ރަޝިޔާ-ޔޫކްރެއިން ހަނގުރާމައަށް ނިމުމެއް ގެނައުމަށް ސުލްޙައިގެ ސަމިޓެއް ބޭއްވުމަށް ތައްޔާރުވަމުންދާ ކަމުގައި ސްވިޓްޒަލެންޑުން ބުނެފިއެވެ. ރަޝިޔާއާއި ޔޫކްރެއިނަށް ދަޢުވަތު އަރުވާފައިވާ މި ސަމިޓު އޮންނާނީ ޖޫން މަހުގެ 15ން 16އަށެވެ. ރަޝިޔާއިން ވަނީ ސަމިޓުގައި ބައިވެރިވުމަށް ހުށަަހަޅާފައިވާ ދަޢުވަތު ގަބޫލު ނުކުރާނެ ކަމަށް ބުނެފައެވެ.
ސްވިޓްޒަލެންޑުން ބުނީ, ރަޝިޔާ-ޔޫކްރެއިން ހަނގުރާމައަށް ސުލްޙަވެރި ހައްލެއް ހޯދުމަށް ސަމިޓެއް ބާއްވަން ނިންމާފައި ވަނީ ޔޫކްރެއިންގެ ރައީސް ވޮލޮޑޮމީރް ޒެލެންސްކީގެ އެދިވަޑައިގަތުމުގެ މަތިން ކަމުގައެވެ. އަދި, މި ކަމާ ގުޅޭ ގޮތުން ވިލާތުގެ އިއްތިހާދު (އީޔޫ)އާއި އެންމެ ކުރިއަރާފައިވާ ހަތް ޤައުމު (ޖީ7)ގެ މެންބަރުންގެ އިތުރުން ޗައިނާއާއި އިންޑިޔާއާ އެކު މަޝްވަރާތައް ބާއްވާފައިވާ ކަމުގައެވެ.
މި ސަމިޓު ބޭއްވުމަށް ބޭނުންވާ ތާޢީދު ލިބިފައިވާ ކަމުގައި ސްވިޓްޒަލެންޑުގެ ފެޑެރަލް ކައުންސިލުން ނެރުނު ބަޔާނެއްގައި ބުނެފައިވެއެވެ. ސަމިޓު ބޭއްވުމަށް ހަމަޖެހިފައި ވަނީ ސްވިޓްޒަލެންޑުގެ ނިޓްޒްވަލްޑެންގެ ބަރގެންސްޓޮކް ރިސޯޓުގައެވެ. މި ސަމިޓުގެ މައިގަނޑު މަޤުޞަދަކީ ރަޝިޔާ-ޔޫކްރެއިން ހަނގުރާމައަށް ސުލްޙަވެރި އަދި ދާއިމީ ހައްލެއް ހޯދައި, ސުލްޙަ ގާއިމު ކުރުމަށް ކުރަމުންދާ މަސައްކަތުގައި ރަޝިޔާގެ ބައިވެރިވުން ހޯދުން ކަމުގައި ސްވިޓްޒަލެންޑުން ބުންޏެވެ.
ޔޫކްރެއިނާ އެކު ސުލްޙައިގެ މަޝްވަރާތައް ބޭއްވުމަށް ތައްޔާރު ކަމުގައި ރަޝިޔާއިން މީގެ ކުރިން ބުނެފައިވެއެވެ. ނަމަވެސް, ސްވިޓްޒަލެންޑުގައި ބާއްވާ ސަމިޓުގައި ބައިވެރިވުމަށް ރަޝިޔާއިން ވަނީ ދެކޮޅު ހަދާފައެވެ. ސަބަބަކީ, ރަޝިޔާ-ޔޫކްރެއިން ހަނގުރާމައާ ގުޅޭ ގޮތުން ސްވިޓްޒަލެންޑުން ވަކި އަތަކަށް ބުރަވުމެވެ. އަދި, ރަޝިޔާގެ ބައިވެރިވުމާ ނުލައި ސަމިޓު ކާމިޔާބު ނުވާނެ ކަމުގައި ވެސް އެ ޤައުމުން ބުނެފައިވެއެވެ.
ނަމަވެސް, ރަޝިޔާގެ ގާތް އެކުވެރިއެއް ކަމުގައިވާ ޗައިނާއިން ވަނީ ސްވިޓްޒަލެންޑު ސަމިޓުގައި ބައިވެރިވުމާ މެދު ވިސްނަމުންދާ ކަމުގައި ބުނެފައެވެ. މީގެ އަހަރެއްހާ ދުވަސް ކުރިން ޗައިނާއިން ވަނީ, ރަޝިޔާއާއި ޔޫކްރެއިނާ ދެމެދު ސުލްޙަ ގާއިމު ކުރުމާ ގުޅޭގޮތުން 12 މާއްދާގެ މައްޗަށް އެކުލެވިގެންވާ ސުލްޙައިގެ ރޭވުމެއް ހުށަހަޅާފައެވެ. ރަޝިޔާއާއި ޔޫކްރެއިނުން ވެސް އެ ހުށަހެޅުންތައް ބަލައިގަނެފައިވެއެވެ.
ސްވިޓްޒަލެންޑުގެ ރައީސާ ވިއޯލާ އަމްހިއަރޑް ވެސް ވަނީ އެ ޤައުމުން ބާއްވާ ސަމިޓުގައި ކުރިއެރުންތަކެއް ހޯދޭނެ ކަމުގެ ޔަގީން ކަން އެރުވެން ނެތް ކަމަށް ބުނެފައެވެ. ނަމަވެސް, ރަޝިޔާ-ޔޫކްރެއިން ހަނގުރާމަ ނިމުމަކަށް ގެންނަން އެއްވެސް މަސައްކަތެއް ނުކޮށް, އަތް އުރައިލައިގެން ތިބެވެން ނެތް ކަމުގައި އޭނާ ވިދާޅުވިއެވެ. އަދި, އެއީ ވަރަށް ޒިންމާދާރު ކަން ކުޑަ ގޮތެއް ކަމުގައި ވެސް އޭނާ ވިދާޅުވިއެވެ.
"މި ސަމިޓުގައި ސުލްޙައިގެ އެއްބަސްވުމެއްގައި ސޮއި ކުރެވޭނެ ކަމަކަށް ނުބެލެވޭ. ނަމަވެސް, އުންމީދަކީ މި ފަދަ ދެވަނަ ސަމިޓެއް ބޭއްވުން. މިއީ, ފެށުމަކަށް ވާނެ،" އަމްހިއަރޑް ވިދާޅުވިއެވެ. ސްވިޓްޒަލެންޑުގެ ސަރުކާރުން ބުނީ, ސަމިޓުގައި ބައިވެރިވުމުގެ ދަޢުވަތު 100 ޤައުމަކަށް ފޮނުވާނެ ކަމުގައެވެ.
ރަޝިޔާ-ޔޫކްރެއިން ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައިގައި ރަޝިޔާއިން ވަނީ ޔޫކްރެއިންގެ ބައެއް ސަރަޙައްދުތަކަށް އަތްގަދަ ކޮށްފައެވެ. އޭގެ ތެރޭގައި އެ ޤައުމުގެ އުތުރުގައި އޮންނަ ދޮންބާސްގެ ލުހާންސްކާއި ދޮންޏެސްކުގެ އިތުރުން ދެކުނުގައި އޮންނަ ޒަޕޮރީޜިޔާގެ ބައެއް ސަރަޙައްދުތައް ހިމެނެއެވެ. ރަޝިޔާގެ އިސްތިޢުމާރީ ފައުޖާ ދެކޮޅަށް ޔޫކްރެއިނުން ވަނީ ކައުންޓަރއޮފެންސިވެއް ނުވަތަ ރައްދު ޙަމަލާގެ އަސްކަރީ ކެމްޕޭނެއް ފަށާފައެވެ.