ހޮންގކޮންގުގައި ގިނަ ޢަދަދެއްގެ ޢާންމުން ދިރިއުޅޭ އެޕާޓްމަންޓް ޢިމާރާތެއްގައި ނުރައްކާތެރި އަލިފާނުގެ ހާދިސާއެއް ހިނގައި, ފަސް މީހުން މަރުވެއްޖެއެވެ. ގިނަ ޢަދަދެއްގެ ބަޔަކު ދިރިއުޅޭ ޖިއައުލޮންގ ޑިސްޓްރިކްޓުގައި ހުންނަ ޢިމާރާތެއްގައި ހިނގި އަލިފާނުގެ ހާދިސާގައި 35 މީހަކަށް ފިހިގެން ބޮޑެތި އަނިޔާތައް ލިބުނެވެ. އަދި, ގިނަ ޢަދަދެއްގެ ބަޔަކު ހަސްފަތާލުގައި އެޑްމިޓުކޮށް ފަރުވާ ދޭން ޖެހުނެވެ.
އަލިފާން ރޯވެފައި ވަނީ 16 ފަންގިފިލާގެ ޢިމާރާތެއްގެ ޖިމްގައެވެ. ހޮންގ ކޮންގުގެ ޞިއްޙީ އިދާރާތަކުން ބުނީ, ފިހިގެން ލިބުނު ޒަޚަމުތަކަށް ފަރުވާ ދޭން 40 މީހުން ހަސްފަތާލުގައި އެޑްމިޓު ކުރަން ޖެހުނު ކަމުގައެވެ. އަލިފާން ރޯވުމާ އެކު, އަލިފާން ނިއްވާ ޓީމުތަކުން ވަނީ ހަރަކާތްތެރިވާން ފަށާފައެވެ. އަދި, އަލިފާން ރޯވި ޢިމާރާތް ހުންނަ ސަރަޙައްދުގެ މަގުތައް ބަންދުކޮށް, އެ ޢިމާރާތުގައި ދިރިއުޅޭ މީހުން ސަލާމަތް ކުރުމުގެ މަސައްކަތް ފަށާފައެވެ.
ހޮންގ ކޮންގުގެ ސަރުކާރުން ބުނީ, އަލިފާން ރޯވި ޢިމާރާތުގައި ދިރިއުޅޭ 150އެއްހާ މީހުން އެ ޢިމާރާތުން ބޭރުކޮށް, ރައްކާތެރި ސަރަޙައްދަކަށް ބަދަލު ކުރަން ޖެހުނު ކަމުގައެވެ. ހޮންގ ކޮންގުގެ ޗީފް އެގްޒެކެޓިވް ޖޯން ލީ ވިދާޅުވީ, މި ހާދިސާގައި އަނިޔާވި މީހުންނަށް ފަރުވާ ދިނުމަށް ޚާއްޞަ އިސްކަމެއް ދިނުމަށް ކަމާ ގުޅޭ އިދާރާތަކަށް އަންގާފައިވާނެ ކަމުގައެވެ. އަދި, ޢިމާރާތުގައި އަލިފާން ރޯވާން މެދުވެރިވި ސަބަބު ދެނެގަތުމަށް ތަޙުޤީޤު ކުރަން ފަށާފައިވާ ކަމުގައެވެ.
މި ހާދިސާގައި ފިހިގެން ފަރުވާ ދޭން ޖެހުނު މީހުންގެ ތެރެއިން ހަ މީހެއްގެ ހާލު ސީރިޔަސް ކަމުގައި ޞިއްޙީ އިދާރާތަކުން ބުނެއެވެ. ޖިއައުލޮންގގެ ޢިމާރާތުގައި އަލިފާން ރޯވި ވަގުތު, ހޮންގ ކޮންގުގެ އުތުރު ސަރަޙައްދުގައި އޮންނަ ޢިމާރާތް ކުރާ ސަރަޙައްދެއްގައި ވެސް ނުރައްކާތެރި އަލިފާނުގެ ހާދިސާއެއް ހިނގިއެވެ. އެ އަލިފާންގަނޑު ކޮންޓްރޯލް ކުރެވިފައި ވަނީ 15 ގަޑިއިރުގެ މަސައްކަތުންނެވެ. އެ ހާދިސާގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ.