ރައްޔިތުންގެ ގާތަށް ވަޑައިގެން ރައްޔިތުންގެ ކަންބޮޑުވުން އައްސަވައި، ހާލަތު ބެއްލެވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ އިސްކަމަކާއި ޝައުޤުވެރިކަމެއް ބަހައްޓަވައިގެން ކުރައްވަމުން ގެންދަވާ ކަމެކެވެ. އެގޮތުން އެމަނިކުފާނު އެންމެ ފަހުން ވަޑައިގެންނެވީ ތިލަދުންމަތީ ދެކުނުބުރީގެ ރަށްރަށަށެވެ.
މި ދަތުރުފުޅު ރައީސުލްޖުމްހޫރިއްޔާ ފެށްޓެވީ މިމަހުގެ 24 ވަނަ ދުވަހުއެވެ. ހދ. އަތޮޅުގެ މީހުން ދިރިއުޅޭ ހުރިހާ ރަށަކަށް ވަޑައިގެންނެވުމަށްފަހު ދަތުރުފުޅު ނިންމަވާލެއްވީ މިމަހުގެ 27 ވަނަ ދުވަހުއެވެ.
މި ދަތުރުފުޅުގައި ރައީސުލްޖުމްހޫރިއްޔާ ވަޑައިގެންނެވި ރަށްރަށަކީ މަކުނުދޫ، ހަނިމާދޫ، ނައިވާދޫ، ފިނޭ، ހިރިމަރަދޫ، ނެއްލައިދޫ، ނޮޅިވަރަންފަރު، ކުރިނބީ، ނޮޅިވަރަން، ކުމުންދޫ، ވައިކަރަދޫ، ނޭކުރެންދޫގެ އިތުރުން ކުޅުދުއްފުށި ސިޓީއަށެވެ. އެ ރަށްރަށުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި ރައްޔިތުންނާ ބައްދަލުކުރައްވައި، ތަރައްޤީއަށް ބޭނުންވާ ކަންކަމާއި ރަށާއި ރައްޔިތުންގެ ޙާލަތާ ގުޅޭގޮތުން ރައީސުލްޖުމްހޫރިއްޔާ މަޝްވަރާކުރެއްވިއެވެ.
ރައީސްގެ މި ދަތުރުފުޅުގައި ސަރުކާރުގެ ބައެއް ވަޒީރުންނާއި ކުންފުނިތަކުގެ ވެރީންގެ މައްޗަށް އެކުލެވިގެންވާ ވަފުދެއް ބައިވެރިވެވަޑައިގެންނެވިއެވެ. އެ ވަފުދުން ވަނީ، ކޮންމެ ރަށެއްގައި މިހާރު ފަށާފައިވާ އަދި ފެށުމަށް ހަމަޖެހިފައިވާ މަސައްކަތްތަކާ ގުޅޭ އަދާހަމަ މަޢުލޫމާތު ފޯރުކޮށްދެއްވާފައެވެ.
މި ދަތުރުފުޅުގެ ތެރެއިން އެކި ރަށްރަށަށް އަމާޒުކޮށް، ތަރައްޤީގެ މަސައްކަތްތައް ފެށްޓެވުމާއި ތަރައްޤީއަށް ބޭނުންވާ އެކިއެކި މަސައްކަތްތައް ކުންފުނިތަކާ ހަވާލުކުރުމަށް އެއްބަސްވުންތަކުގައި ވަނީ ސޮއިކޮށްފައެވެ.
ތިލަދުންމަތީ ދެކުނުބުރިއަށް ކުރެއްވި ދަތުރުފުޅުގެ ތެރެއިން ހދ. އަތޮޅުގައި ފަތުރުވެރި މަންޒިލުތައް ޤާއިމުކުރެއްވުމުގެ ގޮތުން މުހިންމު މަސައްކަތްތަކެއް ފެށްޓެވިއެވެ. އެގޮތުން ހދ. ނާގޯށީގައި ފަތުރުވެރިކަން ފެށުމަށް އެ ރަށް ތަރައްޤީކުރާނެ ގޮތް ހޯދާފައިވާކަމަށާއި އެ މަސައްކަތް ފަށްޓަވާނެކަމަށް ރައީސް ވިދާޅުވިއެވެ. އަދި އެއާއެކު ހދ. އަތޮޅަށް ފަތުރުވެރިކަން ގެންނަވާނެކަމަށް ރައީސް
ވިދާޅުވިއެވެ.
މީގެ އިތުރުން ދަތުރުފަތުރުގެ ނިޒާމު ހަރުދަނާކުރެއްވުމުގެ ގޮތުން، ވައިގެބަނދަރުތަކާއި ވިޔަފާރި ބަނދަރާއި ކަނޑުދަތުރުފަތުރާ ގުޅުންހުރި ބިނާރު ތަރައްޤީކުރެއްވުމާއި އަޕްގްރޭޑްކުރެއްވުމަށް މި ދަތުރުފުޅުގެ ތެރެއިން ވަނީ މަޝްރޫޢުތައް ފަށްޓަވާފައެވެ. އަދި ގެދޮރުވެރިކަމާއި ބޯހިޔާވަހިކަމުގެ ބިޔަ މަޝްރޫޢުތަކާއި ތަޢުލީމާއި ސިއްޙަތާއި ހަށިހެޔޮކަމާ ގުޅުންހުރި މަސައްކަތްތަކާއި މަސްވެރިކަމާއި ދަނޑުވެރިކަމުގެ އިޤްތިޞާދު ފުޅާކުރެއްވުމަށް ޚާއްސަ މަޝްރޫޢުތަކެއް ވަނީ ފަށްޓަވައިދެއްވާފައެވެ.
މި ދަތުރުފުޅުގައި ބޭއްވެވި ބައްދަލުވުންތަކުގައި ރައީސުލްޖުމްހޫރިއްޔާ ދެއްކެވި ވާހަކަފުޅުތަކުގައި، ކައުންސިލްތައް ބާރުވެރިކުރެއްވުމަށް ސަރުކާރުން ކުރައްވަމުންގެންދަވާ މަސައްކަތްތަކުން ނަފާ ހޯދުމަށް، ކައުންސިލްތަކުން އިސްނަގައިގެން ކުރެވިދާނޭ ކަންކަމުގެ މައްޗަށް އަލިއަޅުއްވާލައްވާފައިވެއެވެ. މީގެ އިތުރުން، ޚިޔާލުފާޅުކުރުމުގެ މިނިވަންކަމަށް މި ސަރުކާރުން ހުރަސް ނާޅުއްވާނޭކަންވެސް ބައްދަލުވުންތަކުގައި އެމަނިކުފާނުވަނީ ހާމަކުރައްވާފައެވެ.
ދިވެހިރާއްޖޭގައި މީހުން ދިރިއުޅޭ ރަށްރަށަށް ޒިޔާރަތްކުރައްވައި، ރައްޔިތުންގެ ކަންބޮޑުވުންތައް އަޑުއައްސަވައި، ހާލުއަހުވާލު ބައްލަވައި، ރައްޔިތުންނާ ގާތުން މަސައްކަތްކުރެއްވުމަކީ މި ސަރުކާރުން ވަރަށްބޮޑު އަހުމިއްޔަތުކަމެއްދެއްވާ ސިޔާސަތެކެވެ.