ލޯ މެޑަލް ގެނެސްދީފައިވަނީ ގައުމީ ބޯޑީބިލްޑިންގ ޓީމާއި ދާދިފަހުން ގުޅުނު މަނާފް ވަހީދުއެވެ.
މިމަހުގެ 18 އިން 25 އަށް ތައިލޭންޑުގެ ބެންކޮކުގައި ކުރިއަށް ދިޔަ މިމުބާރާތުން މަނާފްއަށް ލޯ މެޑަލް ލިބިފައިވަނީ ފިރިހެނުންގެ އެތުލެޓިކް ފިޒީކް 160 ސީއެމްގައި ވާދަކޮށްގެންނެވެ.
ތައިލޭންޑުގެ ބޮޑީބިލްޑިންގ އެންޑް ފިޒީކް ސްޕޯޓްސް އެސޯސިއޭޝަނުން އިންތިޒާމުކުރި މިމުބާރާތުގައި ރާއްޖެއިން ހަތަރު އެތުލީޓުން ވާދަކުރިއެވެ. އެއީ މަނާފްގެ އިތުރުން އަލީ މަބްރޫކް ލަތީފްއާއި، އިސްމާއިލް ޝުޢާއު ޢަބްދުﷲގެ އަދި އަހުމަދު ނަޢީމްއެވެ.
މުބާރާތުން ލިބުނު ކާމިޔާބީއާއި ގުޅޭގޮތުން އެއަރޕޯޓުގައި ހުރެ ޕީއެސްއެމް ނިއުސްއާއި ވާހަކަދައްކަމުން މަނާފްބުނީ މިއީ ކުރު މުއްދަތެއްގެ ތެރޭގައި ކުރެވުނު ބުރަ މަސައްކަތުގެ ނަތީޖާކަމަށެވެ. މިކާމިޔާބީގައި ޓީމުގެ ކޯޗުކަމަށްވާ ޢަބްދުލް ހަސީބު ހުސައިންގެ ވަރަށް ބޮޑު ހިއްސާއެއްވާކަމަށް އޭނާ ފާހަގަކުރިއެވެ.
"މި ކާމިޔާބީއަކީ ވަރަށް ކުރު މުއްދަތެއްގައި ކޯޗުގެ ވަރަށް ބޮޑު އެހީތެރިކަމަކާއި އެކީގައި ލިބުނު ކާމިޔާބީއެއް. އަސްލު ކޯޗު ވަރަށް ބޮޑަށް ޕުޝްކޮށްގެން ހަމަ ހިތްވަރު އެލުނުތާނގަވެސް ކޯޗު މީހާ ކޮޅަށް ނަގައިގެން މިކާމިޔާބުވީ. އުންމީދެއް ނުކުރަން މިހާހިސާބަށް އާދެވޭނެ ކަމަކަށް. ވަރަށް ބުރަ މަސައްކަތުން މިހާ ހިސާބަށް އާދެވިފަ މިހިރީ. މިކަމުގެ އެންމެ ހައްގު ޝުކުރެއް ހައްގުވާ އެއް ފަރާތަކީ ކޯޗު. ކޯޗު މިކަމުގަ ދިން އެހީތެރިކަން އެއީ ފާހަގަކޮށްލެވޭކަމެއް" މަނާފް ބުންޏެވެ.
މިމުބާރާތާއި މަނާފް ކުރިމަތިލީ ގާތްގަނޑަކަށް ދޮޅު މަސްދުވަހުގެ ތަމްރީނުތަކަށްފަހުއެވެ. އޭނާ ބުނީ މުބާރާތާއި ކުރިމަތިލިއިރު، ކޮންމެވެސް ވަރަކަށް ހާސްކަން ކުރިމަތިވިކަމަށެވެ. އެހެންނަމަވެސް ކޯޗުގެ އިރުޝާދާއި ހިތްވަރާއެކު މުބާރާތުގައި ވާދަކޮށް ނެރެވުނު ނަތީޖާއާއި މެދު ފަޚުރުވެރިވާކަމަށް އޭނާ ބުންޏެވެ.
57 ވަނަ ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕު 2025 އިން މަނާފް ލޯ މެޑަލް ހާސިލްކޮށްފަވަނީ 18 އެތުލީޓުންނާއި ވާދަކޮށެވެ.