ޚަބަރު

ބާރންލީ އަތުން ފަހު ވަގުތު ޔުނައިޓެޑް މޮޅުވެއްޖެ


އިނގިރޭސި ޕްރިމިއާ ލީގުގައި ރޭ ބާރންލީ އާއި ދެކޮޅަށް މެންޗެސްޓަރ ޔުނައިޓެޑް ކުޅުނު މެޗުގެ ފަހު ވަގުތު ޖެހި ލަނޑާއެކު 3-2 ގެ ނަތީޖާއަކުން ޔުނައިޓެޑް މޮޅުވެއްޖެ އެވެ.

މެންޗެސްޓަރގެ އޯލްޑް ޓްރެފަޑްގައި ކުޅުނު މި މެޗުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާއިރު, މެޗުގެ 27 ވަނަ މިނިޓުގައި ބާރންލީގެ ޖޯޝް ކުލެން އަތުން ބައިކޮޅަށް ވަން ލަނޑާއެކު ޔުނައިޓެޑަށް ވަނީ ކުރި ލިބިފަ އެވެ.

މެޗުގެ ފުރަތަމަ ހާފުގެ ކުޅުން ނިމުނުއިރު 1-0 ގެ ނަތީޖާއަކުން ޔުނައިޓެޑް ކުރީގައި އޮތް ނަމަވެސް ދެވަނަ ހާފުގެ ކުޅުން ފެށުނުތާ ދިހަވަނަ މިނިޓުގައި ބާރންލީގެ ލައިލް ފޮސްޓަރ ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ.

މެންޗެސްޓަރ ޔުނައިޓެޑް އިން މި މެޗުގައި ދެވަނަ ފަހަރަށް ކުރި ހޯދާފައިވަނީ ބާރންލީ އިން މެޗުގެ ނަތީޖާ އެއްވަރުކުރިތާ ދެ މިނިޓު ފަހުން ބްރަޔަން އެމްބުއޭމޯ ކާމިޔާބުކޮށްދިން ލަނޑުންނެވެ.

މި ސީޒަނުގައި މިހާތަނަށް މެންޗެސްޓަރ ޔުނައިޓެޑް ކުޅުނު ހުރިހާ މެޗެއްގައިވެސް ގޯލު ކީޕަރުންގެ ފަރާތުން ގިނަ ގޯސްތަކެއް ފެނިގެންގޮސްފައިވާއިރު މި މެޗުގައިވެސް ގޯލުކީޕަރަކަށް ހުރި އަލްތޭ ބައިންދިރްގެ ފަރާތުން ވަނީ އާދައިގެ ގޯސްތަކެއް ފެނިގެން ގޮސްފަ އެވެ.

މި މެޗުގައި ދެވަނަ ފަހަރަށް ބާރންލީ އިން މެޗުގެ ނަތީޖާ އެއްވަރުކޮށްފައިވަނީ މެޗުގެ 66 ވަނަ މިނިޓުގައ ބައިންދިރް އަށް ހެދުނު ގޯހެއްގެ ފައިދާ ނަގާ ޖެއިޑަން އެންތޮނީ ކާމިޔާބުކޮށްދިން ލަނޑުންނެވެ.

މެންޗެސްޓަރ ޔުނައިޓެޑަށް މި މެޗުން ތިން ޕޮއިންޓް ކަށަވަރުވެފައިވަނީ މެޗުގެ އިތުރު ވަގުތުގެ ކުޅުމުގައި އެ ޓީމަށް ލިބުނު ޕެނަލްޓީ އަކުން ބްރޫނޯ ފެނާންޑޭޒް ކާމިޔާބުކޮށްދިން ލަނޑުންނެވެ. މެޗުގެ ރެފްރީ ފުރަތަމަ އެއީ ޕެނަލްޓީ އެއް ނޫން ކަމަށް ނިންމި ނަމަވެސް ހަތަރު މިނިޓު ވަންދެން ވީޑިއޯ ބެލުމަށްފަހު އެ ނިންމުން ވަނީ ބަދަލުކޮށްފަ އެވެ.