ތުރުކީގެ ފެނަބާޗޭގެ ކޯޗުކަމުގެ މަގާމުން ޖޯސޭ މޮރީނިއޯ ވަކިކޮށްފިއެވެ.
އުމުރުން 62 އަހަރުގެ މޮރީނިއޯ އެ މަގާމުން ވަކިކޮށްފައިވަނީ ޔޫއެފާ ޗެމްޕިއަންސް ލީގުގެ ޕްލޭ އޮފްގައި ޕޯޗުގަލްގެ ބެންފީކާ އާއި ދެކޮޅަށް ކުޅުނު މެޗުން ބަލިވެ ޗެމްޕިއަންސް ލީގުގެ ފުރުސަތު ފެނަބާޗޭ އަށް ގެއްލުމާއި ގުޅިގެންނެވެ.
ބެންފީކާ އަތުން ބަލިވި މެޗު ނިމުނުތާ ގިނައިރުތަކެއް ނުވަނީސް ފެނަބާޗޭ އިން ނެރެފައިވާ ބަޔާނެއްގައި ބުނެފައިވަނީ މޮރީނިއޯ އާއިއެކު އެ ކްލަބުން ހަދާފައިވާ އެއްބަސްވުން އުވާލާފައިވާ ކަމަށެވެ.
މޮރީނިއޯގެ ކޯޗިން ހަޔާތުގައި ޔޫރަޕްގެ މަޝްހޫރު 10 ކްލަބަކަށް ކޯޗު ކޮށްދީފައިވާއިރު, އޭގެ ތެރޭގައި އިނގިރޭސިވިލާތުގެ ޗެލްސީ އާއި މެންޗެސްޓަރ ޔުނައިޓެޑް އާއި ޓޮޓްނަމް ހޮޓްސްޕަރގެ އިތުރުން އިޓަލީގެ އިންޓަރ މިލާނާއި ޕޯޓޯ ހިމެނެ އެވެ. އޭގެ ތެރެއިން ދެ ފަހަރު މަތިން ޗެލްސީ އަށް ކޯޗު ކޮށްދީފައިވާއިރު އޭނާ ވަނީ އެ ކްލަބަށް ގިނަ ކާމިޔާބީތަކެއް ހޯދަދީފަ އެވެ.
ފެނަބާޗޭ ގައި މޮރީނިއޯ ހޭދަކުރި ދެ އަހަރުގެ ތެރޭގައި އެ ކްލަބަށް އެދެވޭ ގިނަ ކާމިޔާބީތަކެއް ހޯދަދެވިފައިނުވި ނަމަވެސް އެ ކްލަބާއި އެންމެ ވާދަވެރި ގަލަތަސަރާއީ އާއި ދެމެދު ކުޅޭ މެޗަކީ އަބަދުވެސް ފޯރިގަދަ މެޗަކަށްވަނީ ވެފަ އެވެ.
މޮރީނިއޯ އާއިއެކު ފެނަބާޗޭ އިން ހަދާފައިވާ އެއްބަސްވުން އުވާލާފައިވާއިރު އޭނާ އަށް ބަދަލުގެ ގޮތުގައި އެ ކްލަބުން 9 މިލިއަން ޔޫރޯގެ އަދަދެއް ދޭން ޖެހޭނެކަމަށް ރިޕޯޓްތައް ވަނީ ބުނެފަ އެވެ.
ފާއިތުވެދިޔަ 11 އަހަރުގެ ތެރޭގައި ފެނަބާޗޭ އަށް މުބާރާތެއް ކާމިޔާބު ކުރެވިފައިނުވާއިރު މޮރީނިއޯ އެ ކްލަބަށް ގެނައުމުގެ އެންމެ ބޮޑު އަމާޒަކީ މުބާރާތެއް ކާމިޔާބު ކުރުމަށެވެ.