63 ވަނަ ގައުމީ ޓޭބަލް ޓެނިސް މުބާރާތުގެ ސިންގަލްސް ބައިގެ ޗެމްޕިއަންކަން އައިޝަތު ރަފާ ނާޒިމް އާއި މުޙައްމަދު ޝައްފާން ހޯދައިފިއެވެ. މިއީ މުބާރާތް މި ދެކުޅުންތެރިންވެސް ކާމިޔާބުކުރި ތިންވަނަ ފަހަރެވެ.
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ޝަރަފްވެރިކޮއްދެވި ފައިނަލު މެޗުގައި ފިރިހެނުންގެ ސިންގަލްސް ޝައްފާން ކާމިޔަބު ކުރީ ގައުމީ ޓީމުގެ ކެޕްޓަން މޫސާ މުންސިފް އަހުމަދާ ވާދަކޮއްގެން 4-1 ގޭމުން މެޗު ކާމިޔާބުކޮއްގެންނެވެ.
ގައުމީ ޗެމްޕިއަންކަން 10 ފަހަރު ހޯދަފަވާ މުންސިފު މެޗު ރަނގަޅަށް ފެށި ނަމަވެސް ވަކި ހިސާބަކުން ޝައްފާން ވަނީ މުޅި މެޗުގެ ކޮންޓްރޯލް އަތުލާފައެވެ. އެގޮތުން 13-11 މުންސިފު ފުރަތަމަ ސެޓު ކާމިޔާބު ކުރި ނަމަވެސް ޖެހިގެން އައި ތިން ސެޓު ޝައްފާން ވަނީ ރަނގަޅު ވާދައެއް ކޮށް ކާމިޔާބުކޮއްފައެވެ.
ފަސް ވަނަ ސެޓުގެ ކުޅުން ފަށައިގެން މުންސިފް ކުޅުން ރަނގަޅު ކުރި ނަމަވެސް ސެޓުގެ ފަހު ކޮޅު ޝައްފާން ވަނީ ނަތީޖާ ހަމަހަމަކޮއްފަވެއެވެ. ވާދެވެރިކޮށް ފެނުނު މި ސެޓު ޝައްފާން ކާމިޔާބުކުރީ 18-16 އިންނެވެ.
މުބާރާތުގެ އަންހެނުންގެ ސިންގަލްސް ޗެމްޕިއަންކަން ރަފާ ހޯދީ ފަސްފަހަރު މިތަށި ހޯދި ދީމާ އަލީ އާއި ވާދަކޮށް 4 ގޭމުން މެޗު ކާމިޔާބުކޮއްގެންނެވެ. މިއީ ފަހުގެ ތާރީހެއްގައި ދިވެހި ކުޅުންތެރިޔަކު ދީމާއާ ވާދަކޮށް ހޯދި އެންމެ ރަނގަޅު ކާމިޔާބީއެވެ.
ދުވަސްކޮޅަކަށް ކުޅުމާ ދުރުގައި ހުރެފަ ރާފާ ކުޅުނު ފުރަތަމަ މުބާރާތުގެ ފައިނަލުގަ ވެސް ފެނިގެންދިޔައީ ފޯމުގަ ކުޅެ ތަފާތުދެއްކި ތަނެވެ. އެގޮތުން ފުރަތަމަ ދެސެޓު ރަފާ ކާމިޔާބުކުރީ 11-09 އިންނެވެ. މިމެޗުގައި ދީމާގެ ފަރާތުން މާ އެދެވޭ ކުޅުމެއް ފެނިގެން ނުދިޔުމުގެ ނަތިޖާއެއް ގޮތުން ތިންވަނަ ސެޓުގައި 11-06 ތަފާތު ބޮޑުކޮށް ރަފާ ސެޓު ކާމިޔާބުކޮށް މެޗު ނިންމާލުމަށް އިތުބާރު ބޮޑުކުރިއެވެ.
މެޗުގެ ހަތަރުވަނަ ސެޓުގައި ދީމާ ލީޑް ނެގިނަމަވެސް ރަފާވަނީ ފަހުކޮޅު ނަތީޖާ އެއްވަރުކޮއްފައެވެ. މި ސެޓުގައި ދެ ކުޅުންތެރިންގެ ފަރާތުން ވާދަވެރި ކުޅުމެއް ފެނިގެންދިޔައިރު ރަފާ މި ސެޓު ކާމިޔާބުކުރީ 15-13 އިންނެވެ.
މިއަހަރު މުބާރާތުގައި ހަތަރު އުމުރުފުރައަކުން 91 ކުޅުންތެރިން ވަނީ ބައިވެރިވެފައެވެ. މުޅި 370 މެޗު ކުޅުނު އިރު ޓީމު އިވެންޓުގައި އަންހެން ޑިވިޝަންގެ ޗެމްޕިއަންކަން ހޯދީ ޑަބްލިއު ސްޕޯޓްސް އެކަޑަމީއެވެ. ފިރިހެން ޑިވިޝަންގެ ޓީމު އިވެންޓުގެ ޗެމްޕިއަން ޓީމަކީ އިހާ އެކަޑަމީއެވެ.
މުބާރާތުގެ ނިންމުގެ ރަސްމިއްޔާތުގައި ވަނީ ދާދިފަހުން އައިޓީޓީއެފް ބްލޫބެޖް ހާސިލުކުރި ރާއްޖޭގެ އަމްޕަޔަރ މުހައްމަދު ޔާމީނަށް ހަނދާނީ ފިލެއް ދީފައެވެ. ޔާމީނަކީ ދެކުނު އޭޝިޔާ ސަރަހައްދުގައި އިންޑިޔާ ފިޔަވާ މި ބެޖް ހާސިލް ކުރި ފުރަތަމަ އަމްޕަޔަރއެވެ.
މުބާރާތުގެ ނިންމުމުގެ ރަސްމިއްޔާތުގައި ކުޅިވަރު ވަޒީރު އަބްދުﷲ ރާފިއު ވެސް ވަނީ ބައިވެރިވަޑައިގެންފައެވެ.