2024 ވަނަ އަހަރުގެ މަޖިލީހަށް 2 ސިޓީއަކާއި، 3 އަތޮޅަކުން އިތުރު ދާއިރާތަކެއް

އަންނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހަށް 2 ސިޓީއަކާއި، 3 އަތޮޅަކުން އިތުރު ދާއިރާތަކެއް އިތުރުވާނެކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ. އިލެކްޝަންސް ކޮމިޝަނުން ގެންދަވަނީ ޤާނޫނީ ގޮތުން ދާއިރާތަކަށް އަންނަ ބަދަލުތަކުގެ މަސައްކަތް ކުރައްވަމުންނެވެ.

ރައްޔިތުންގެ މަޖިލީހުގެ ދާއިރާތައް ކަނޑައެޅިގެންދަނީ، އާބާދީގެ ނިސްބަތަށް ބަލައި، އަންނަ ބަދަލުތަކުގެ މައްޗަށެވެ. ޤާނޫނު އަސާސީގައި ކޮންމެ 5،000 މީހުން ހިމެނޭ ނަމަ އެދާއިރާއަކަށް ވަކި މެމްބަރެއް އިންތިޚާބު ކުރެއްވުމަށް ވަނީ ކަނޑައަޅުއްވާފައެވެ. އިލެކްޝަންސް ކޮމިޝަންގެ ނައިބް ރައީސް އިސްމާއިލް ހަބީބް ވިދާޅުވީ، ރިޔާސީ އިންތިޚާބުގެ މަސައްކަތް ކުރައްވަމުންދާއިރު، ކުރިއަށް އޮތް 2024 ވަނަ އަހަރުގެ މަޖިލިސް އިންތިޚާބުގެ މަސައްކަތްތައްވެސް ކޮމިޝަނުން ކުރަމުންދާކަމަށެވެ.

އިންތިޚާބުތަކާއި ބެހޭ ޢާންމު ޤާނޫނުގައި މިހާރު އޮތް ރައްޔިތުންގެ މަޖިލީހުގެ އުމުރު ހަމަވުމުގެ 10 މަސް ދުވަހުގެ ކުރިން، ކުރިއަށް އޮތް ދައުރަށް މަޖިލީހަށް އިތުރުވާ ދާއިރާތަކާއި، އާބާދީގެ ނިސްބަތް އިލެކްޝަންސް ކޮމިޝަނުން ހާމަ ކުރައްވަން ޖެހެއެވެ. ކޮމިޝަންގެ ނައިބް ރައީސް ހަބީބް ވިދާޅުވީ މި މަސައްކަތް މިއަހަރުގެ ފެބްރުއަރީ މަހުން ފެށިގެން ކުރައްވަމުންދާކަމަށެވެ. އެގޮތުން މިހާތަނަށް ލިބިފައިވާ މަޢުލޫމާތާއި، ފެންނަން ހުރި ހިސާބުތަކަށް ބަލާއިރު 2 ސިޓީ ކައުންސިލަކާއި، 3 އަތޮޅަކަށް ދާއިރާތަކެއް އިތުރުވެގެންދާނެކަމަށެވެ.

"ކޮންމެ ފަސް އަހަރަކުން އެއްފަހަރު ދާއިރާތަކަށް ބަދަލު އެބައާދޭ. ފަހަރަކަށްވުރެ ފަހަރަށް ގޮނޑި އިތުރުވޭ އެބަ. މިފަހަރުވެސް އެ ފުރުޞަތު އެބައޮތް. 2 ސިޓީއަކަށާއި، 3 އަތޮޅަކަށް އިތުރުވާ ގޮތަށް ހިސާބުތައް ދައްކަނީ" ހަބީބް ވިދާޅުވިއެވެ.

ކޮމިޝަނުން ކުރަމުންދާ މަސައްކަތަކަށް ފަހުން މިމަހުގެ 27 ވަނަ ދުވަހު އިތުރުވާ ދާއިރާތަކާއި އެކަމުގެ މަޢުލޫމާތު ހިމެނޭ ރިޕޯޓް އާންމު ކުރައްވާނެކަމަށް ހަބީބް ވިދާޅުވިއެވެ. އަދި ދާއިމީ ރިޕޯޓް ސެޕްޓެމްބަރު މަހުގެ 28 ވަނަ ދުވަހު ޢާންމު ކުރާނެކަމަށް ހަބީބް ވިދާޅުވިއެވެ.

މިހާރު އޮތް ރައްޔިތުންގެ މަޖިލީހުގެ ދައުރު ހަމަވާނީ އަންނަ އަހަރުގެ މޭމަހުގެ 30 އަށެވެ. ރައްޔިތުންގެ މަޖިލީހަށް ދައުރަކަށްފަހު ދައުރެއްގައި މެމްބަރުން އިތުރުވުމަކީ ގިނަ ބައެއްގެ ކަންބޮޑުވުން އޮތް މައްސަލައެކެވެ. މަޖިލީހުގައި މިހާރު 87 މެމްބަރުން ތިއްބަވައެވެ. މި މައްސަލައަށް ހައްލު ގެނައުމަށް މިހިނގާ 19 ވަނަ މަޖިލީހަށްވެސް ހުށަހެޅި މައްސަލަ ކުރިއަށްދާ ގޮތެއް ނުވެއެވެ. މަޖިލީހުގެ ދާއިރާތަށް އިތުރުވާ އިތުރުވުމަށް ހައްލު ގެނެވޭނީ ޤާނޫނު އަސާސީއަށް އިސްލާހު ގެނެސްގެންނެވެ.