ނޫސްވެރިންގެ ފެންވަރު މަތިކުރުމަށް ބްރޯޑްކާސްޓިންގ ނޫސްވެރިން އެކްރެޑިޓްކުރަނީ

ރާއްޖޭގައި ނޫސްވެރިންގެ ފެންވަރު މަތިކުރުމަށް ކުރާ މަސައްކަތުގެ ދަށުން، ބްރޯޑްކާސްޓިންގ ނޫސްވެރިން އެކްރެޑިޓްކުރުމުގެ އުސޫލު އާންމުކޮށްފިއެވެ. މިއުސޫލުގެ ދަށުން، ބްރޯޑްކާސްޓިން ނޫސްވެރިންނަށް ހިންގާ ތަމްރީންތަކަކަށްފަހު ނޫސްވެރިންނަށް ޚާއްސަ ފާހެއް ދޫކުރުމަށްވަނީ ހަމަޖެހިފައެވެ.

ނޫސްވެރިކަމުގެ ފެންވަރު މަތިކުރުމަށް ނޫސްވެރިންނަކީ ޢިލްމާއި ތަމްރީނުގެ ތެރެއިން ނޫސްވެރިކަންކުރާ ބައެއްކަން ކަށަވަރުކުރުމަކީ މުހިންމުކަމަކަށްވާތީ ނޫސްވެރިންގެ ދަފްތަރެއް އެކުލަވާލައި، ވަކި ޚާއްސަ އުސޫލެއްގެ ދަށުން "ނޫސްވެރިން އެކްރެޑިޓް" ކުރުމުގެ މަސައްކަތް ބްރޯޑްކާސްޓިންގ ކޮމިޝަނުންވަނީ ފަށްޓަވާފައެވެ. ބްރޯޑްކޮމްއިން ވިދާޅުވީ، ނޫސްވެރިން އެކްރެޑިޓްކުރެވުމުން، ފެންވަރު ރަނގަޅު ޚިދުމަތެއް ފޯރުކޮށްދިނުމަށް ބާރުއެޅޭނެކަމަށެވެ.

ނޫސްވެރިން އެކްރެޑިޓްކުރުމާ ބެހޭ އުސޫލުގެ މަޤްޞަދަކ،ީ ފެންވަރު ރަނގަޅު ޚިދުމަތެއް ފޯރުކޮށްދިނުމަށް ބާރުއެޅުމާއި، ނޫސްވެރިންގެ ގޮތުގައި މަސައްކަތްކުރާ ފަރާތްތަކުގެ ތަޢުލީމާއި ތަޖްރިބާ ކަނޑައެޅުމާއި، ބްރޯޑްކާސްޓިންގ ދާއިރާގައި މަސައްކަތްކުރާ ނޫސްވެރިންގެ ދަފްތަރެއް އެކުލަވައިލުމާއި، ބްރޯޑްކާސްޓިން ދާއިރާގައި މަސައްކަތްކުރާ ނޫސްވެރިންނަށް ފާސްދޫކުރުމުގެ އިތުރުން ސްޓޭޝަންތަކުގައި މަސައްކަތްކުރާ ނޫސްވެރިންނަކީ ދަފްތަރުގައި ރަޖިސްޓްރީ ކުރެވިފައިވާ ފަރާތަކަށްވުން ލައިސެންސްގެ ޝަރުތެއް ކަމުގައި ކަނޑައެޅުމެވެ.

މިއުސޫލުގައިވާގޮތުގެ މަތިން ޕްރެސް ފާސް ދޫކުރުމަށް ހަމަޖެހިފައިވަނީ، އެޑިޓަރުންނާއި، ރިޕޯޓަރުންނާއި ޕްރެޒެންޓަރުންނާއި، ލިޔުންތެރިންނާއި، ކޮލަމިސްޓުންގެ އިތުރުން ފޮޓޯ ޖަރނަލިސްޓުންނާއި ވީޑިއޯ ޖަރނަލިސްޓުންނަށެވެ.

އެކްރެޑިޓް ކުރުމަށް ހުށަހަޅާ ނޫސްވެރިންގައި ހުންނަންޖެހޭ ޝަރުޠުތަކުގެ ތެރޭގައި ބްރޯޑްކާސްޓިންގ އަދި ކޮމިއުނިކޭޝަން ދާއިރާ ނުވަތަ ގުޅުންހުރި ދާއިރާއަކުން ދަށްވެގެން އެމްކިޔުއޭގެ ލެވެލް 3 ގެ ނުވަތަ ނޫސްވެރިކަމުގެ ދާއިރާއިން މަދުވެގެން 3 އަހަރު ދުވަހުގެ ތަޖުރިބާ ލިބިފައިވާ ފަރާތަކަށް ވާންޖެހެއެވެ. އަދި 5 އަހަރު ދުވަހުގެ ތެރޭގައި ޖިނާއީ ކުށެއް ސާބިތުވެފައިވާ މީހަކަށް ނުވުމާއި އުސޫލުގައި ބަޔާންކުރާ ތަމްރީން ފުރިހަމަކޮށްފައިވާ މީހަކަށްވުން ހިމެނެއެވެ.

މިއުސޫލުގައި ބަޔާންކޮށްފައިވާގޮތުން، އެކްރެޑިޓްކޮށްފައިވާ ފަރާތެއްގެ މައްޗަށް ޖިނާއީ ކުށެއް ސާބިތުވެއްޖެނަމަ، އަދި ނޫސްވެރިކަމުގެ ކޯޑް އޮފް ޕްރެކްޓިސްއާއި ޚިލާފުވެއްޖެނަމަ އަދި ސުލޫކީ މިންގަނޑާއި ޚިލާފުވިކަން ކޮމިޝަންގެ ތަޙުގީގަށް ސާބިތުވެއްޖެނަމަ، އެކްރެޑިޓްކޮށްފައިވާ ކާޑު ބާތިލްކުރުމުގެ ބާރު ބްރޯޑްކޮމްއަށް ލިބިގެންވެއެވެ.

މިއުސޫލަށް ޢަމަލުކުރަން ފަށާނީ އުސޫލު ކޮމިޝަންގެ ވެބްސައިޓުގައި ޝާޢިއުކުރާތާ 6 މަސް ފަހުންކަމަށް އުސޫލުގައިވަނީ ބަޔާންކޮށްފައެވެ.

ނޫސްވެރިކަންކުރުމާއި، އެއްވުންތަކާއި، އެކި ހިސާބުތަކުން ޚަރަބާއި މަޢުލޫމާތު ގެނެސްދިނުމުގައި ނޫސްވެރިކަމުގެ ފާސް ބޭނުންކުރުމަށް ބްރޯޑްކޮމްއިން ބާރުއަޅައެވެ. އަދި ރައްޔިތުންނަށް ފޯރުކޮށްދޭންޖެހޭ މައުލޫމާތު ފޯރުކޮށްދިނުމުގެ ފަހި މާޙައުލެއް ނޫސްވެރިންނަށް ޤާއިމުކޮށްދިނުމަށް އަންނަނީ މަސައްކަތްކުރަމުންނެވެ.